Сыйыхтас. 5 октябрьда Хакасияның устағ-пастаа чон тӧліне пiлiс пирчеткен улусха, ӱгретчi кӱнiнең алғыстап, хазна сыйыхтарын читiрген 

Ол кӱн М.Ю.Лермонтовтың адынаң орыс драма театрынзар тиксi республикадаң ӱгретчiлер чыылысханнар. Оларның санында ортымах паза пасталығ школаларның, профессиональнай училище-колледжтернiң, хоза ӱгредiг учреждениелерінiң устағҷылары паза ӱгретчiлерi, чиит специалисттерi паза ветераннары полғаннар. 

– Аарлығ ӱгретчiлер! Алғыстапчам сiрернi профессияа сын полчатхан ӱчӱн. Сiрер чон тӧліне, орта чолзар кӧстеп, пiлiс ле пирбинчезер нооза, сiрер оларның чӱрее-чанын имнепчезер тиирге чарир. Уламох улуғ алғыс ӱгредiг киреенiң ветераннарына. Чииттернең опыттарыңнаң ӱлесчеткен ӱчӱн. Прайзы хазых полыңар. Часка паза талаан ползын! – алғыстаан прайзын Хакасия пазы Валентин Коновалов.  

Республика устағҷызы читiрген хазна сыйыхтарынаңар чоохтаза, пӱӱл Хакасияда «Россия Федерациязының саблығ ӱгретчiзi» атха iкi кiзi турысхан – Ағбандағы гимназияның тархын ӱгретчiзi Татьяна Кудрявцева паза 3№ школаның орыс тiлi паза литература ӱгретчiзi Надежда Пцарева! «За заслуги перед Хакасией» орден Ағбандағы 25 № школанаң кӧп чыл устаан Нина Богинскаяның кӧксiне хазалған.

Хакасияның саблығ ӱгретчiлерi саны, тiзең, он пiр кiзее хозыл парған. Асхыс аймаандағы Калинин аалдағы ортымах школаның орыс тiлi паза литература ӱгретчiзi Раиса Карамашева пу аарластығ атты алғаннарның пiрсi полча.

– Мин Пии аймаандағы Хойбал аалда тӧреем, ӧскем. Хыс фамилиям – Мылтыгашева. Хада хонғанымны алған специальнозы хоостыра Асхыстағы имнег туразынзар тоғынарға ызыбысханнар. Iди пiс 1982 чылда Асхыссар кӧс килгебiс. Аннаң пеер мин Калинин аалдағы ортымах школада, орыс тiлi паза литература ӱгретчiзi полып тоғын парчам. Пу тус аразына аймах сыйыхтар читiрiлген мағаа. «Хакасияның саблығ ӱгретчiзi» ат алғаным кӧңнiмнi уламох кӧдiрiбiстi, – ӱлескен Раиса Ивановна.

Паза республика устағҷызы ӱгредiг киреенде кӧп чыл тоғын париғаннарға «Хакасияның iстенiс сабланызы» медальны читiрген. Аны пӱӱл читi кiзi алған.  

– Минiң iстенiс чолым 1973 чылда ӱгредiг практиказынаң пасталған тиирге кирек. Пазағы чылда математика уроктарын апарып пастааннаң 50 чыл полар. Мындағ сыйых алғаныма хайди ӧрiнмеҷең? ӧрiнiстiг!  – теен медальға турысхан ӱгретчiлернiң пiрсi Алефтина Чугунекова. 

Алефтина Дмитриевна – Асхыс аймаандағы Асхыс чоғархы аалдағы ортымах школаның математика ӱгретчiзi. Пiс тее хаҷан-да аның ӱгренҷiлерi полғабыс. Ол уғаа пӧзiк пiлiстiг ӱгретчi. Пiс аның пос оңдайлығ уроктарын сағыста хаҷан даа ал чӧрчебiс. Улуғ алғыс Алефтина Дмитриевнаа! Мындағ сыйыхха ол сынап турысча.

«Хакасияның iстеніс сабланызы» медальға турысханнарның санында iдӧк Асхыс аймаандағы Калинин аалдағы ортымах школаның география ӱгретчізі Ольга Тобурчинова полған. Аның даа iстеніс стажы асхынах нимес.

Хакас Республиканың Аарластығ пiчиин алғаннарның аразында чииттер дее полғаннар. Тимофей Канзычаков Асхыстағы 18№ профессиональнай училищенiң ӱгретчiзi полча. Ол анда, информатика предмедiн апарып, 13-ҷi чылы тоғын парир.

– Сахтаам мин мындағ сыйыхты. Тың ӧрiнiстiг. Кӧңнiм толды. Стенезер iл салып, андар кӧрiп, сағын турарбын, ниме ӱчӱн пу сыйыхты алғам тiп. Анаң уламох чахсы тоғынарға кӱстенербiн, – ӱлескен Тимофей Дмитриевич.

М.Ю.Лермонтовтың адынаң орыс драма театрында таныхталған ӱгретчiлер кӱнiнде Хакас Республиканың Аарластығ пiчиин прай 20 ӱгретчi алған. Хакас Республика пазының – Правительство кнезiнiң алғыстас пiчиине 5 кiзi турысхан. Н.Ф.Катановтың адынаң национальнай гимназияның хакас тiлi паза литература ӱгретчiзi Татьяна Казанаева оларның санында.

Чыылысхан ӱгретчiлернi профессиональнай ӱлӱкӱннең iдӧк Хакасия ӧӧркi Чӧбiнiң культураҷа, ӱгредiгҷе паза наукаҷа комитедiнiң кнезi Оксана Разварина алғыстаан паза парламенттiң алғыстас пiчиин читiрген. Асхыс аймаандағы ӱс чул аалдағы М.Е.Кильчичаковтың адынаң школа-интернаттың хакас тiлi паза литература ӱгретчiзi Татьяна Тюмерекова ол сыйыхты алғаннарның пiрсi полча.

Хакасияның Улуғлар чӧбiнiң кнезi Пётр Воронин чоох тутханох. Паза ол «Чахсы киректер ӱчӱн» орденнi iкi кiзее читiрген – Асхыс аймаандағы ӱгредiг устанызының пастығы Ирина Кучугешеваа паза пу учреждениенiң ӱгредiг тилiзi пӧлиинiң специализi Николай Сагалаковха.

Амғы туста Хакасияның ӱгредiг паза наука министрiнiң тоғызын Анатолий Бутенко толдырча. Устағҷы кiзi, сценаа сығып, iдӧк прай ӱгретчiлернi алғыстаан. Аның искiриинең, пӱӱнгi кӱнде республикадағы ӱгредiг учреждениелерiнде 20 муңа чағын кiзi iстенче, оларның аразында 3 муң чиит специалист.  

– Ӱгретчi кӱнi – ол прай тӧллернi палғалыстырчатхан ӱлӱкӱн! – теен Анатолий Алексеевич чооғын тоосчатханда.

Сағынчабыс, аннаң чаразарға кирек.