Ӏдӧк сыйыхтарға Василий Боргояковнаң Пётр Амзараков турысханнар. Василий Георгиевич «Салбых чазының пурунғы кӱргеннері» музейнең устапча. Пӱӱл культура учреждениезі 15 чылын таныхтаан. Музейде ӱс ле кізі тоғынчаттыр. Январьдаң пасти объектте 20 муң кізі пол килген. Учреждение «Сибирь­дегі тынағ» маршрутсар ки­рілгенде, анда «Дискавери» ООО­ның кӱстенізінең  модульнай туалет турғызылған. Ахчаны компания, грант мариинда аралазып, утып алтыр. Таныхтирға кирек,  туалеттер – Россия регионнарында иң сидік  сурығларның пірcі. Аннаңар специалисттер, хабарҷылар, блогерлер пресс­конференцияларда чазырбин чоохтапчалар. Хайдағ даа чапсых орын полза, пу сурығ пӧгілбезе, туристтер саны хозылбас. Музейде хакас иблері пар. Оларны пӱӱл тыхтабысханнар.

Чир-суғҷыбыс Пётр Амзараков – «Археология паза тархын-культура экспертизазы» НПО-ның директоры. Организация 2017 чылда тӧстелген. Аның ӧӧн пӧгіні – археология істезіглерін апарары. ідӧк организация археологтар хасчатхан орыннарда туристтерге экскурсиялар иртірче.  Пётр Борисович чоохтапча:

– Пу тоғыснаң 2021 чылдаң айғас парирбыс. Экскурсиялар кирексіністе. Аалҷылар піссер неделяда 2-3 хати килчелер. ӧмелерде 20 – 30 кізі полча. Экскурсияларны Кунари Тюндешева иртірче. Ол пӧзік пілістіг гид.

Ӱр ниместе Пётр Амзараков Моол чирінде тоғыс чорығынаң пол килген. Аның Хакасияны, Туваны паза Монголияны піріктірчеткен маршрутты тӧстир сағыс пар. Мооллар проектке хозыларға тимделер. Хакасияда ӱзӱріг парча. Устағҷының чооғынаң, халғанҷы туста кізілер тӧреен чирінің тархын-культура ис-пайын пілерге харасчалар. Анзы «Хакасия – пис кӱстің чирі» бренднең палғалыстығ. Аалҷыларның илеедезі – орындағы чон.