Спорт. Хакасияның спорт министерствозы иң чахсы спортсменнерге паза оларның тренерлеріне сыйыхтар читірген

Республика спортсменнері аймах-пасха синде иртчеткен марығларда, кӱстерін сынап, постарын турыстыра кӧзітчелер. Кӧзідімге, Харатас чуртағҷызы Фёдор Жибинов (гиря кӧдірері) пӱӱл тилекей первенствозында тӧрт алтын медаль холға кирген. Хакас оол Денис Чертыков тағлығ чӱгӱрісче Россия чемпионадында чиңіс тутхан. Хазии уйан теннисисттер чидіглерінең ӧріндірчелер. Олар тренер Ирина Мордакинаның устаанынаң сыйыхтығ орыннарға тӧреміл сыхчалар.

9 августта Хакасияның физическай культура паза спорт министерствозы иң чахсы спортсменнерні, чыып, сыйыхтаан. Пайрамнығ мероприятие чағдапчатхан Физкультурник кӱніне чарыдылтыр. Аны спорт министрі Cергей Кочан, улуғ нимес сан пиріс идіп, асхан. Сергей Владимировичтің таниинаң, пӱӱл спорт сферазында ахча хозыл парды. Алында спортсменнер марығларға удаа ӧдіске чӧрген ползалар, амды ахча тузында позыдылча. Чиит тренерлер хоза тӧлег алчалар. Хакасияда спорт объекттері саны ӧсче. Ағбанда декабрьда ниик атлетика манежі тимге сығар.

Пу кӱннерде пӱдірігҷілер Абазада бассейнні, Сорығда спортзалны нааҷылап пастабысханнар. Министерство спортсменнерге имнег кінін азарға пӧгінче. Че специалисттернең сидікcініс пол партыр. Хакасияда ӧӧн cпорт кӧрімнері cаны читіге чит парды. Алында тӧрт полған: стол теннизі, ниик атлетика, спорт кӱрезі, дзюдо. Пӱӱнгі кӱнде стол теннизінде киректер уйан парчатханнаңар, аны ӧӧн cпорт кӧрімнері санынаң сығарыбысханнар. Хозыл парғаннар бокс, меспектіг хоккей, волейбол паза хазии уйаннарның спорты.

Хайди таныхтаан Сергей Кочан, пу чарадығны Россияның спорт министерствозы алча. Мында ӧӧні – улуғ марығларда чиңістер тудары. Аннаңар пу чидігде спортсменнернің паза тренерлернің хозымы улуғ. Чооғын тоозып, Сергей Владимирович теен:

– Прайзына хазых, часка алғапчам. Хакасия чуртағҷыларын наа чидіглернең ӧріндіріңер, чиңістер тудыңар.

Чылығ сӧстер соонаң сыйыхтас пасталған. 9 августта 57 кізее алғыстас пічіктері паза улуғ нимес сыйыхтар читірілгеннер. Таныхтатханнарның санында Евгения Карамчакова паза Денис Чертыков полғаннар. Олаңай кӱресче тренер Евгения Сергеевна Асхыс аймаанаң. Ағаа спортсар чолны тренер Алексей Яковлевич Шулбаев асхан. Хакас хыс Ағбандағы олимп резерві училищезінзер ӱгренерге кірібіcкенде, ол Марат Кичеевтің паза Татьяна Карамчакованың устаанынаң харбасхан. Ідӧк чир-суғҷыбыс Андрей Карамчаковтың холында узын таптаптыр. Евгения Сергеевна Асхыстағы спорт школазында 14-ҷі чылы істен парир. Ол хызыҷахтарнаң на хада тоғынчаттыр. Амды чиит ипчінің ӱс ӧме. Ӱгренҷілерінең Валерия Бурнакова паза Наталья Пудова Россияның спорт устары полчалар. Тӧрт ӱгренҷізі – Тарина Кучендаева, Сабрина Чебодаева, Агата Торбастаева, Тарина Бытотова – cпорт устарына кандидаттар. Тренер ипчі Хакасияның спорт министерствозының Аарластығ пічиин Наталья Пудованы Россия первенствозына чахсы тимнеен ӱчӱн алтыр. Марығ мартта Надым городта ирткен, анда 21 часха читкелек абахайлар кӱстерінең cынасханнар. Тӧӧ чирінең сыххан хыс ікінҷізі полыбысхан. Амғы туста Наташа саблығ тренер Марат Кичеевтің холында харбасча. Марат Семёнович ідӧк сыйых алған. Денис Чертыков пӱӱл, тағлығ чӱгӱрісче Россия чемпионаттарында аралазып, Хакасияа ікі медаль ағылды. Апрельде Денис Михайлович, Бештау тағзар чӱгӱріп, кӱмӱс призер полыбысхан. 30 июльда, тізең, чоғар-алтынзар дисциплинада чиңіc тутхан. Марығ Рыбинск городта ирткен. Амды спортсмен ниик атлетикаҷа Тирігліг кӱстернің Россия чемпионадына тимненче. Сыйыхтас тузында кикбоксер Сергей Сазанаковха «Россияның спорт узы» танығны читіргеннер. 27 частығ оол Асхыс аймаандағы Апчинай аалдаң, че илееде тус Новосибирскте чуртаптыр. Сергей, бокснаң айғазып, спорт узына кандидатха читкен. Хоза кикбоксингче нормативті толдырыбысхан.