КОРОНАВИРУСТАҢ ТОҒЫР КӰРЕЗІГ ТУЗАЛЫҒ ПОЛАР
18.03.2022
Хабарлар
Имнег кирее. Н.М.Одежкиннің адынаң республиканың офтальмология имнег туразындағы харах имӌізі, эндолазернай хирургия пӧлиинің устағӌызы Эльдар Прокопьевич Шалгинов «хызыл зонада» хайди тоғынғаннаңар чоохтапча
Таныхтирға кирек, республиканың офтальмология имнег туразы коронавирус тымозы тузында «хызыл зонаа» пір ле хати айландырылбаан. Харах имҷілері, ідӧк ковид пӧлиинде «коронавирус» диагнозтығ пациенттерні имнеп, маң чохха тӱскеннер. Ол санда іди тоғынарға ӱлӱс тӱскен офтальмолог Эльдар Прокопьевич Шалгиновха. Пӧзік устығ харах имҷізі «хызыл зонада» ідӧк чуғынҷах ағырығлар пӧлиинің устағҷызы полып тоғынған. Наа чуғынҷах тӧдір пазынған туста планда кӧрілген имнег айландырылып, имҷі-офтальмолог харах ағырығларынаң ирееленчеткен кізілерге имнег полызиин пирерге маңзыраҷаң. Пӱӱл оларға наа чуғынҷахтың тӧртінҷі «салғағында» кӱрезіг апарарға киліскен соонаң, пу айда ӱр ниместең пазох ӧӧн тоғыстарынаң айғас сыхтылар. Эльдар Прокопьевич ковид пӧлиинде хайди тоғынғаннарынаңар, сағысха киріп, чоохтаан:
- Пістің имнег организациязы коронавирус пандемиязында профильін пастап алыстырған 2020 чылда октябрьның халғанҷызынзар, ӱр нимес тусха чуғынҷах ағырығлары пӧлиине айландырылған. 30 октябрьда пістің стационарзар чатырылчатхан «коронавирус» диагнозтығ пациенттернең тоғынып пастаабыс. Ол піске саңай наа ниме полған, іди пастағызын на тоғынғабыс нооза, ол офтальмологияа пір дее тӧӧй полбаан. Андада пандемияның пастағы «салғағында» ковид пӧлиинде тиксі пис офтальмолог істенген. Пасха имҷілернің специальностьтары пасхалалған, кӧзідімге, пульманологтар, функциональнай диагностика имчілері полғаннар.
Пу чуғынҷахтың ікінҷі «салғағын» пылтыр июнь-июльда ирткебіс, ікінҷізін олох чылда - октябрь - декабрьда. Халғанҷызын, тізең пӱӱл февраль-мартта. Пастағызында піске, имнег киреендегілерге, уғаа хатығ чуххан. Че пазағы «салғахтарында» коронавируснаң кӱрезерінде тоғысты апарарға оой арах пол сыххан. Анҷаға піс опыт алынып алғабыс нооза, чуғынҷахты орта имнирге ӱгреніп алғабыс. Аннаңар піс «хызыл зонаны» чапчаң тӧстебісчеңміс, персонал даа наа тоғыс режиміне оой кӧнік сыххан. Ікінҷі «салғағынаң» сығара ковиднең тың ағырбинчатхан чуртағҷыларны имнеебіс, че анаң ковидтің «Дельта» штаммы сығыс килгенде, имненчеткен дее пациенттернің пу ағырығ уғаа табырах улғаатчаң. Андағ кирек ӱзінҷі «салғағына» теере узараан. Піске, имчілерге дее, уғаа аар полған тоғынарға. 2020 чылдағы «Уханьдағы» штаммнаң тиңнестірзе, мынзын имнирге хай-хай сидік полған.
Наа чуғынҷах тарап сыхханда, санапчам, піс аннаң хорыхпаабыс, че уғаа ӱрӱгістіг полған. Хайдағдыр пу наа ағырығ, аны хайди имнирге кирек полчатханын пірдеезі пілбеен. Сағысха кирчем, 2020 чылда февраль-мартта піс коронавирус чуғынчах ағырығ темазынча Санкт-Петербургтағы фтизиопульмонология институдынаң сыбыра кӧні палғалысча тоғынчаңмыс. Андада пандемия Хыдат чирінде ле тарапчатхан, пу хазнаа пістің хырығлар чабылчатхан, ол пеер читпес тіп сағынғабыс. Хыдаттаң пасха чирлерзер тарабас тіп ізеніс полған. Ол туста сынап пірдеезі киртінмесчік, ковиднең ағырчатханнарны 8 ай пазынаң орғаннарыбыста имнеп сығарына.
Полған киректернің хайзы-да сағыста ӱрге халған, че аннаңар чоохтирға, аны ӱзӱрерге кирек чоғыл тіп санапчам. «Дельта» штаммы пеер «читкенде», матап ирееленгебіс. Пірее пациенттерні кӱстіг имнезе дее, че оларның ӧкпезінің 25 - 80 % чардығы наа штаммға ікі-ӱс ле сутка аразына «чиртірібісчең».
Піске хоза артылған тоғысха кӧнік тее парыбысхабыс. Специалисттерібіс сидіктерні махачы тобырғаннар. Мындағы «хызыл зонада» иң не кӧп 90 орған полған, оларның пірдеезі андада хуруғ турбаан. Че мындағ туста кізілерге офтальмологияча имнег полызиин пирер тоғыс тохтадылчаң. Харах ағыриинаң имнең полбинчатханда, ӧӧн пациенттерібісті пу кирек матап тарындырған. Харахха операция идер тоғыстар даа тохтадылған нооза, аннаңар кізілернің іди тудынғанын піліп аларға чарирох.
Пӱӱнгі кӱнде ковид пӧліктерінде орыннар читкіче. Эпидемиянаң кирек улам на сидік пол сыхса, андағ орыннар саны чапчаң алғыдылча. Ағырчатханнар саны уғаа кӧп пол сыхханда, пӧліксер суткада 10 - 12 кізі чатырылчаң. Хаҷан кирек чахсы саринзар алысханда, суткада 3 - 5 ле кізі. Пӱӱл пу имнег туразындағы «хызыл зонада» тиксі 12 имҷі, 21 медсестра паза медбрат, 17-ҷе санитарка істенген.
Пу чылда, пылтырғызынаң тиңнестірзе, піс сала амыр тоғынчабыс. Амғы «Омикрон» штаммға кізілернің ӧкпелері тың алдыртпинча, кислород таа асхынах арах киректелче.
Имнег тоғынҷылары ковидтең арачыланҷаң, кип-азах, перчатка-бахилалар, респираторлар, ӧнетін очки кизіп тоғынчалар. Арачыланҷаң, кип-азах пір хати тузаланарына кӧрілче. Санапчам, имнег тоғынҷылары постарын мындағ оңдайнаң наа чуғынҷахтаң чахсы арачылапчалар. Тиңнестір кӧріңер, садығ туразынзар алай кӧп кізі хайынчатхан пасха даа орыннарзар маска киспин чӧрчеткен кізінең.
Ам ковид пӧлиинде хазыхтанып алған халғанҷы пациенттер 4 мартта ибзер позыдылғаннар, хайзы-да пасха стационарзар читіре имненерге ызылған. Имнег туразының пӧліктерінде дезинфекция иртірілген соонаң 12 марттаң сығара имнег организациязы пазох позының ӧӧн кӧстеенҷе - офтальмологияҷа - тоғыс апарча.
Масканы кис чӧргенінің тузазы чоғыл тіп санапчатхан кізілерге хайдағ-да чӧптер пирбеспін. Андағ нименің тузазын кӧрбинчем. Коронавирустаң посха арачыланардаңар прай синде муңар хати чоохталған. Нимені пілерге кӱстенминчеткен кізі хаҷан даа табыладыр.
Пандемия, минің чуртазыма тееліп, профессиямдағы пӧгіннерні, сурығларны пӧгерінде наа кӱс хосхан. Піди тиксі саназа, «коронавирус» диагнозтығ кізілерні имнеп, піс сигіс ай айғасхабыс. Ол - пістің опыдыбыс. Паза ол піске чуртаста ам даа туза поларға айабас. Коронавирус тымозы кӧп хазнаның хазых хайраллир системазының уйан сарин кӧзіт пирген, че олох туста наа имнерні істезіп сығарарына кӧстеен. Ідӧк дистанционнай ӱгредіг технологиялары пілдірте тиліп сыхтылар. Ам даа ирткелек пандемияның «уроктары» паза аннаң тоғыр кӱрезігдегі улуғ опыт кӧбізіне чуртаста тузалығ полар.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде