784 кiзi ағырыбысхан, 7 кiзi ӱреен
21.02.2022
Хабарлар
Пӱӱн Хакасия правительствозындағы коронавирустаң тоғыр кӱрезерiнӌе оперативнай штабтың теестегi чыылии ирткен. Республикада халғанӌы суткада COVID-19 наа чуғынӌахнаң 784 кiзi ағырыбысхан, ковид- пöлiктерзер 92 кiзi чатырылған.
Ағырығдаң пӱӱл тиксi 11144 чуртағӌы имненiп алған. Халғанӌы суткада пу чуғынӌахтаң 7 кiзi ӱреен, пу чыл пасталғаннаң - 200 кiзi. Ибде сағам 10061 чуртағӌы имненче.
Имнег тураларында пу ағырығдаң ирееленчеткеннернi имнирiне тиксi 1346 орын тимнелген. Оларның 1083-iнзер кiзiлер имненерге чатырылған. Пу кӱнде 263 орған (20%) пос турча. 760 орғанда кислород пар. Андағ орыннарның 263-i (35%) сағам пос турча. Кислород суткада ортымахти 4,4 тонна хорадылча. 24 февральға теере орғаннар саны олох синде артызылар.
Коронавирустаң тоғыр вакцина республикада читкiӌе. Наа чуғынӌахтаң тоғыр прививка прай 292843 кiзее турғызылған. Ол санда 201910 кiзi вакцинаның iкi дозазын турғыстырып алған. Ревакцинацияны 64692 чуртағӌы иртiбiскен.
Саарбахтарға турғызылчатхан вакцина сағам Сорығда ла халтыр - 5 доза. Пу чағында аны Хакасиязар читiрiлерi кöрiлбинче. Олған вакциназының пазағы дозаларының качествозы сыныхталып, экспертиза иртiрiлчеттiр.
Ирткен неделянаң тиңнестiрзе, ковиднең ағырчатханнарның саны 6%-ке хызырылтыр. Че ам регионда ковиднең кöп кiзi ағырча Алтай, Ағбан пилтiрi аймахтарында, Харатаста, Саяногорскта паза Асхыс чирiнде. Хайди чоохталған чыылығда, хай пiрее муниципалитеттерде санитар-эпидемиология правилоларына чуртағӌылар хайди тудынчатханнарын уйан сыныхтапчалар. Оларда ағырчатханнар саны öсче. Хакасия пазы Валентин Коновалов город-аймах пастарына сыныхтағ тоғыстарын öткiн паза тöремiл иртiрерге чахығ пирген.
Автор :
Тимнеен Инора Боргоякова
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
