300 ОРЫН ТӦСТЕЛГЕН
09.02.2022
Хабарлар
Сӧп-сап сурии. 2021 чылда республикада сӧп-сапты чығҷаң 300 орын пӱдірілген. Іди 26 муниципальнай пӱдісте анзынаң сидіксініс чох полар. Пасхазында пу сурығ хаҷан пӧгілер?
Пу сурыға нандырығ пирілген пу наада Хакасияда ведомстволар аразындағы тоғысчы ӧме чыылиинда. Кӧстегліг министерстволар, муниципальнай пӱдістер пастары паза региондағы оператор кізілері Хакасия пазының орынӌызы Юрий Курлаевтің устаанынаң коммунальнай сӧп-сапты сығарарынӌа сурығларны ӱзӱргеннер, 2021 чылның салтарларын иткеннер паза пу чағынға кӧстеглер турғысханнар.
Ирткен чылда «Аалларның тиксі тилізі» хазна программазынӌа 26 муниципальнай пӱдісте сӧп-сапты чығӌаң 300 орын пӱдірілген. Ағаа 25 миллион салковай позыдылған, ӧӧн чардығы - федеральнай бюджеттең.
- Пӱӱнгі кӱнде республикада сӧп-сапты сығарарынҷа полызығ 96 % читірілче. Алызығлар ӧріндірче. Алында чон сӧп-сапты хаптарға чыған полза, амды контейнерлернең тузаланып пастапча, ол, тізең, ибіркі чирні арығ тударына чахсы теелче, город-ааллар хыринда сӧп-сап чарадылбаан орыннарда чыылбинча, - таныхтаан Хакасия пазының орынӌызы Юрий Курлаев.
Региондағы оператор республикадағы контейнерлерні санабысханда, оларның саны 29 муңа читчеткені ілезіне сығарылған. Полызығларны чахсыландырар пӧгіннең 2021 чылда региондағы оператор, 10 миллион салковай позыдып, 1200 контейнер турғысхан. Пӱӱл, тізең, хай пірее муниципальнай пӱдістерде сыныхтағ оңдайынаң наа проект чуртасха кирілер: хати тузаланылчатхан ниме-ноодаң сӧп-сапты чығӌаң орыннар тӧстелер. Че ол орыннарны тӧстирі муниципальнай пӱдістің устағ-пастаа нандыриинда полчатханда, ол орыннарны арығ тудары ӱчӱн устапчатхан компаниялар паза орындағы пос устаныс органнары нандырчатханда, Юрий Курлаев чыылығ араласчыларын, ирткен тустағы алӌаастарны санға алып, кӱстерні піріктіріп, пӱӱл оларны чахсыландырарға хығырған.
- Хакасияның чир-чайаан ис-пайы паза экология министерствозы чағынғы ӱс чылға сӧп-сапты чығчаң орыннарны пӱдіреріне субсидия аларынча марығ иртірібіскен. Тиксі 19 айланыс кірген, оларның 16-зы чиңісчі полыбысхан. Ол пӧгінге федеральнай бюджеттең 11,5 миллион салковай позыдылар. Пӱӱл ле 11 муниципальнай пӱдісте 104 орын пӱдірілер, тиксі 9 миллион салковай позыдылар, - чарытхан Хакасияның чир-чайаан ис-пайы паза экология министрінің орынӌызы Ольга Лушникова.
2022 - 2024 чылларда ідӧк сӧп-сапты тӧгерге чарабас орыннарны чох идеріне республика бюджедінең ахча позыдары кӧріл парған. Чоохтирға кирек, 2019 чылдаң сығара Хакасияның чир-чайаан ис-пайы паза экология министерствозы андағ орыннарны санапча. Ӱс чыл аразына регионда чарадығ чох сӧп-сап тӧгілген 148 орын ілезіне сығарылған, оларның 39-зы чох иділген. Пу ӱс чылға 9 муниципальнай пӱдістегі сӧп-сап тӧгілген орыннарны чох идері кӧрілче, анзына 33 миллион салковай позыдылар. Ідӧк кӧстегліг министерство чарадығ чох сӧп-сап тӧгілчеткен орыннарны чох иттірердеңер, ол санда чир культуразын нааӌылирдаңар, 13 иск айланызынаң сыххан.
Пӱӱл Хакасияның чир-чайаан ис-пайы паза экология министерствозына ідӧк сӧп-сапты сығарарынӌа территориальнай схеманы тӱзедерге киректелче. Республика правительствозы, тізең, Харатас городта сӧп-сапты ниме-ноо сығарарына пӧлчеткен амғы тусха килістіре комплекс пӱдірерінӌе сурығны пӧкче. Заводта килкім сӧп-сапнаң тоғынӌаң, компост тимнеӌең цехтар паза концессия чӧп-тезіглерінӌе чох иділбеӌең сӧп-сапты хайраллаӌаң полигон полары кӧрілче.
Автор :
Юлия БРЕДИХИНА
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
