НАА КУЛЬТУРА ТУРАЗЫ - НАА ЧИДІГЛЕР
19.01.2022
Хабарлар

Нацпроекттер. Ирткен неделяда Асхыс аймаандағы Ӧӧк пилтірі аалда тиксі тыхтағ тоғыстары соонда Культура туразы пайрамни азылған
ПУ ТАНЫҒЛЫҒ КИРЕК «ААЛЛАРНЫҢ ТИКСІ ТИЛІЗІ» ПРОГРАММА ПОЛЫЗИИНАҢ ЧУРТАСХА КИРІЛГЕН. ПРОГРАММА ХООСТЫРА ПАСХА ДАА ТОҒЫСТАР ИДІЛГЕН: ӦӦК ПИЛТІРІНДЕГІ ОРТЫМАХ ШКОЛАДА ТИКСІ ТЫХТАҒ ТОҒЫСТАРЫ, ШКОЛАА НАА АВТОБУС АЛЫЛҒАН ПАЗА ААЛДА ТАСХАР СПОРТ ОБОРУДОВАНИЕЗІ ТУРҒЫЗЫЛҒАН. ПРАЙ ТОҒЫСТАРҒА ТИКСІ 42 МИЛЛИОН САЛКОВАЙ ПОЗЫДЫЛҒАН. ОЛ АХЧАНЫҢ 30 МИЛЛИОНДА САЛКОВАЙЫ ФЕДЕРАЛЬНАЙ БЮДЖЕТТЕҢ ПИРІЛГЕН, ІДӦК РЕСПУБЛИКА, АЙМАХ ПАЗА ААЛ ЧӦБІ БЮДЖЕТТЕРІНДЕ АХЧА ТАБЫЛҒАН.
ТАНЫХТИРҒА КИРЕК, ӦӦК ПИЛТІРІНДЕГІ КУЛЬТУРА ТУРАЗЫ ИРТКЕН ЧЫЛДА «КУЛЬТУРА» НАЦИОНАЛЬНАЙ ПРОЕКТКЕ КІР ПАРҒАН, АНЫ ХООСТЫРА ТУРА ХЫРЫ НААҶЫЛАЛҒАН ПАЗА НИНҶЕ-ДЕ ПӦЛІК ТЫХТАЛҒАН. ХАЛҒАН ТОҒЫС «ААЛЛАРНЫҢ ТИКСІ ТИЛІЗІ» ПРОГРАММА ХООСТЫРА ТОЛДЫРЫЛҒАН.
Ӏди тураның фундаментін, стенелерін тыхтааннар паза Культура туразы алнындағы чир иптелген, наа кӧзенектер турғызылған, чылығ пирҷең система алыстырылған. Культура туразын пайрамни азарында Хакасияның аал хонии министрі Сергей Труфанов, культура министрі Светлана Окольникова, Хазна Думазының депутады Сергей Сокол паза аймахтың устағ пастаа араласханнар.
Кибірге кір парған оңдайнаң улуғ аалҷыларны іпек-туснаң удурлааннар. Культура туразы азыларын культура тоғынҷылары, чайаачы ӧмелер паза аал чуртағҷылары чидікпин сахтааннар. Хызыл чаламаны хыплабызып, аал чуртағҷыларына нааҷылалған Культура туразының ізиин асханнар Светлана Окольникова, «Энигма» ООО пӱдіріг организациязының кізізі Олег Родин, Ӧӧк пилтірі аал чӧбі пазы Николай Спирин паза Культура туразының директоры Анна Кириллова. Анаң Олег Родин Культура туразының директорына танығлығ клӱсті читірген. Культура туразы азыл парғанда, улуғ аалҷыларға экскурсия иртірілген. Аның соонаң прайзы ӧӧн залзар чыылысхан. Хайди таныхтаан Ӧӧк пилтірі аал чӧбінің пазы Николай Спирин, Культура туразы 1987 чылда пӱдірілген, анда тиксі тыхтағ тоғыстарын иртірерін аал чуртағҷылары кӧп чыл сахтааннар. Хазна программазы аал чуртағҷыларының чазыттығ сағызын толдырыбызарға хабас пирген. Хазна Думазының депутады Сергей Соколның таниинаң, нааҷылалған Культура туразы муниципалитет федерация ӱлгӱлерінең тоғынчатханының кӧзідімі полча. Прай тоғыс асхынах тус аразына толдырыл парған. Пӱдірігҷілер тоғыс аразында хайди прай чахсы идібізерінҷе аймах чӧптернең сыхханнар.
Амды олғаннарға пос тусты иртірерге истіг орын полар. Чооғын тоозып, Сергей Сокол, Николай Спиринге, Культура туразының ӧмезіне алғыстас пічіктерін читіріп, Культура туразына мебель аларына сертификат пирген. Хайди таныхталған пайрамнығ иирде, нааҷылалған залда ӱлӱкӱн иртірерге хаҷан даа ӧріністіг.
Нинҷе-де ай парған тыхтағ тоғыстары соонда амды аал чуртағҷылары амғы тусха килістіре Культура туразында тынанарлар. Анаң аал чуртағҷыларын алғыстирға Ӧӧк пилтірі аал чӧбі пазы Николай Спирин сыххан. - Нааҷылалған Культура туразын азар кӱн читті. Пеер кӧп кізі килгені ӧріндірче, прайзы чахсы кӧңніліг. Тыхтағ тоғыста-ры толдырыл парғаны прайзын чӧпсітче. Культура туразы хаҷаннаң аны кирексіпчеткен, - таных-таан Николай Николаевич. Культура министрі Светлана Окольникованың чооғынаң, нааҷылалған Культура туразы аал чуртағҷыларына Наа чылға улуғ сыйых пол парды.

- Культура туразы хазна программазына кіріп алғанда, піс Сергей Иванович Труфановнаң, пу сценада турып, хайди тоғысты пастирға сағысха тӱзібіскебіс. Ахча пирілген, че кӧрілген тусха хайди маңнанарбыс. Мында стенелер ле полғаннар тиирге чарир. Аукцион иртірібіскенде, тӧрт айдаң асхынах тус халған полған. Тоғыстар ікі айға ла толдырыл парған. Пӱӱн пістің уғаа чалахай кӱн, піске улуғ сыйых читірілді. Мында концерттер пирерге кӧп артист сурынча, - таныхтаан Светлана Анатольевна.
Хакасияның аал хонии министрі Сергей Труфановтың таниинаң, Россияның аал хонии министерствозынаң сығдыратханнарында, Ӧӧк пилтіріндегі культура туразын нааҷылабызарға оңдай пар тіп искіргеннер. Ол тоғыс хоза мероприятие тіп кӧріл парған полған.
- Светлана Анатольевнаа сығдырадып, піс тоғыстарны тузында толдырыбызарға маңнанарын ӱзӱргебіс. Пеер подрядчик кірібіскенде ле, тоғыстар толдырыларына ізеніс пол килген. Таныхтирға кирек, «Единая Россия» партияның пастаанаң «Аалларның тиксі тилізі» программа 2020 чылдаң тоғынып пастаан. Хакасия андар кірібіскен. Ирткен чылда Хубачарда арығлаҷаң система пӱдірілген, кӧп школада тиксі тыхтағ тоғыстары иділген, аалдағы специалисттерге туралар пӱдірілген. Ідӧк Таштып аймаандағы Индіркі Ибіг паза Асхыс аймаандағы Пирікчул аалда культура туралары нааҷылалған. Ізенчем, мыннаң мындар чуртағҷылар ідӧк пу тоғыста ӧткін аралазарлар, - таныхтаан Сергей Иванович.
Асхыс аймаа пазының пастағы орынҷызы Евгений Костяковтың чооғынаң, Культура туразын тыхтир тоғыс ӧткін парған, неделя сай штаб чыылығлары иртірілген. Анда кӧп сурығ ӱзӱрілген. Прайзы пірге тоғынып, чахсы салтарларға читкебіс. Ӧӧк пилтірі аал чӧбі мыннаң мындар тилир. Амғы туста «Аалларның тиксі тилізі» программа хоостыра 2023 чылға пічіктер тимнелче. Пӱӱнгі кӱнге проект пічіктерінҷе тоғыстар 52 миллион салковайға кӧріл парған.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде