Мындағ сіліг, амғы тусха килістіре олған садын пайрамни азарына Хакасияның устағ-пастаа кил парған - ол Хакасия пазы Валентин Коновалов паза аның орынҷылары, республиканың ӱгредіг паза наука министрі Лариса Гимазутина, Асхыс аймаа администрациязы паза ӱгредіг управлениезі.

- Наа олған садтары азылчатса, хаҷан даа ӧріністіг паза чӱрексіністіг. Оларның проекттері тӧӧй дее полза, полғанының на позының сілии, хайхастығ сари пар. Аннаңар олар пірсі пірсінең артых тиирҷікпін. «Настенька», тізең, городтағы олған садтарынаң пір дее халбинча. Андағох сіліг, чарых паза истіг! Поселоктағы олғаннар мында, тирең піліс алып, сағыс-кӧрістерін алғытсыннар, - таныхтаан чооғында Валентин Олегович.

«Настенька» сіліг, чарых турчатхан полза даа, аның пӱдірии ниик ле парбаан. Хайди чооғында таныхтаан Асхыс аймаа пазы Абрек Челтыгмашев, халғанҷы ікі чылға муниципалитетте ӱс олған сады тимге сых парған, оларның аразында «Настенька» иң аар пӱдірілген.

- Пӱдіріг тоғыстарынаң Хызылчардағы «Партнер» подряд организациязы айғасхан. Пастап ол тоғызын чапчаң апарған. Че пӱдірігнің 90 процентін тимге сығарыбысханда, ол банкрот полыбысхан. Пілдістіг, прай пӱдіріг тоғызы турыбысхан, тус, тізең, парча. Хайди поларға? Нацпроект хоостыра пӱдірілчеткен объектті хайди даа тузында тимге сығарыбызарға кирек нооза. Піс Хакасия пазы Валентин Коноваловсар пу сурығ хоос тыра айланғабыс, ол нинҷе-де хатап піссер штабха килген. Чӧптезіглер тикке парбаан. Піс алынҷа подряд организацияларынаң тоғынарға кирек тіп чӧпке килгебіс. Іди пу олған садын 11 организация тимге сығарған! Кем-де вентиляция тартхан, кем-де олған площадкаларын тимнеен, кем-де электриканаң, сантехниканаң, пічіктернең айғасхан! Салтарында, піс тиксі ӧменең олған садын тимге сығарып алғабыс! - ӧрінізін чазырбинча Абрек Васильевич.

«Настеньканы» читіре тимге сығарарға полысхан организацияларға прайзына алғыстас пічіктері читірілген. Таныхтирға кирек, Асхыс поселокта пу ӱзінҷі олған сады - пастағызы тимірчолҷыларни, ікінҷізі орындағы школада орныхча. Муниципальнай олған сады, тізең, пастағызы! Аннаңар даа орындағыларның ӧрінізі улам улуғ!

Асхыс аймаанзар тоғыс чорығынаң чӧргенде, Хакасия пазы ідӧк муниципалитеттің аал чӧптері пастарынаң, халыхчыларнаң тоғасхан, хайда ікінҷілеріне постарының ағырсымнығ сурығларын искірерге оңдай полған.

Хайдағ сурығлар сағыссыратча аал чӧптері пастарын? Тӧӧ пазы Елена Елистратованың искіриинең, муниципалитетте хар удаа чаапчатханда, чолларны арығлаҷаң аар техника кирек, имнег туразында имҷілер паза медсестралар чидіспинче; Асхыс аал пазы Марина Анжиганова сӧп-сап реформазының читпестерін таныхтаан; Ӧӧк пилтірі аал чӧбі пазы Николай Спирин Ӧӧк пилтіріндегі имнег туразындағы специалисттерні паза тоғынҷыларны хызырбасха сурынған; Паза аал чӧбі пазы Светлана Майнагашева аалда чоллар, сотовай палғалыс хомайдаңар паза маршрут автобузы чӧрбинчеткеннеңер искірген. Пу сурығлардаң пасха, ідӧк туризм, ағас узурылчатханы, изел париған туралардаң кӧзірері, чурт-коммунальнай хоных, аал хонии паза даа пасха сурығлар пирілген.

Хайди таныхтаан Хакасия пазы Валентин Коновалов, правительство Асхыс аймаана хаҷан даа алынҷа хайығ айландырча. Анда аал хонии, туризм паза производство чахсы тиліпче, хайзылары чуртағҷыларға тоғыс орыннарын пирче. Пӱӱл муниципалитетте нинҷе-де социальнай объект пӱдірілер, чол тыхтиры узарадылар, коммунальнай объекттер иптелер паза даа пасхазы. Тоғазығда кӧдірілген сурығларны Хакасия правительствозы Асхыс аймаа администрациязынаң хада пӧгер оңдай тілир.