УЛУҒ ТОҒЫС ИДІЛГЕН
15.12.2021
Хабарлар
Тіл сурии. Хакас тіліне тілбестелген чалғыс социальнай сетьті - ВКонтакте - пӱӱнгі кӱнге теере Карим Побызаков хайығда тут парча
2020 чылның кічіг хырлас айында ВКонтакте социальнай сеть хакас тіліне тілбестелген. Улуғ тоғысты чуртасха кирер сағыс олаңай хакас оол Сергей Токояковтың тӧреен. Сағызын чуртасха кирер оңдай тілеп, Сергей Хакасияның национальнай паза территориальнай политика министрі Михаил Побызаковсар читкен. Іди тӧреен наа хазна чахии - ВКонтакте социальнай сетьті хакас тіліне тілбестирге. Марығда «Арабист» тілбестег агентствозы утхан, че ӧӧн тоғысты, пу пірігіснең чӧптезіг идіп, хакас тілін ӧтіре пілчеткен специалисттер апарғаннар. Ирткен чылда улуғ хырлас айында социальнай сетьтің 80 азыра проценті хакас тіліне тілбестелген.
Тілбесчілер санында полған Карим Побызаков. Тоғысты пастапчатхандох, ол ағаа нандырығлығ хайған паза табырах тоғынарға кӱстенген. Социальнай сетьті хакас тілінең тоғындырған соонаң тілбестег тоғызын узарадарға киректелген. Социальнай сеть, Интернеттегі хайдағ даа приложение, сайт чіли, тӧреміл нааҷылалча, салтарында кирілген сӧстер, сӧстер пірігістері чох иділче, алыстырылча алай саңай наа чардыхтар кирілче. Аннаңар хакас тілінең ВКонтакте социальнай сетьті тӧреміл хайығда тударға киректелче, анда тузаланылчатхан сӧстер, чоохтағлар толдыразынаң хакас тілінең пиріл турған ӱчун.
Карим илееде чыл хабарҷы полған, Тӧӧ чирінде пос тілі тадиина ӱгренген паза ИСАТ-та пӧзік ӱгредіг алған. Пӱӱнгі кӱнде пу социальнай сетьте, тілні нааҷылап, тоғысты тӧреміл пос кӧңнінең апарча. Ол тоғыс пір дее чирдең тӧлелбинче, аннаңар аны уламох махтирға кирек.
Пу наада Карим Побызаков ВКонтакте социальнай сетьтең чапсых сыйыхтар алған. Сағын кӧрзе, Наа чылға ам даа ікі неделя азыра, ол, тізең, сыйыхтар амох алып пастапча. Чоохтирға кирек, сыйыхтар ағаа олаңай ла читірілбеен. ВКонтакте оларны прайзына читірбинче! Сыйыхха турызарға кирек. Хайди? Ай сай ВКонтакте социальнай сетьті аймах тіллерге тілбестепчеткеннер аразында кем иң кӧп сӧс тілбестебізеріне марығ иртче. Карим хакас тілін тӧреміл пастағы орыннарға сығар турған. Кӱстеніп паза чапчаң тоғынчатхан хакас тілбесчіні социальнай сетьтің тілбестегнең устапчатхан ӧме сілкер айындох алынҷа сыйыхнаң чеестирге молҷаан. Кічіг хырлас айының 7-ҷі кӱніңде ӱр сағаан сыйыхтар: чылығ свитер, аның кӧксінде «Когда переводить на хакасский - это твой профиль» пазылых, блокнот, стикерлер наклейказы - Ӱс чул аалзар читкен. Карим Побызаков пӱӱнгі кӱнде тӧреен аалында чуртапча. Сыйыхтарны алғандох, ол ӧрінізінең пу тоғысты хада пастаан арғыстарынаң ӱлескен, анаң ВКонтакте социальнай сетьтегі позының страницазында паза устапчатхан ӧмелерінде.
Автор :
Наталья СУБРАКОВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
