ЫРАХТЫН ӰГРЕДІГӀҢ ЧАХСЫ ПАЗА ХОМАЙ САРИЛАРЫ
15.12.2021
Хабарлар
Форум. Хакасияда иртчеткен «Халых чоохтазығ» гражданскай форум тоғызын аннаң андар узаратча. Теесте ӱгредіг сурығлары...
Коронавирус чуғынӌах ағырығ ӱгредіг киреензер позының алызығларын кирче. Іди школаларда уроктар расписаниезі алысча, ӱгренӌілер пландағы нимес тынағ кӱннеріне ызылчалар, ӱгредіг ырахтын апарылча... Анзы ӱгредіг синіне кӧнізінең теелче. Пілдістіг, чахсы саринаң нимес.
Ӱгредіг сурығларына чарыдылған халых чоохтазығда аның араласчылары ӧӧнінде пандемия тузында хайди ӱгренерге килісчеткеннеңер опытнаң алысханнар.
Хакас хазна университедінің «Имнег кирее» факультедінің студенті Николай Котюшев имӌее ӱгренче. Хайди ол тіпче, коронавирус чуғынӌах ағырығ тарап сыхханда, университеттің студенттері ідӧк дистанционно ӱгренерге ызылғаннар. Мындағ ӱгредігнің чахсы паза читпес сари парох. Пастағызы, кізі позының хазиин хайраллапча, олох туста піліс алча. Че имнег киреене ӱгренчеткеннерге хайди даа практика кирек. Аны онлайн ирт полбас. Пациентке орта диагноз турғызар ӱчӱн, аны кӧрерге, чоохтазарға, тутхлирға кирек, аннаңар ырахтын ӱгренері прай ла студенттерге килістіре нимес.
Анастасия Тахтаракованың палазы Н.Ф.Катановтың адынаң национальнай гимназияда ӱгренче. Андағы ӱгренӌілер ӱзінӌі хати дистанционнай оңдайнаң ӱгренчелер.
- Пу ӱгредіг организациязында ӱгредіг пір кӱнге дее тохтадылбаан. Ӱгретчілерге воспитательлер чахсы хабасчалар. Олар иртен иртӧк прайзын онлайн сыныхтабысчалар, ӱгретчі урокты 8.20 часта пастапча, - искірче Анастасия.
Хакасияның чиит ӱгретчілері ассоциациязының кнезі Анна Борисованың кӧрізінең, чахсы, кӱстеніп ӱгренчеткен олған, дистанционно даа ӱгрензе, сидіксінмес. Ӱгренерге эрінчеткеннерні, тізең, сыбыра хайығда тударға, сыныхтирға кирек. Ідӧк ырахтын ӱгредіг аар парча андағ сӧбірелерде, хайда паланың планшет алай ба компьютер чоғыл. Алай сӧбіреде нинӌе-де ӱгренӌі. Я, сидіксіністер кӧп, че олар прайзы пӧгілче.
Акай Албычаков «Хакас тілі» приложениені тимнирінде хайдағ сидіксіністерге урунғанын чарытхан. Хайди ол таныхтаан, приложениені тимнирінде хазна хабазии толдыразынаң полбаан паза тикке тоғынар хакас тілі специалисттері табылбаан. Хакасияның ӱгредіг паза наука министрінің орынӌызы Татьяна Карташова Акай Албычаковха грант марығларында аралазарға чӧп пирген, хайда 1,5 миллион салковайға теере ахчалығ хабазығ алып аларға чарир.
Ағбандағы политехническай колледжтің студенті Анастасия Грининаа дистанционнай ӱгредіг туза ағылған. Ол ӱгредігдең пасха, ідӧк теелбекнең айғасча. Карантин кирілгенде, анзы даа, мынзы даа тохтадылған. Чиит хыс пос тузын тузалығ иртірерге тіп интернетте хасхлан сыххан. Анда «Большая перемена» тиксі Россия мариина орта полған. Іди Анастасия анда аралазардаңар сурыныс пічиин ысхан, анаң Москвазар хығыртылған. Ол позы даа пілінмин халған, хайди чиңісчілер санында пол парған. Ағаа пір миллион салковайлығ сертификат читірілген.
Олған садтарында утренниктер чағдапчатханда, іӌе-пабаларның улам кӧп сурығ сығысча. Аннаңар гражданскай форумның араласчыларына Россияның Хакасияӌа Роспотребнадзор специализінзер айланарға оңдай полған.
- Школалар каникулларта иртеезін сыхпастар. Олтан садтарында утренниктер иртірерінең пірдеезі тоғыр нимес. Че ӱлӱкӱнге аниматорларны, актёрларны хығырарға чарадылбинча. Ідӧк ӱлӱкӱн группада ла иртсін, пасха группалардағы олғаннарны хозарға чарабас. Санитарнай правилоларҷа андар іҷе-пабаларға килерге чарадылча, че олар кирілген нормаларға тудынарға киректер. Ағаа хоза, оларның ковидтең тоғыр вакцинация ирткеннеңер сертификат алай ба чуғынҷах ағырығнаң ағырғаннаңар справка ползын, - теен Ольга Иванова.
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
