КАНИКУЛЛАРҒА ТУЗЫНДА ПАРАРЛАР
10.12.2021
Хабарлар

Штаб чыылии. Коронавирустаң тоғыр кӱресчең оперштабтың теестегі чыылиинда ӱгренҷілерні каникулларға азынада ыспасха, Наа чыл ӱлӱкӱнін школаларда алынҷа ла класстарнаң таныхтирға чӧп пирілген
Оперштабтың теестегі чыылиин Хакасия пазы Валентин Коновалов Москвадаң, анда тоғыс чорығы тузында полып, видеопалғалыс пастыра апарған. Улуғ городта ол тоғызын иртен 5.30 часта пастаан, республикада ковидтең тоғыр кӱрезіг хайди апарылчатханын хайығда тудар ӱчӱн.
9 декабрьға пирілген танығлардаң, регионда коронавируснаң халғанҷы суткада 148 кізі ағырыбысхан, оларның 98-і имнег тураларынзар чатырылған, ағырығдаң 517 кізі чазылып алған, 13 кізі тоозыл парған. Наа чуғынҷахнаң ағырып, ибде имненчеткеннернің саны - 3576 кізі. Имнег тураларында чуғынҷахты хаптырып алғаннарны имниріне 1251 орған тимнелген, оларның 299 (24 %) пос турча. Кислородтығ орғаннар саны - 819, оларның 299-зы (37%) - пос. Амды суткада 7 тонна кислород тузаланылча.
Пу кӱнге ковидтең тоғыр вакцинаның I чардығын 245584 кізі турғыстырып алған, II чардығын - 179368. Ревакцинацияны 30417 кізі иртібіскен. Пу прививканы турғызарынҷа план 66,6 % толдырылған, 60 час ас парғаннарның аразында - 73,4 %.
Тымо-тусхахтаң тоғыр прививка турғызарынҷа планны имнег тоғынҷылары 61,6 % толдырыбысханнар. Олғаннарға турғызарынҷа - 76 %, улуғларға - 55 %, азах аар чӧрчеткен ипчілерге - 100 %.
Чыылығда ӱгренҷілерні каникулларға азынада ызарға алай чох па тіп сурығның ӱзӱрии узарадылған. ОРВИ-наң ағырчатхан олғаннар саны ӧсчеткенде, республикадағы хай пірее школалар паза класстар чабылчалар, ӱгренҷілер ибдегі ӱгреніске ызылчалар. Хакасияның ӱгредіг министрі Лариса Гимазутинаның чооғынаң, пу кӱнде 46 школада 2668 ӱгренҷі ковиднең ағырчатхан алай ағырығ кізінең пір чирде полған сылтаанда карантинге ызылған, олар ідӧк дистанционнай ӱгредігде. 231 класстағы 5776 ӱгренҷі кискектеп ағырчаттыр. Хакасияда ӱгренҷілернің тиксі саны 74200 полтыр, киҷее оларның 8400-зі (11,7 %) ӱгренмеен.
Хай пірее школаларда ОРВИ-ҷа эпидемияның 20 % синін алтабысханнар, аннаңар олар карантинге чабылғаннар. Ідӧк ол сылтағнаң хайзы-да класстар чабылчалар. Іди Ағбанда пу неделяда понедельникте 37 класс чабыл партыр, оларда ӱгренчеткен олғаннар саны - 1940. Че четвергте ол сан ікіҷе хати кӧп пол парған - 62 класс ибдегі ӱгреністе полған. Роспотребнадзорның Хакасияҷа управлениезі чахиинаң, килер понедельниктең Ағбандағы школаларның 5-8-ҷі класстары дистанционнай ӱгредіге кирілчелер. Сағам пір неделяа іди позытчалар тіп чоохталған.
Харатаста 3 школа чабыл партыр. Анда амды Роспотребнадзорның искіріглерін сахтапчалар, ағырчатхан палалар саны син сыхса, арса, школаларда даа ӱгредіг паза тохтадылбас. Саяногорскта, тізең, класстар ла чабылча, пір дее школаның ӱгредіг тоғызы пӱкӱлее тохтадылбаан. Хакас национальнай гимназияда пӱӱн 9 - 11 класстардағылар ла ӱгренчеттірлер, аннаң пасхазы ибде одырып ӱгренче.
Лариса Гимазутина Хакасия пазы Валентин Коноваловтаң сурынған, школа тоосчатхан ӱгренҷілерні школазар чӧргізіп ӱгредерге. 11 класстағы оол-хыстарға школада ӱгредіг 3 чыл изере иптіг иртірілбинче. Ідӧк ол сурығ 4-ҷі класстағыларға теелче теен министр. Паза ол ӧнетін ӱгредігліг школаларның тоғызы тохтадылбин апарыларға кирек тіп таныхтаан. Кӧзідімге, кӧрбинчеткен паза испинчеткен кинек палаларны ӱгредеріне кӧстелчеткен школаларда пӱӱн пір дее олған паза ӱгретчі ағырбинча. Андағох чахсы кирек техникумнарда парча. Ол сағам ӱгренҷілерні хысхы каникулларына азынада ызарға кирексініс чоғыл тіп искірген. Наа чыл ӱлӱкӱнін школаларда алынҷа класстарнаң на таныхтирға чарадылча.
Санитарнай имҷілернің танығларынаң, республикада ОРВИ-наң ағырчатханнарның саны ӧсчеткенде, ол эпидемия синін ас парыбысхан, ол 24 %-ке тиңнелче. Ағбанда кискектепчеткеннернің саны 64 %-ке ӧс партыр. Грипптең тоғыр прививка ӧӧн город чуртағҷыларының 35%-і-не ле турғызылтыр, республика чуртағҷыларының -37 %-іне. Пістің регионда гриппнең 17 кізі ағырыбысханы ілезіне сығысхан. Декабрьда Хакасияда ковидтең паза грипптең дее тоғыр прививка турғызарынҷа планны толдырыбызарға прай чоннаң кӱстенерге кирек тіп таныхтааннар чыылығ араласчылары.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде