ОРВИ-наң АҒЫРЧАЛАР
08.12.2021
Хабарлар
Штаб чыылии. Оперативнай штабтың теестегі чыылиин Хакасия пазы Валентин Коновалов видеопалғалыс пастыра иртірген
ОЛҒАННАР
ОЛҒАННАР
Ирткен суткадағы танығлардаң, республикада коронавируснаң 152 кізі ағырыбысханы ілезіне сығысхан. Хазыхтанып алғаннарның саны 498 кізее тиңнелче. Пӱӱл тиксі Хакасияда наа чуғынҷах ағырыға хаптырғаннарның саны - 33322 кізі. Имҷілер хайиинда 3939 кізі, олар ағырчатхан кізінең пір чирде полғаннар. Ибде наа чуғынҷах ағырығдаң 3995 кізі имненче, стационарларда - 998 чуртағҷы, ИВЛ-да - 22 кізі. Чыл пасталғаннаң «коронавирус» диагнозтығ 1325 республика чуртағҷызы ӱреен, ирткен суткада - 8 кізі.
Пӱӱнгі кӱнге имнег учреждениелерінде наа чуғынҷахнаң ағырчатханнарға 1251 орған кӧріл парған, 1062 орғанда кізі чатча, 189-зы пос. Андағ оңдайнаң, республиканың имнег тураларында коронавируснаң ағырчатханнарға кӧрілген орғаннарның 18 проценті пос.
Амды Хакасияда коронавирустаң тоғыр вакцинаның пастағы чардығын 243301 кізі турғыстырып алған, ікінҷі чардығын - 177251 чуртағҷы. Ревакцинацияны 29632 чуртағҷы иртібіскен. Республикада коронавирустаң тоғыр прививка турғызары узарадылча, вакцинация иртер пункттарның хайда орныхчатханын Хакасияның хазых хайраллаҷаң министерствозы сайтында кӧріп аларға чарир. Чонның пӱкӱлее иммунитеді тӧстелер ӱчӱн, республика чуртағҷыларының 80 %-і прививка турғыстырыбызарға кирек. Пістің республикада амғы туста кӧрілген планнаң 66,2 процент чуртағҷы вакцинация иртібіскен. Ідӧк амды кискектең тоғыр прививка турғызылча.
Хакасияның хазых хайраллаҷаң министерствозы искіриинең, республикада олғаннарның аразында ОРВИ-наң ағырчатханнарның саны кинетін ӧс парыбысхан. Пір неделя аразына ағырчатханнарның саны ікі хати ӧс парған.
Уламох оой нимес киректер Ағбанда, Харатаста паза Саяногорскта. Хығыртығларның саны хозыл парғанда, имҷілер дее паза оларны тарт чӧрҷең машиналар даа чидіспинібіскен. Хакасия пазы республиканың ис-пай паза чир хайызығлары, транспорт паза чол хонии министерстволарына имҷілерні тарт чӧрерге автомобиль суриин пӧгерге чахаан. Ідӧк Валентин Коновалов хазых хайраллаҷаң министерстваа кадрлар суриин пӧгерінҷе тоғыс апарарға чахығ пирген. Ідӧк оперативнай штабта искірілген, Хубачардағы имнег туразында олғаннарға чуғынҷахтаң имненҷең 15 орған, республиканың чуғынҷах ағырығлар имнег туразында 30 орған тӧстелер.
Оперштаб араласчылары республика чуртағҷыларына, пос салынмин, Роспотребнадзорның чахығларына тудынарға чахааннар. Кӧп чон чыылысчатхан орыннарда имнег масказын кизерге, удур-тӧдір оортах тудынарға. Республика санитар-эпидемиология оңдайынаң табырах сығып алар ӱчӱн, чуртағҷыларға, коронавирустаң тоғыр вакцинация иртіп, чонның пӱкӱлее иммунитедін тӧстирінде ӧткін аралазарға чӧп пиргеннер.
Автор :
Наталья ЧЕБОДАЕВА
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
