ӰЛӰКӰН ОСХАС ФЕСТИВАЛЬ
01.12.2021
Хабарлар
«Азия ӱні-2021». Национальнай сарыннар фестивальы пӱӱл Россия синінде пастағызын на иртті. Анда хазнаның аймах регионнарының ырҷылары араласханнар
Тӧстегҷілер пастап аны, «Кочевник ӱні» адап, регион синінде ле иртір турғаннар. Анда Тыва, Алтай паза Хакасия республикаларының национальнай сарыннарны хайлап толдырчатхан чайаачылары араласханнар.
- Соонаң піссер килер кӧңніліглернің саны хозыл сыххан. Оларны хығырбин салзабыс, тың хомзынчалар. Аннаңар пу чыл фестивальны, «Азия ӱні» адап, Россия синінде иртірерге чаратхабыс, - чарыт пирген ӧӧн тӧстегӌі Тимур Тюкпеев.
Чоохтирға кирек, «Азия ӱні-2021» фестивальны иртірерге Хакасияның культура, ӱгредіг паза наука, национальнай паза территориальнай политика министерстволары, С.П.Кадышевтің адынаң культура кіні хабасханнар.
Аалӌылар Татарстаннаң, Саха (Якутия), Тыва, Алтай республикаларынаң, Новосибирск паза Кемеров областьтарынаң килгеннер.
Равза Тихомирова Татарстанның саблығ артизі полча. В.Г.Чаптыковтың адынаң Хакас филармониязының сценазынзар ол ікі сарыннаң сыххан. Пірсі «Туғаннар» адалча. Кемнердеңер чоох парчатханнаңар сах андох пілдістіг пол парча. Татарларның тілі пістине тӧӧй нооза. Кӧрігӌілер аны айа сабызынаң матап удурлааннар. Ол пу фестивальда ідӧк Новосибирск облазы ӱчӱн турысхан.
Кемеров облазыңдағы искусство институдының студенті полчатхан алтайлар оолғы Адель Баталов национальнай эстрада сарыннары концертіне килген чонның кӧңнін уламох кӧдірген. Чиит ырӌының пос тілінең толдырчатхан сарыннарың истіп паза сценада тудынчатханын кӧріп, залдағылар, одырчатхан орыннарыңаң турып, теелбектенерге дее сығыбызарға тимде полғаннар. Оларның ізіг айа сабызы ӱзілбинчеткен. Гала-концертті иртірген Радж Мандаржап сах андох хормачыланыбысчатхан: «Аны тойларға, тӧреен кӱннерге хығырарға сағынчатсаңар, айланыңар минзер - телефонын сурап пирербін!»
Айат Канысовтың тӧреен-ӧскен чирі ідӧк Тағлығ Алтай. Че пӱӱнгі кӱнде ол Хакасияда чуртапча. Ағбандағы искусство институдының студенті пістің республикада чурттығ алтай чонның пірігізінің араласчызы полча. Ол «Азия ӱні» фестивальда позының диаспоразы адынаң сценаа сыххан.
Алынӌа чоохтирға кирек Алтай Республикадағы Кош-Агач аалдаң килген «Эре чуй» фольклор ӧмедеңер. Пӱӱнгі кӱнде пу ӧме «Чонни» аттығ полча. Алтай ооллары хакасиядағыларны чайаачыларынаң ідӧк матап морсыңдырғаннар.
Айат Канысов паза «Эре чуй» ӧме пу чыл Россия синінде ирткен «От ыры» этническай сарыннар фестивальында араласханохтар.
Амды «Азия ӱні» фестивальға Тывадаң килген устарнаң танызып алыңар.
Сайзана Сюрюн - Тыва Республиканың саблығ артизі. Ол пу региондағы «Саяны» кӧг паза теелбек театрында тоғынча. Хакасиядағылар аны 2021 чылда Россия синінде ирткен «От ыры» этническай эстрада сарыннары фестивальының Гран-при чиңісчізін чіли таныпчалар.
Паза «Азия ӱні» фестивальда, сыйых иткен оңдайнаң, аның іҷезі Галина Сюрюн хакас сценазынзар сыххан. Ол ідӧк Тыва Республиканың саблығ артизі полча.
Тываның Хызыл городындағы А.Б.Чыргал-оолның адынаң искусство колледжінде тӧстелген «Хамнаарак» вокал-фольклор ӧмезінің чииттері чайаачыларынаң чапсытханнар. Тывадағылар, ползыннар олар улуғ опыттығ чайаачылар алай наа ла пастапчатханнар, полған на сай хайлапчатханнарынаң чӧпсіндірчелер нооза. Мында даа студенттер пос оңдайли хайлааннар.
Саха (Якутия) Республикадаң килген Мария Тихонова, тізең, тимір хомыснаң морсымнығ ойынынаң чонны ӧріндірген. Чоохтирға кирек, чиит чайаачы, пу кӧг тириинең узын кӧзідіп, хазна синіндегі, чоннар аразындағы марығларда тӧреміл лауреат атха турысча.
Хакасиядағылардаңар чоохтаза, «Азия ӱні-2021» фестивальда Татьяна Балахчина, Дарья Тачеева, Ольга Мистрикова, Аржан Туденев араласханнар. Пу чииттер республика синіндегі, регионнар аразындағы марығ-пайрамнарда полған на сай аралазадырлар, полған на сай лауреаттар паза дипломанттар полыбысчалар. Пу фестивальда ідӧк «Иренек хан» ӧме араласхан. Че кӧрігҷілернің хайиин чон алнынзар пастағызын на сыххан «Архай» ӧме тартхан. Ол тӧстелгеннең пеер пір ле чыл ирт парды. Аның хоос устағҷызы Аржан Туденев полча. Ачырғасха, ӧмедегі иреннернің пірге хайын газета пастыра толдыра чарыт полбас. Оларны пос хулаанаң алай видео пастыра истерге кирек. Пос оңдайли толдырылчатхан хай андада ла чӧпсіндірче. Устағҷының искіриинең, тӱрчедең «Архай» ӧменің пастағы клибі сығарылар. Андада, презентация соонаң, піске дее чахсы оңдай полар хығырығҷыларны аның араласчыларынаң чағын таныстырарға.
Тиксі чоохтаза, «Азия ӱні» национальнай сарыннарның Россия синіндегі пастағы фестивальы турыстыра ирт парған. В.Г.Чаптыковтың адынаң Хакас филармониязының хоос устағҷызы Артур Марлужоков, прай араласчыларға дипломнар паза сыйыхтар читіріп, пу фестиваль мыннаң мындар тиліп ле одырзын тіп алғаан.
Республиканың культура учреждениезінің улуғ залында национальнай эстрада сарыннарына хынчатхан чон Хакасияның аймах пулуңнарынаң чыылыс парған. Мындағ оңдайнаң, кӧрігҷілер амғы олаңай нимес туста постарына ӱлӱкӱн идіп алғаннар, оларға ӧрініс сыйлаан артисттерге ідӧк улуғ алғыстарын читіргеннер.
Автор :
Александра КАРАМЧАКОВА
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
