Кемге тоғынарға чарир алай хайди идiнҷекке тоғызын нааҷылирға?
10.11.2021
Хабарлар
Киҷее, кiчiг хырлас айының 9-ҷы кӱнiнде, Хакасия правительствозының паза экономика тилiзi министерствозының кiзiлерi «Хакас Республиканың бизнезiнiң хатығластар соондағы тоғызы» сурығҷа брифинг иртiргеннер. Республиканың экономика тилiзi министрi Виктор Богушевич пу неделяда ас-тамахтаң пасха ниме-нооларның садығ тураларына паза аймах полызығлар читiрчеткеннерге, iдӧк чонны азырапчатханнарға тоғынарға чарадылчатханнаңар искiрген. Че пастап оларға ӧменiң иммунитет паспортын толдыр саларға кирек.
Хакасия правительствозының сайтында паспорт кӧрiмi тынағ кӱннеріндöк сығарылған. Хакасияның экономика тилізі министерствозының тоғынҷылары понедельникте тоғысха сыхханнарында, 200 азыра паспорт кiргенiн таныхтааннар. Киҷее сыныхтаға ызылған паспорттар саны 400-ке чит парған, ол санда ас-тамахтаң пасха ниме-ноо садығ тураларынаң 365 айланыс, чонны азырапчатхан предприятиелердең – 42.
Наа кiрген паспорттарның чардығы иргi полтыр, идiнҷектер, наа кӧрiмнi аспин даа, иргi паспортты ызыбыстырлар. Сын нимес искiрiг кирiлген алай кирексiнiстерге килiспинчеткен паспорттар идiнҷектерге паза юридическай лицоларға нандыра ызылча, оларның тӱзедiглер кирерге пiр неделя пар. Ол туста тоғынарға чарир, че сыныхтағ килзе, паспорт толдырылғанын паза кӧстеглiг ӱлгӱ органына ызылғанын киречiлирге килiзер. Киречiлеп полбаза, пос киреенең айғасчатханнарны хатығластар сағыпча: Россияның административнай кодексiнде идiнҷектерге штраф 30-50 муң салковай синiнде кӧрiл парған, юридическай лицоларға – 100-300 муң салковай.
– Паспорттарны толдырарға сидiк нимес, прай ниме пiлдiстiг паза чарыда тимнелген, - тiпче Виктор Богушевич. – Ӧӧнi кирексiнiстернi толдырарға. Мин прайзына тiпчем, пiске пiр ай хатығ оңдайларда чуртап парыбызарға кирек, ағырығдаң озып алар ӱчӱн. Хайраллалар позыбысты, сағыналар таңдағызынаңар. Пӱӱнгi кӱнде республиканың хазых хайраллаҷаң учреждениелерi уғаа хатығ оңдайларда тоғынчалар. Коронавирусха хаптырғаннар аардаң аар ағырчалар, кислород кӧптең кӧп киректелче.
Виктор Николаевич, чуғынҷах ағырыға хаптырып, тоозылғаннар саны ӧсчеткенiн таныхтабаан. Кӱннiң коронавирустаң ӱрепчеткеннер парын, оларның санын кӧрерге изi чох пiлдiрче. Пу неделяның пастағы кӱннерi хомай хабарлар санынаң соона халбинчалар: понедельникте 6 кізі коронавирустаң тоозылғаны киречілелген, киҷее – 10, пӱӱн – 13.
Амды полған на ӧмее позының иммунитедiн тӧстир син 60%-тең 80%-ке ӧскiрiлген, ол санға коронавирустаң ағырғаннаң чарым чыл ирткелек тоғынҷылар паза пу чуғынҷах ағырығдаң тоғыр прививка турғыстырғаннар кiрчелер. Хазии хоостыра прививка турғыстырарға чарадылбинчатхан пiчiктiг тоғынҷылар ол санға кiрбинчелер. Аннаң пасха садығ тураларында тӧрт квадрат метрде пiр кiзее чӧрерге чарир.
Чуртағҷылар, тiзең, чон азыраҷаң орынзар, спортзал алай пiрее ӱтертiс орнынзар парчатса, коронавирустаң тоғыр прививка итiрген киречiлепчеткен QR-кодты кӧртiзерге тимде поларға киректер. Пу орыннарда аны хайди даа сурарға киректер.
Хабарҷылар идiнҷектер толдырар кирексiнiстердең пасха, iдӧк республика синiнде оларға пирiлер хабазығдаңар сурғаннар. Виктор Богушевичтiң искiриинең, Хакасия пазы Валентин Коноваловтың чахиинаң кӧстеглiг министерство республиканың идiнҷектерiне хабазар оңдайны тимнеп салған. Хакасия пазы ол пічікті Москвазар тоғыс чорығы соонаң кӧрер. Килчеткен понедельникте пiлдiстiг полар, нименең хабас полар республика пiстiң идiнҷектерге. Сағам, тiзең, оларға айландырылбас грантнаң тузаланарға чӧптепчелер. Аны Россия президентi ирткен неделяны тоғынмаҷаң кӱннер чарлаанында кирген. Идiнҷекке пирiлер грант ахчазы анда тоғынчатханнар санынаң палғалыстығ. 2021 чылда иң тӧбiн чал ахчазы 12 792 салковайға тиңнелче. Ол син ахча пiр тоғынҷаа саналар. Идiнҷек iдӧк тоғынҷы санына кирiлче. Аннаң пасха ӱреге кiрген идiнҷектернiң тӧбiн проценттiг кредиттер алҷаң оңдай пар. Оларны алар ӱчӱн, Россияның банктарынзар паза Хакасияның гарантия чыындызы – кiчiг кредит компаниязынзар айланарға чарир.
Брифингтiң хысха салтарларын идiбiзербiс:
- локдаун соонаң идiнҷекке паза юридическай лицоға тоғысты пастир ӱчӱн, ӧменiң иммунитет паспортын ӱлгӱ органнарынзар ызарға кирек. Пiчiктер сыныхталчатхан туста тоғынарға чарир;
- идiнҷектерге ӧменің иммунитет паспортын Хакасияның экономика тилiзi министерствозынзар алай орындағы пос устаныссар пирерге кирек.
Пiчiктернi электроннай почтаҷа ызарға алай посха ағыларға чарир;
- паспортта пӱӱнгi кӱннiң кирексiнiстерiне килiстiре искiрiг пирiлерге кирек;
- паспортта идiнҷек, юридическай лицоның устағҷызы хайди даа хол саларға кирек;
- саба алай сын нимес искiрiг кирiлген паспорттар нандыра айландырылча, аны тӱзедерге пiр неделяҷа ла пирiлче;
- культура, спорт учреждениелерi, ӱтертiс орыннары паза чон азыраҷаң предприятиелер чуртағҷылардаң хайди даа прививка итіргенінің QR-кодын сурарға киректер;
- ӱреге кiрген идiнҷектерге хоза хабазығдаңар килчеткен неделяда искiрiлер.
Хоза сурығларҷа Хакасияның экономика тилiзi министерствозынзар пу телефонҷа сығдырадарға:
8(3902) 248-200.
Тиксi алза, устағҷылар, республиканың имнег учреждениелерiнiң тоғызынаңар сағыссырап, пос чуртазын хайраллап, андар-пеер тың чӧрбин, пiрее айҷа сыдазарға сурынчалар.
Автор :
Наталья Субракова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
