ТИЛЕКЕЙ МАРИИНЫҢ ХАКАС ПРИЗЕРЛАРЫ
10.11.2021
Хабарлар
Поғдархас. Хакас кӱресчілер Артур Чебодаевнең Мария Тюмерекова тилекей первенствозында сыйыхтығ орыннарға сыхханнар
Ирткен неделяда Хакасия чуртағҷыларының прай сағызы локдаунда полған полза, спорт кӱрезіне хынчатханнар тилекей первенствозынаң чуртааннар тиирге чарир. Анзы тиктең нимес. Россия командазы ӱчӱн чир-суғҷыларыбыс Мария Тюмерекова паза Артур Чебодаев турысханнар. Марығ 1 - 7 ноябрьда Белградта ирткен, анда 23 часха читкелек улус узын кӧзіткен.
Пастап кибіске грек-рим кӱрезінең айғасчатханнар сыхханнар. Оларның салтарлары хомай нимес. Спортсменнер 9 медаль холға киргеннер: 4 алтын, 1 кӱмӱс паза 4 хола. 3 ноябрьдаң хыстар харбасханнар. Чоннар аразындағы класстығ спорт узы Мария Тюмерекова 50 кг кӧдірімде кӱзін сынаан. Хакасияда аны таныбинчатхаң кізі чоғыл даа, неке. Таланттығ хыс Таштып аймааңдағы Аңчул аалдаң. Пастағы тренері - Юрий Тюмереков. Чир-суғҷыбыс Россия, Европа первенстволарында, чоннар аразындағы турнирлерде тӧреміл чиңіс тутча. Кӧзідімге, пӱӱл Македонияда ирткен Европа первенствозында Мария алтын медаль утып алған. Ол илееде тус тренер Владимир Чучуновтың холында узын таптаан, 2021 чылдаң Кемеров облазы ӱчӱн турысча.
Тилекей первенствозынзар айланза, марығның тӧртінҷі чардығында пістің хыс, Канададағы спортсменнең тоғазып, аңы 10:0 саннаң утып алған. Че чарым финалда ағаа оң полбиндыр. Индиядағы кӱресчі Шиваңи Павар чир-суғҷыбысты ікі чарынға сал салған. Азах метке сых полбаанда, Мария Тюмерекова хола медаль ӱчӱн харбасхан. Анастасия Янотованаң (Белоруссия) хабыс хакас хыстың чиңізінең тоозылғаң, саң - 10:0. Тиксі алза, абахай кӱресчілер читі медаль утып алғаннар: 5 кӱмӱс паза 2 хола. Итсе-де, первенствода япон чонның хыстары араласхан полза, салтарлар тӧбін арах поларҷых, неке. Пӱӱнгі кӱнде ипчілер кӱрезінде олар иң кӱстіг спортсменнерге саналчалар.
5 ноябрьда олаңай кӱресче марығлар пасталғаннар. Араласчыларның санында хакас оол Артур Чебодаев. Аннаңар хысхаҷахти чоохтап пирерге кирек. Спортсмен 1999 чылда мартта Асхыс аймаандағы Пилтір аалда тӧреен Артур спортха хынчатхан сӧбіредең. Пабазы Сергей Чебодаев - олаңай кӱресче СССР-ның спорт узы. Хомзынысха, ол час чазабаан, палалары кічіг полғанда, ах чарыхтаң парыбысхан. Улуғ харындазы Леонид пӱӱл октябрьда Италияда кикбоксингче тилекей чемпионадында чиңіс тутхан. Туңмазы Олимпия кӱреснең айғасча, пылтыр Россияның спорт узы нормативің толдырыбысхан. Ағбандағы олимп резерві училищезің тоозып, хакас хыс пілізің Хакас хазна университедіңде алғытча. Артурның паза Олимпияның тренері - Владимир Архипович Толмачев. Аның холында ідӧк харындас пиҷенің пабазы узын таптаан.
Артур олаңай кӱресче секцияа 2-ҷі класста ӱгренчеткеңде килтір. 6-ҷы класс соонда В.А.Толмачев оолағасты Асхыстағы кир салғаң. Анда спорт клазын асханнар. Палалар тренерлер Алексаңдр Майңагашевтің паза Виссарион Кольчиковтың устаанынаң харбасханнар. 9-ҷы класс соонда Артур Чебодаев Хызылчарзар ӱгренерге парыбысхан. Амғы туста чир-суғҷыбыс В.П.Астафьевтің адынаң педагогика университедінің студенті. Аның тренері Виталий Михайлович Кудрявцев полча. Спортсмен 57 - 61 кг кӧдірімнерде харбасча.
1 - 3 октябрьда Россия первенствозында чиңіс тутхан. Пу чидіг хакас оолға тилекей первенствозында аралазар оңдай пирген. Марығ тузында Артур Чебодаев пис хабыста аралазарға маңнанған. Иң сидік финалның сигізінҷі чардығы полтыр. Чир-суғҷыбыс, Нино Лейтертке (Швейцария) 1:6 саннаң утырчадып, «ыырҷызын» 10:6 саннаң чиңіп алған. «Ағырчатхан» улус чарым финал тузында тың чӱрексіптір. Че Моол чиріндегі спортсменнең хабыс 5:3 саннаң тоозылған. Азах меетте пістің оол Арсен Арутуняннаң (Армения) тоғасхан. Утыр салған даа полза, ол «ыырҷызына» матап удурласхан. Сан - 7:11. Артур Чебодаев - тилекей первенствозының кӱмӱс призеры. Олаңай кӱресте Россия командазының алты медаль: 2 алтын, 3 кӱмӱс, 1 хола.
Марығ тузында чир-суғҷыбыс улуғ нимес интервью пирген. Артурның таниинаң, чидіглерге чидерге ағаа пик хылии паза Владикавказсар сборларға чӧргені полысхан. Пістің кӱресчілерге Кавказта сборлар иртірілген полза, арса олар ідӧк чахсы харбазарҷыхтар?
Пандемия тузында даа чуртас парча, марығлар иртірілче. Спортсменнерге наа чидіглер алғапчабыс, олар пісті аннаң андар сіліг кӱреснең ӧріндірерлер тіп ізенчебіс.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
