АҒБАН - КӦК ХАЙА ЧОЛ ТЫХТАҒ СООНАҢ
10.11.2021
Хабарлар
Чоллар. Кічіг хырлас айының 8-ҷі кӱнінде Ким суғ кизіре тахтаҷа Ағбан - Кӧк хайа чол чӧрізі тыхтағ соонаң азылған
АҒБАН - КӦК ХАЙА ЧОЛ 2019 ЧЫЛНЫҢ ОТ АЙЫНДА РЕСПУБЛИКАНЫҢ ХОЛЫНА ПИРІЛГЕН. ОЛ ТУСТАҢ ХАКАСИЯНЫҢ ТРАНСПОРТ ПАЗА ЧОЛ ХОНИИ МИНИСТЕРСТВОЗЫ АНЫ ТЫХТИР СУРЫҒНАҢ АЙҒАС СЫХХАН. ТЫХТАҒ ТОҒЫСТАРЫ СЫБЫРА ИРТІРІЛГЕН ДЕЕ ПОЛЗА, ЧОЛ ТЫҢ ИЗЕЛЧЕТКЕН.
Пылтыр «КрайСтройПроект» подряд организациязы тыхтағ тоғызын иртіреріне проект-смета пічиин тимнебіскен. Істезігліг тоғыстар иртірілгенде, асфальт алтындағы чир ӧллелчеткені сығысхан, аннаңар сыбыра изелчеткен.
Чолны «ДСП-8» паза «ДСК-7» ООО-лар тыхтааннар. «ДСК-7» подряд организациязының директоры Тамази Сиукаев хайдағ тоғыстар толдырылғаннаңар чоохтап пирген:
- Піс «ДСП-8» подряд организациязынаң хада тоғынғабыс. Тыхтағ тоғызын пір айға орай, 1 июльда ла, пастаабыс. Маңнанар ӱчӱн, 21-22 часха теере тоғынғабыс. Прай 60-ча кізі істенген, піреезі хазылған чирні сығара тартхан, хайзы хайаларны тӧзеен хайзы - асфальт.
Асфальтты паза аның алтындағы 9 метрге теере тирең чирні хазып алыбысхабыс. Прай 34 муңча кубометр чир сығара тартарға киліскен. Чирнің орнына хайалар тӧзеебіс. Хайалар ӱстӱнде сай, анаң асфальт тӧзелген.
Чол алтында наңмыр суун ағысчаң трубалар салылған. Чолның сол саринда суғ ағысчаң хутухтар турчалар.
Андағ пис хутух иткебіс. Чолның 510 метр кизегінде (4500 квадрат метр) асфальт тӧзебіскебіс. Ідӧк чол хастада сиденнебіскебіс.
Ідӧк тірӧстерні хыйа алыбызып, анаң нандыра турғыс салғабыс. Оларны пос ахчазына сырлабысхабыс.
Хакасияның транспорт паза чол хонии министрі Дмитрий Василиадинің чооғынаң, чол алтында суғ ағысчаң трубалар полған полза, ол изелбесчік. Тимір чол алтында андағ трубалар пар, андартын суғ чолзар ағып, чол алтындағы чирге сиип парӌаң, аннаңар ол изелӌең.
- Чолның пу кизегін ай сай тыхтаза даа, кирек алыспачаң Пӱӱнгі кӱнге мында суғ ағысчаң ікі труба салылған паза чирнің орнына хайалар тӧзелген. Чол кӧмес одырыбызарынаң хорғыс пар. Ол 3 чылға гарантияда, аннаңар асфальт чіктел парза даа, подрядчик тӱзедіглер идер. Чолның ӧӧн чардығы хайтпас.
Пу чолны пӱдірчеткенде, алтында суғ ағысчаң трубалар салыбысхан ползалар, мындағ даа кирек полбасчых, - теен Дмитрий Пантелеевич.
Ағбан - Кӧк хайа чолның ікі кизегін тыхтирына республика бюджедінең 116 млн салковай позыдылған. Чол чӧрізі чабылған. Минсуғдаң Ағбанзар чонны автобустығ тарт чӧрчеткен идінӌектер чол чабыл парған туста билет паазын 60 салковайдаң 80 салковайға ӧскірібіскеннер. Амды кізілер чӧріс паазы тӱс парарына ізенчелер. Идінӌектернің пірсі Юрий Шпиндлер билет паазы алыспазын чарыт пирген.
- Мин Минсуғ - Ағбан 120 номер маршруттың ээзі полчам. Піс, перевозчиктер, чол тыхтал парарын чарым чыл сағаабыс. Ким суғ кизіре тахта чабыл парар алнында билет паазы 60 салковайға турған. Пу тусха ГСМ паазы 12 %, хоза частьтар паазы 30 % ӧс парған. Пассажирлер дее асхынах арах чӧрчелер. Аннаңар билет паазы ӧскені экономика киреенең палғалыстығ, - теен Юрий Шпиндлер.
Чол азылғанында Хакасия пазы Валентин Коновалов араласхан.
- Хоптар кӧп полған. 2019 чылда чолны наачылирдаңар чарадығ алылған. Улуғ тоғыс иділ парғаң кӧп ахча хорадылған. Пӱӱнгі кӱнге чол хайдағ поларға кирек, іди тыхталған. Амды республиказар кір четкен чол иптел парды, - таныхтаан Валентин Коновалов.
Автор :
Оксана ЧЕЛТЫГМАШЕВА
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
