РАДИОЛОГИЯ КОРПУЗЫ ТИМГЕ СЫХ ПАРИР
08.10.2021
Хабарлар
Нацпроект. Хакасия пазы Валентин Коновалов онкология диспансерінің радиология корпузы пӱдіриин сыныхтаан
Наа объект Ағбанда Цукановтың орамазының 173Б туразында орныхчатхан онкология диспансері хыринда пӱт тее парды, аның улии 4300 квадрат метрге тиңнелче. 1 миллиард азыра салковайға пӱдірілген корпус «Хазых хайраллиры» национальнай проектке кірче.
- Пӱӱнгі кӱнде корпустың ибіркізі иптелче, - чарытча регион пазы Валентин Коновалов. - Октябрь айда имнег оборудованиезі турғызылар: рентген аппарады, компьютер томогравы, МРТпаза пас-хазы. Мебель кирілер. Анаң радиология корпузы пастағы кізілерні имнирге тимде полар. Радиология корпузы - республикаа уғаа кирек объект. Хакасияның чуртағҷылары аның пӱдірпин чылларнаң сахтааннар. Амды пӧзік технологиялығ имнег полызии пістің республикада пиріл турар. Аннаң ідӧк Тува Республиканың паза Хызылчар крайының чуртағҷылары тузаланарлар.
Подрядчик пӱдіріг тоғызын тузында толдырча. Амды радиология корпузы 80 %-ке тимде. Прай кирек чахсы парза, объект пӱӱл халғанҷы айларда ізиин азар. Чағдапчатхан 2022 чылның пастағы кӱннерінде ол, кізілерні имнеп, толдыразынаң тоғынар.
Пӱдірілчеткен радиология корпузынзар хоза специалисттер алылар, ӧӧнінде физиктер. Олар ядернай радиологияны ӧтіре пілерге киректер. Таныхтирға кирек, специалисттер тоғынарға тимделер, ӧнетін ӱгредіг ирткеннер. Ідӧк радиология корпузында наа имҷілер тоғынарлар. Специалисттерге чурт алылған, аннаңар наа орында істенңең имҷілер пар.
Наа объектті кӧрген соонаң Хакасия пазы Валентин Коновалов паза хазых хайраллаҷаң министр Олег Ананьевский корпус тастында клён ағастың хорбыларын одыртханнар.
Автор :
Татьяна ТЮТЮБЕЕВА
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
