Республикаа хара тас аныпчатхан предприятиелерін хайраллап халарға кирек
05.04.2024
Хабарлар
Тоғазығ тузында
Ӧӧркі Чӧп. Хакасияның Ӧӧркі Чӧп кнезі Сергей Сокол республиканың хара тас аныпчатхан предприятиелері устағҷыларынаң тоғасхан
Экономика киреендегі сидіксіністер сылтаанда разрезтер хара тас анир оңдайларынаң чарым кӱзінең не тоғынчалар, паза полбаста тоғынҷыларын отпускка ысчалар.
Пӱӱнгі кӱнде республикада хара тас аныпчатхан сигіс предприятие тоғынча, оларда Хакасияның пис муңҷа чуртағҷызы істенче. Тимір чолҷа таарлағ тартары хызырылғаны паза андағы тарифтер пӧзік полғаны сылтаанда Хакасиядағы хара тас аныпчатханнар Кемеров облазының паза іскеркі субъекттернің разрезтеріне конкуренция ит полбинчалар.
«Ӧӧркі Чӧп предприятиелерге, хайда Хакасияның пис муңа чағын чуртағҷызы істенче, хабазарына прай оңдайларнаң тузаланарға тимде. Хайынмазабыс, піс хара тас анир отрасльны, тоғыс орыннарын паза налогтар кірерін чідір саларбыс», – таныхтаан, тоғазығны пастап, Сергей Сокол.
Регионның хара тас аныпчатхан предприятиелері прайзы даа кӧрілген кӱзінең 40-50 %-іне ле тоғынча. Сидіксіністер хара тасты сығара тартарына гарантия пирілген син хызырыл парған сылтаанда улғаатчалар.
«Кирек хомайланча. Амғы туста президенттің регионнаң іскеркі полигонзар тартарынҷа чахығлары толдырылбинча. Пӱӱнгі кӱнге пастағы кварталҷа Хакасиядаң сығара тартылған хара тас – планнаң кӧрілген синнең ӱс чӱс муң тоннаа асхынах. 1,8 миллион тоннадаң сын саннар 1,5 миллионҷа ла тонна полар тіп сахталча», – чоохтаан «Аршановский» разрезтің толдырығлығ директоры Евгений Юрин.
«Піс аныҷаң синні хызырыбысхабыс. Хакасия налогтарҷа 230 миллионҷа салковай чідір салған. 2024 чылға предприятиеҷе прогноз – 260 миллионҷа салковайға ӱреге кіргені паза налогтар 240 миллионҷа салковайға хызырылғаны. Предприятие амғы туста анып полҷаң оңдайынаң 50 процентінҷе аныбинча, аннаңар ол налогтарҷа саннарны, хайзын мин адаам, ікее хатирға чарир. «Коулстар» компанияның Хакасияда 70 миллиард салковайға турчатхан ікі инвестпроекті. Амғы сидік туста оларны чуртасха кирері тохтадылған», – сағыс-кӧрізінең ӱлескен «Разрез Бейский» компанияның ӧӧн директоры Александр Барский.
Хара тас анирының сині хызырылғаны сылтаанда тоғынҷыларны отпускка ызарға килісче. Іди «Майрыхский» разрезте паза «Гортехмаш» предприятиеде тоғысчы ӧменің чарымынаң даа кӧп чардығы отпускта. Тимір чолҷа таарлағларны тартарына тӧбін оңдайнаң тӧлир коэффициенттерні айландырарға кирек, олар, хара тасха паалар кӧдірілгенде, чох иділгеннер, паза хара тас экспортына кирілген пошлина хоостыра сидіксіністерні пӧгерге.
«Профильліг федеральнай министерстволарнаң тоғынарына пічіктер кирек. Сірердең ӱзӱрігліг кирек пічіктерні тимнеп пирерге сурынчам. «Полған – пол парған – полар», піс правительство пазы Валентин Коноваловнаң паза сенатор Александр Жуковнаң хада Москвада тӧстеністіг чоохтазығ апарар ӱчӱн. Хайди олар чапчаң тимнел парар, ідӧк табырах піс оларны пӧгіп пастирбыс», – тоғазығның салтарын идіп, таныхтаан Хакасияның Ӧӧркі Чӧп кнезі Сергей Сокол.
Сом vskhakasia.ru сайттаң
Автор :
Хакасияның Ӧӧркі Чӧбінің хабарлар пӧлии
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде
