Фермерлерге чарытхыны алар наа оңдайлар
28.03.2024
Хабарлар
Аал хонии. Пии аймаанда регион аал хонииның паза турист индустриязының чарытхыны алар оңдайларына чарыдылған чыылығ ирткен
Чыылығда «Россети Сибирь» – «Хакасэнерго» ПАО-ның, Хакасияның аал хонии паза ас-тамах, экономика тилiзi министерстволарының устағ-пастаа, аймахтардағы аал хонии устаныстарының паза кресен-фермер хоныхтарының устағҷылары араласханнар.
Чыылығның ӧӧн пӧгiнi – чарытхыны алар оңдайларны кӧзiт пирерi, пу проектче пирілчеткен субсидиялардаңар искiр пирерi, фермерлернiң сурығларына нандырары.
Пылтыр чайғызын «Россети Сибирь» компанияның специалисттерiнiң кӱн кӱзінiң тузаланар сыныхтағлығ проектi Пии аймаандағы фермер Виталий Капсаргиннiң хониинда чуртасха кирiл сыххан. Хойбал аал хыринда орныхчатхан фермада кӱн электростанциязы турғызылған.
– Фермер хонииның кирексiнiзiн санға алып, «ЭКС Сибири» компания проекттi тимнебiскен. Виталий Капсаргиннiң кресен-фермер хониинда кӱн электростанциязынаң тузаланғаны хорадығларны тӧрт хати хызырыбызарға оңдай пирген, – теен «Россети Сибирь» ПАО-ның Хакасиядағы пӧлиинiң директоры Николай Шепырев.
Хакасияның аал хонии паза ас-тамах министрi Сергей Труфановтың чооғынаң, Хакасияның фермерлерiнiң андағ кӱн батареяларын турғыс салар оңдай пар.
– Республиканың аал хонии паза ас-тамах министерствозында кӱн чарытхы станциязын аларына хорадығларның чардығын айландырар программа тимнел парған. Фермерлер пу пӧгiнге 95 процент субсидия ал поларлар. Кресен-фермер хоныхтарының чарытхыны мындағ оңдайнаң алар кирексiнiстерi парынаңар пiлчебiс. Турлағларның кӧбiзi ааллардаң оортах орныхча, аннаңар ЛЭП-ты тартар оңдай чоғыл алай ол най аарлыға тур парча. Мындағ оңдайнаң, экономика позының правилоларын кирче, пiс полызарға тимдебiс, – таныхтаан Хакасияның аал хонии паза ас-тамах министрi Сергей Труфанов.
Энергетиктернiң аал хонии паза ас-тамах министерствозынаң хада-пiрге тоғынғаны фермерлер хайиин тартча. Кӧп сурығ пирiлген: чарытхы станциязының иң улуғ кӱзi, субсидияларны аларына хайдағ пiчiктер киректелчеткенi, чарытхы станциязынаң тузаланар тус.
Чыылығ салтарларынҷа фермерлер энергетиктернең паза Хакасияның аал хонии паза ас-тамах министерствозынаң мыннаң мындар хада тоғынарынҷа план тимнелген.
Автор :
Катерина Ерушина
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
