Ӱгретчінің чайаачы чолынҷа
13.03.2024
Статья
Чиңісчілерні сыйыхтаан туста
Марығ
Асхыс аймааның Кызлас аалындағы школада хоос искусствозы урогын кӧп чыл апарған Николай Терентьевич Боргояков. Ол ӱгренҷілерні, сырларнаң орта тузаланып, сіліг хоостирға ӱгретчең.
Ирткен айда Кызластағы школаның пасталығ класстар ӱгретчізі, Николай Терентьевичтің хызы Юлия Николаевна Потнина ӱгренҷілернің аразында хоостар мариин иртірген.
Марығ тузында араласчыларның тоғыстарын ӧнетін чарғыҷылар паалааннар: хоос искусствозы ӱгретчізі Надежда Сергеевна Чанкова, воспитательнай тоғыстарҷа директорның орынҷызы Светлана Семёновна Кичеева, методическай пірігістің устағҷызы Вера Алексеевна Кайдаракова паза пасталығ класстар ӱгретчізі Юлия Николаевна Потнина.
Марығ школада ирткен. Ӱгренҷілерні ӱс категорияа чарыбысханнар: пасталығ, ортын паза улуғ класстар. Олар ікі час хоостааннар. Марығда Кызлас аалның кӧрімін чайирға киректелген, че хайди даа ол орыннар прайзына таныс поларға кирек.
Олғаннар сынап тӧреен аалларының иң таныс пулуңнарын хоостап салғаннар. Кызластағы сууҷах хазында чардылардаң пос иткен стол турча. 11 класстың ӱгренҷізі Любовь Байкара тоғызында аны кӧзіт салған. Аалда марығлар, ӱлӱкӱннер иртірҷең стадион пар. 8 класстың ӱгренҷізі Виктория Байкара ол орынны тӧп-тӧӧй хоостаан. 4 класстың ӱгренҷізі Ольга Доможакова суғ кизіре чатчатхан ағас тахтаҷахты чайап салған. Прайзының даа хоостарында Кызлас аалны чахсы танып аларға чарир.
Николай Терентьевич школадаң тынаға 2022 чылда парыбысхан. Пӱӱнгі улуғ класстардағы чииттер аның холында ӱгренерге маңнанғаннар, аннаңар кӱстіг ӱгретчі артыс пирген пілістерінең тузаланчатханнары іле пілдірче.
Чиңіске сығып алғаннар: (1 – 4 класстар) І орын – Алла Торокова, ІІ орын – Валерия Кайлачакова, ІІІ орын – Ольга Доможакова; (5 – 7 класстар) І орын – Яна Бурнакова, ІІ орын – Иван Аскараков, ІІІ орын – Роман Чанков; (8 – 11 класстар) І орын – Любовь Байкара, ІІ орын – Виктория Байкара, ІІІ орын – Дарья Пакачакова. Юлия Потнина оларға ахчалығ сыйыхтар читірген: І орын ӱчӱн 2000 салковай, ІІ орын – 1500 салковай, ІІІ орын – 1000 салковай. Хайди ол таныхтаан, пу марығ мыннаң мындар узарадылар.
Кӱстіг ӱгретчі Николай Терентьевич Боргояков Ӱс чул аалда тӧреен. Хызылчардағы аал хонии институдын тоозыбызып, пастап Кызласта мал имҷізі полып тоғынған. Анаң Ағбанда, хоза ӱгреніп, ӱгретчі специальнозын алған. Школада, черчение, істеніс, ИЗО предметтерні апарып, отыс чылҷа тоғынған. Позы кічігдең сығара чахсы хоостаҷаң. Пілізін ӱгренҷілеріне артыс саларға тың кӱстенҷең.
«Хоостапчабыс» рубрикада піc Кызлас аалдағы школада ирткен марығның хоостарын пирчебіс.
Сом Кызластағы школаның архивінең
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
