Пiстiңнер – Россия чемпионнары!
01.03.2024
Хабарлар
Апчанайдағы школаның чиңісчі командазы
Спорт. Пу кӱннерде Нижний Новгород облазында ирткен «Мини-футбол – в школу» тиксі Россия синiндегi проекттiң марығлары тоозыл пардылар
Мини-футболҷа тиксі Россия марығлары Нижний Новгород облазының Большой Суходол аалында ирткеннер. Анда хазнаның аймах регионнарынаң 12 команда кӱстерінең паза чапчаңнарынаң сынасхан. Хакасиядаң ікі команда араласхан.
Полтах аалның хызыҷахтар командазы ӱчӱн Людмила Какаякова, Наина Какаякова, Наталья Тумоякова, Амели Гринчук, Айселина Боргоякова, Илона Мамышева паза Анастасия Мамышева турысханнар. Олар 2006-2007 чылларда тӧрееннер категориязында марығласханнар. Оларның тренері – Юрий Аёшин.
Апчанай аалдағы хызыҷахтар 2008-2009 чылларда тӧрееннер категориязында республика алнын алғаннар. Командаа Оксана Чучунова, Юлия Кулимеева, Екатерина Тюмерекова, Яна Чебодаева, Аима Патачакова, Кристина Сагатаева паза Динара Сербигешева кірчелер. Тренер Валентин Тормозаков полча.
Истегі ортымах школаның хызыҷахтары, хазыр ойыннарда пик хылыхтарын кӧзідіп, кӱмӱс медальлар холға киргеннер. Иң артығы Наина Какаякова полыбысхан.
Хызыҷахтар устарын чахсы кӧзіткеннер, сыйыхтығ чиңіс тударына прай кӱстерін салғаннар. Анзын Апчанай аал командазы киречілепче. Группадағы ойыннарда чир-суғҷыларыбыс, Москва паза Ростов облазы командаларынаң тоғыр турызып, ізестіг чиңіс тутханнар. Че иң чӱрексіністіг паза хазыр финал ойыны полған. Пістің ӧмедең тоғыр Ставрополье крайындағы Новкус-Артезиан аулның командазы турысхан. Полған на футболист чиңісті «ыырҷаа» пирбес ӱчӱн прай кӱзін салған. Чӱрексіністіг тустарда, пенальти турғызылғанда, трибуналардаң «Хакасия!!!» тiп хысхырысчатханнарын истерге чапсых полған. Тренер паба чіли ӱгренҷiлерiнiң чиңіс тудар кӧңнін кӧдірген. Кирек туста оларны хырызыбысчаң даа, анзы пістің хызыҷахтарыбыстың хылиин уламох пиктеен.
Пістің командабыс, «ыырҷыны» постың хаалхазынзар чағын итпин, ойын площадказынҷа орта чӱгӱріс чӧрген. Ставрополье крайы командазының пірее футболизі меспекті тудып алза, хызыҷахтарыбыс аның алнынзар уламох пик турыбысчаңнар. Хайди таныхтаан комментатор, пістіңнер меспек чох хыйға ойын апарғаны махтаға турыстығ. Апчанайдағылар, 2:1 саннығ чиңіс тудып, алтын медальлар холға киргеннер. «Иң артых ойынҷы» атха Оксана Чучунова турысхан.
– Хайди полза алтын медальларны холға кирдiбiс. Анзына тың ӧрiнчебiс! Пiс ағаа ӱр читкебiс, кӧп кӱс хоратхабыс. Алында пасха марығларда утчаңмыс, че пу чиңiс пастағызы ла чiли пiлдiрче! Пiс – сын командабыс! Пiстiң, хакастарның, худы уғаа кӱстiг, хылиибыс андағох пос оңдайлығ. Аннаңар даа пiстiңнер пу проектте полған на сай утчалар. «Мини-футбол – в школу» – уғаа чахсы проект. Ол посты тиксi хазнаа кӧзiт пирерге оңдай пирче! Хакасиядағыларға улуғ алғыс пiске «ағырған» ӱчӱн! – ӱлескен чиңiс тутхан соонда Оксана. Аның пу сӧcтерi «Мини-футбол – в школу» проекттiң сайтында сығарыл парғаннар.
Тиксi Россия синiндегi марығның полған на ойыны кӧні эфирге сығарылған. Іди пістің командаларыбыстың сіліг ойыннарын полған на кізее кӧріп алар оңдай полған. Оларның тренерлерін ӱгренҷілері мындағ улуғ чидіге читкен ӱчӱн алғыстапчабыс. Мыннаң мындар пістің чир-суғҷыларыбыс iдӧк ле чиңістернi холға кир турзыннар.
Сом Асхыс аймаа СМИ-зының ВКонтакте социальнай сетьтегі страницазынаң
Автор :
Тимнеен Антон Чертыков
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
