Иттi ситкiп сыныхтапчалар
09.02.2024
Хабарлар
Аал хонии рыногының директоры Александр Векшин
Аал хонии. Республикада узелковай дерматит ағырығ тарап сыхханда, хай пiрее кiзiлер ит садызарға чочынчалар
Чуғынҷах мал ағырии тарапчатханы мал идi садиина теелче бе паза аның паазы алысхан ма тiп пiлiп алар ӱчӱн, республиканың аал хонии рыногынзар чол тутхабыс.
Рыноктың директоры Александр Векшин ит садии хайди парчатханнаңар чоохтап пирген:
– Узелковай дерматит ағырығ сығысханы паза тарапчатханы аал хонии рыногында ит садиина пiр дее теелбеен. Ағырығ сығыспаан аймахтар пар, олардаң мал, ат, хой паза сосха идiн ағылчалар. Рынокта ит читкiҷе. Пеер кiрчеткен прай ит ветеринар сыныхтаан иртче, анаң справка пирiлче, хайзында иттi чирге чарадылчатханнаңар пазыл парған. Мында чахсы ит садылча.
Узелковай дерматит ӱчӱн карантин кирiлген аймахтардаң иттi албинчабыс. Боград аймаанаң ит ағылбинчалар. Хай пiрее аймахтарда чуғынҷах мал ағырии сығысхан даа полза, ыраххы ааллардаң, хайда ағырығ тарирынаң хорғыс чоғыл, иттi cадыға ағылчалар.
Аал хонии рыногында уғаа чахсы лаборатория. Анда тирең пiлiстiг специалисттер тоғынчалар. Амғы туста пiс иттi ситкiп сыныхтапчабыс.
Ит паазы алыспаан. Чуртағҷылар иттi садызарға хорыхпазыннар. Хакасия ол андағ регион, хайзында соотхан ит пар. Россияның 70-ҷа регионында тоң на ит полча. Пiстiң республикада мал тутчатхан хоных илееде. Ааллар городтардаң ырах нимес орныхчалар, аннаңар иттi тоңдырбасха чарир.
Пiрее чирде чобағ полза, кӧйтiк паза чӧй кiзiлер ахча тоғынып аларға сiренчелер. Пӱӱнгi кӱнде иттi садысчатхан хай пiрее кiзiлер, аймахтарҷа чӧрiп, чуртағҷыларға чоохтапчалар: «Хонҷыхтарыңда чуғынҷах ағырығ тарапча, аннаңар малларыңны ниик паанаң садыбызыңар». Ол сӧстерге киртiнмеске кирек. Кӱҷӱрлер, иттi ниик паанаң садызып алып, аны пасха чирде садарға пӧгiнчелер.
Республиканың аал хонии рыногында пiр чыл аразына 400 тоннаҷа мал, сосха паза хой идi садыл парча.
Асхыс аймааның Асхыс чоғархы аалындағы итнең айғасчатхан идiнҷек Артём Угдыжековтың чооғынаң, кiзiлер малларын садыбызарға кӱстенчелер, ниик паанаң даа пирiбiзер кӧңнiлiглер. Рынокта пiр малның идiн ӱс кӱн аразына садыбызарға кирек. Тӧртiнҷi кӱнiнде ол садыға чарабинча. Идiнҷектер прай иттi тузында садыбысчалар. Хакасияда узелковай дерматит сығысханнаң чуртағҷылар иттi олох син алчалар.
– Чуғынҷах ағырығ тарир алнында, кiзiлернiң мал тудар кӧңнiлерi полған. Амды олар малларын ӱзiбiзерге, ниик тее паанаң садыбызарға сағынчалар. Пiреезi мал азии асхынахтаңар малларын сатча. Мин пӱӱн мал паза хой идiн сатчам. Хой идiн сат парирбын. Сӧӧк чох мал идi 580 салковайға турча, хабырғалар – 450 салковайға. Рынокта ит кӧп садылча, аннаңар пааларны тың кӧдiр полбассың. Мин позым маллар тутчамох, – сағыстарынаң ӱлескен Артём Угдыжеков.
Сом Дмитрий Сунчугашевти
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
