УЛУҒ ЧИДІГЛЕР ШКОЛАДАҢ ПАСТАЛЧА
28.04.2023
Хабарлар
Асхыс чиріндегі футболист хыстарны аймах пазы Абрек ЧЕЛТЫГМАШЕВ алғыстапчатхан туста
Хыйғаҷахтарның пайрамы. Ирткен неделяда Асхыс аймааның Культура туразында ӱгредігде, спортта паза чайаачы тоғыста улуғ чидіглерге читкен ӱгренҷілерні чеестееннер
Пайрамнығ мероприятиеде Асхыс аймааның устағ-пастаа, аал чӧптерінің устағҷылары паза мероприятиені иртірерге полысхан кізілер араласханнар. Оларның санында: идінҷек Иван Миндибеков, республиканың Ӧӧркі Чӧп депутаттары Евгений Челтыгмашев, Роман Челтыгмашев, «Благодарение» полызығлығ чыындының тӧстегҷізі Сталбек Мишаков, идінҷектер Владимир Астанаев, Тамази Сиукаев, Елена Бурнакова, Ольга Головкина, Аркадий Боргояков, Дмитрий Цыденов, Файзо Дрбоян.
«Чайаачы олғаннар кӱні» мероприятие иң таланттығ палаларның ӱлӱкӱні полча. Пӱӱл пу пайрам 29-ҷы хати иртті. Олғаннарны паза ӱгретчілерні алғыстаан Асхыс аймаа пазы Абрек Челтыгмашев. Аның сӧстерінең, пу пайрам хазнабыстың иң сидік тустарында тӧстел парған. 1990 чылларда кізілер чал ахчазын айларнаң албин турғаннар. Че андағ даа полза, ол туста Асхыс аймаа пазы полған Михаил Саражаков пу пайрамны иртірерге чаратхан. Аның сағызынаң кӧп кізі чарасхан. Іди Асхыс аймаанда таланттығ палаларға полызығлығ чыынды тӧстел парған.
– Залда одырчатхан олғаннарның піреезі математикаҷа, хайзы-да химияҷа паза пасха даа предметтерҷе чахсы пілістер кӧзіткен. Пӱӱн піс прай номинанттарның аттарын піліп аларбыс. Мин палаларыбысха, ӱгретчілерібіске поғдархапчам. Ӱгретчілер олғаннарға улуғ чуртассар чол асчалар, – таныхтаан Абрек Васильевич.
Филологияҷа улуғ чидіглерге читкен ӱгренҷілерге Н.Ф.Катановтың адынаң премияны идінҷек Елена Бурнакова читірген. Аның таниинаң, полған на ӱгренҷі чидіглері ӱчӱн турыстыра сыйыхтар алып алған. Олар пасхазына кӧзідім полчалар. Олғаннарның чолы хаҷан даа азых ползын тіп алғаан.
Математикаҷа паза информатикаҷа чахсы пілістер кӧзіткеннерні Н.Ф.Катановтың адынаң Хакас хазна университедінің проректоры Марина Адамова алғыстаан. Ол пу вузтың ректоры Татьяна Краснованың адынаң олғаннарға чылығ сӧстер читірген. Аның таниинаң, таланттығ олғаннарны чеестирі чахсы кибір полча. Сидік тее тус полза, ол тоғыс тохтабинча. Мында читірілген сыйыхтар олғаннарға чахсы хабазығ полча. Ӱгретчілерге улуғ алғыс. Олар, палаларны ӱгредіп, кӧп кӱс салчалар, ӱгренҷілеріне пӧзік чидіглерге чидерге полысчалар. Ӱгретчее иң улуғ сыйых – маңнаныстығ ӱгренҷі. Паба-іҷелер, палалары чахсы ӱгрензіннер тіп, прай оңдайлар пирчелер. Олғаннарның, тізең, чуртас чолы наа ла пасталча, полған на сағызы толзын теен.
Естествознаниеҷе Н.Ф.Катановтың адынаң премияа турысханнарға чылығ сӧстер чоохтаан Г.Я.Ремишевскаяның адынаң республиканың имнег туразының имҷізі, имнег наукаларының кандидады Мирген Мылтыгашев. Аның сӧстерінең, олғаннар улуғ чидіглерге читпеен ползалар, пу пайрам даа полбасчых. Ӱгретчілер ӱгренҷілернің таланттарын тилідерге полысчалар, оларға орта чол кӧзіт пирчелер. Ӱгренҷілер, пілістер аларға кӱстеніп, чахсы чидіглерге читчелер. Олар хазнабыстың поғдархазы полчалар.
Тархынҷа, археологияҷа паза чир-суун ӱгренерінҷе пӧзік пілістер кӧзіткеннерге Л.Р.Кызласовтың адынаң премияны Асхыс аймаа пазының пастағы орынҷызы Евгений Костяков читірген. Аның чооғынаң, чоныбыс маңнаныстығ олғаннарыбысха поғдархирға кирек. Палалар пӧзік пілістерін прай чирде кӧзітсіннер, алғытсыннар, кічіг чир-суубысты сабландырзыннар.
Лесоперевалочнай 2№ школаның ӱгренҷізі Анатолий Ворошилов «Россия» телеканал иртірчеткен «Синяя птица» марығда араласхан. Пайрамда Анатолий, сценаа сығып, чапсых теелбекнең кӧрігҷілерні хайхатхан. «Кӱг» хакас иблер комплексінің директоры Ольга Головкина музыкада чайаачыларын кӧзіткен олғаннарны С.П.Кадышевтің адынаң премиянаң сыйыхтаан. Аның сӧстерінең, олғаннар Асхыс аймаан паза республикабысты прай тилекейде сабландырзыннар. Анатолий Ворошиловтың адын прай хазна пілче. Ол пасхазына кӧзідім полча.
Изобразительнай искусствоҷа В.А.Тодыковтың адынаң премиянаң Хакас техническай институттың пӧлиинің пастығы Татьяна Правошинская сыйыхтаан. Аның таниинаң, Сибирьдегі федеральнай университет олғаннарны филиалында, Хакас техническай институтта, ӱгренерге хығырча. Сценаа сыхчатхан олғаннар пістің чылтызахтарыбыс полчалар. Чуртас чоллары оларны хайдар даа тастабысса, кічіг чир-суубысты ундутпазыннар.
Пӱӱл Истегі паза Асхыс чоғархыдағы ортымах школаларның мини-футболҷа хызыҷахтарның командалары «Мини-футбол школаларда» федеральнай проект мариинда, тиксі Россия финалына сығып, сыйыхтығ орыннарға турысханнар. Асхыс чоғархыдағы хызыҷахтар 2-ҷі орынны холға киргеннер. Истегі команда – чиңісчі. Оларны алғыстирға Асхыс аймаа пазы Абрек Челтыгмашев сценазар сыххан.
– Пістің хызыҷахтарыбысты алғыстирға мағаа оң полды. Пу сценада тиксі Россия мариинда сыйыхтығ орыннарға сыххан командалар турчалар. Олар Сибирьдегі федеральнай округ синінде чиңіс тутханнарында, оларға тиксі Россия мариина парарға ахча киректелген. Полызығны аймах бюджедінең позыдарға чарадығ алылған. Мин Асхыс чоғархыдағы командаа пазағы чылда чиңістіг айланарға алғапчам, – алғыстас сӧстерін читірген Абрек Васильевич. – Полтах аалдағы команда – чиңісчі. Оларның сіліг ойыннарын интернет пастыра прай хазнабыс кӧрген. Прайзы пістің хызыҷахтарыбысха хайхаан.
Хайди таныхтаан Истегі ортымах школа командазының капитаны Наина Какаякова, ол футболнаң читінҷі чылы айғас парир. Ол ӧӧрелерінең хада Россия марығларында нинҷе-де хати аралазып, пастағызын на сыйыхтығ орынға сыхханнар. Индіркі Новгородта ирткен марығда 13 команда араласхан. Чир-суғҷыларыбыс полғанын на улуғ саннаң утып алған. Че иң сидік ойын Бурятия командазынаң тоғыр ирткен.
– Тренерібіс Юрий Ильич Аёшин полған на ойынны утып аларға чахығ турғысхан. Пазағы чылда піс пазох тиксі Россия мариина сығып аларға пӧгінчебіс. Ізенчебіс, килчеткен марығларда аралазарға піске наа форма ал пирерлер, – чоохтапча Наина. – Мин мыннаң мындар спортнаң айғазарға пӧгінчем, че ӱгредігде дее маңнанарға кӱстенербін.
Асхыс чоғархыдағы команданың капитаны Айсели Сунчугашева алты чыл спортха пир салған. Аның сӧстерінең, тиксі Россия мариинда ікінҷі орынға турысханы – аның иң улуғ чидии. Финалда 12 команда араласхан, оларны ӱс группаа чарыбысханнар. Асхыс чоғархыдағы командаа группадағы полған на командадаң тоғыр ойнирға сидік полған. Чир-суғҷыларыбыс 5:2 саннаң иң улуғ чиңіс тутханнар.
– Сыйыхтығ орынға сығып алғанда, піс ӧӧрелерібіснең хада ниик тыныбысхабыс. Сидік чолыбыс тоозыл парды. Сыйыхха турысханыбысха піс соонаң на ӧрінгебіс. Марыға парарға полысхан ӱчӱн прайзына алғызыбыс читірчебіс. Туған-чағыннарыбыс, полған на ойыныбысты кӧріп, чӱрексінгеннер, – чоохтапча Айсели.
Пайрамнығ мероприятиеде кӧп ӱгренҷее ахчалығ сыйых читірілген. Асхыс чиріндегі ӱгренҷілер аны чахсы пілістерінең паза чайаачыларынаң тоғынып алғаннар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде