АВТОМЕХАНИКТЕРНІ ТИМНЕПЧЕЛЕР
Асхыстағы 18№ училищенің студенті Данил Кузургашев
Абитуриенттер хайиина. Ӱр ниместе Хакасияның прай даа ортын профессиональнай ӱгредіг организацияларында азых ізіктер кӱннері ирткен. Ағбандағы политехническай колледж улуғ класстардағы ӱгренҷілерні ідӧк удурлаан
Азых ізіктер кӱннері «Профессионаллар» чемпионат иртчеткен тусха орта пол парған. Аннаңар таңдағы абитуриенттерге ідӧк федеральнай марығның региондағы чардығы хайди иртчеткенін кӧріп аларға оңдай полған.
Ағбандағы политехническай колледжте паза аның Ағбан пилтіріндегі пӧлиинде пір муң азыра студент піліс алча. Олар бухгалтер, экономист, социальнай тоғынҷы паза даа пасха специальностьтар алчалар. Че чылдаң чылға абитуриенттернің хайиин «Ниикке чӧрҷең автомобильлерні тыхтиры» паза «Программирование» кӧстеглер тартча. Пір орынға 12 кізее теере полча. Пу чылдаң пасти колледжте ідӧк «Юриспруденция» паза «Технология деревообработки» наа специальностьтар азылча. Анда ӱгренері тикке.
Колледжсер кірерге сағынчатханнар хоза сыныхтағлар иртпинчелер, оларның аттестаттарының ортымах баллы санға алылча. Хайди чоохтапча ӱгредіг учреждениезінің директоры Николай Шелуха, 2021 чылда колледжтің мастерскойлары пӱкӱлее нааҷылалған. Тӧрт мастерскойны тыхтабызарына «Ӱгредіг» национальнай проектче 35 миллион салковай позыдылған. Ідӧк сигіс автомобиль алылған: КамАЗ, ГАЗель паза Лада Гранталар. Студенттер наа техниканаң улуғ ла курстарда тоғынып пастапчалар. Пастап олар ВАЗ-тарда ӱгренчелер, анаң на наа автомобильлернең устарын тыытчалар.
– Пӧзік пілістіг специалистті тимнеп алар ӱчӱн ӱс ӧӧн ниме кирек – ол піліс аларға тимде студент, учреждениенің пӧзік материально-техническай базазы паза кӱстіг ӱгретчі. Колледжте олар прайзы парлар. Піссер ӱгренерге килген чииттер хайдар паза, ӧӧні, нимее ӱчӱн килгенін чахсы пілчелер. Аннаңар піліс аларға кӱстенчелер, – чоохтапча Николай Васильевич.
Колледжсер аймах-пасха муниципалитеттердең чииттер ӱгренерге килчелер. Оларға общежитиеде орын пирілче. Ирткен чылда анда килкім тыхтағ тоғыстары иділ парған. Комнатада чииттер 2-3-ер кізідең чуртапчалар.
Пастағы курстағыларға прайзына стипендия тӧлелче – 1030 салковай. Пастағы сессия cоонаң студент сыныхтағлар хайди тудыбысханынаң палғалыстығ, аның стипендиязы хозыл парча алай ба чох иділче. Иң пӧзік стипендия сині – 2060 cалковай. Ағаа хоза, хай пірее студенттер социальнай стипендия алар праволығлар.
Улуғ курстағылар ӱгредіг практиказын колледжтӧк иртчелер, производственнай практиканы, тізең, аймах компанияларда.
– Колледж социальнай партнерларнаң пик палғалыс тударға кӱстенче. Пістің студенттерібіс Ағбандағы автомобильлер компанияларында практика иртчелер, – чооғын узаратча директор.
Таныхтирға кирек, СПО учреждениезін тооcханнарның 68 проценті специальность хоостыра істенче, хай піреезі Хакас хазна университедінде алай ба Хакас техническай институдында ӱгредиин узаратча. «Ниикке чӧрҷең автомобильлерні тыхтиры» специальностьча ӱгренгеннернің кӧбізі посха тоғыс таапча.
Ағбандағы политехническай колледжтең пасха, автомобильлер тыхтирынҷа специалисттерге ідӧк Саяногорсктағы, Харатастағы, Ширадағы ортын профессиональнай ӱгредіг учреждениелерінде ӱгреніп аларға чарир. Асхыстағы 18№ училищеде автомобильлерні тыхтирына ӱгретчелерӧк. Илья Яковлев пу кӧстегҷе 3-ҷі чылы ӱгренче. Чемпионатта ағаа автомобильнің сайбал парған орнын тӱзедібізерге кирек полған.
– Асхыстағы училищезер ӱгренерге килгенібісте, машиналарны Интернет пастыра тыхтирға ӱгренгебіс. Хай пірее инструменттер хайди адалчатханын даа пілбеҷеңміс паза холға тутпаан полғабыс. Ӱр ниместе анда мастерскойлар нааҷылалған. Узыбысты таптаҷаң прай оңдайлар пар, марыға даа чахсы тимненіп алғабыс, – чоохтапча студент.
Паза Данил Кузургашев чемпионатта кӱзін сынап кӧрген. Марығ аар ирткен тіпче ол, «ыырҷылар» кӱстіг полғаннар. Чиит оол ідӧк Асхыстағы училищеде 3-ҷі курста ӱгренче. Пӱктігде чуртапча.
Амғы туста Хакасияның ортын профессиональнай ӱгредіг организацияларында 70 азыра ӱгредіг программазы чуртасха кирілче. Республикада иң кирек специалисттерні СПО-ларда тимнепчелер. Хайди искірче Хакасияның ӱгредіг паза наука министерствозының профессиональнай ӱгредіг пӧлиинің устағҷызы Евгения Черных, халғанҷы тӧрт чылға кӧп алызығлар пол парған. «Профессионаллар» чемпионатта араласчатхан сылтаанда, ортын профессиональнай ӱгредіг учреждениелерінде кӧп тоғыс иділ парған. Лабораториялар, кванториумнар, ӧзіс кіннері азылған, мастерскойлар, спорт заллары нааҷылалған. Анзы практика занятиелерін улам кӧп иртірер оңдай пирген паза ӱгредіг синін пис хати ӧскірген.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |