ЧИҢIC КӰНІНЕ ТИМНЕНІС ХЫЫЗЫНДА ПАРЧА
31.03.2023
Хабарлар
Оргкомитет чыылии. Хакасия пазы Валентин Коновалов Илбек Чиңicтің 78-ҷі чылын таныхтирына тимненер паза аны иртірер «Победа» региондағы оргкомитеттің чыылиин иртірген
Хайди таныхтаан Валентин Коновалов, чыылығның тоғызын пастап, Илбек Чиңiс кӱні чағдап одыр, аны піс улуғ пайрам идіп иртірерге кирекпіс. Кӧстегліг мероприятиелерде чииттер, ветераннар пірігістері аралазарлар. Амды пу тусха ниме иділ парғанын, ам даа хайдағ тимненіс тоғыстарын апарарға кирек полчатханын кӧрербіс.
Хакасияның культура министрі Светлана Окольникованың чооғынаң, министерствоның тоғынҷылары Илбек Чиңicтің 78-ҷі чылын таныхтирына тимнепчеткен мероприятиелерін чуртасха киріп пастабысханнар. Пӧгінде мындағ мероприятиелер иртірілер: 8 майда Ағбандағы Чиңic паркында Хумартхылас ритуалы, iдӧк республиканың город-аймахтарында андағ мероприятиелер полар. Ирт тағда «Сірернің махачыңар хаҷан даа ундудылбас» паза «Хумартхылас свечізі» акциялар иртірілер. 9 майда Ағбандағы Пастағы май ачығында Чиңic митингі паза пайрамнығ марш 10.00 частаң пасталар. Аның соонда иирге теере Хакасияның чайаачы ӧмелері концерт программазынаң сығарлар. 21.45 часта пайрамнығ фейерверк полар. Iдӧк 12.00 частаң Ағбандағы спорткомплекс хыринаң «Ӧлімі чох полк» чӧрім пасталар.
Республиканың мобилизация тоғызынҷа паза хазна чазыдын арачылирынҷа хазна комитедінің кнезі Виктор Бармин Пастағы май ачығында иртер пайрамнығ маршта аралазар расчеттардаңар искірген. Аның чооғынаң, анда прай 18 парад расчеды аралазар, iди алынҷа «коробкаларнаң» парарлар волонтёрлар, юнармеецтер, ХТИ-ның паза ХГУ-ның чаа кафедразында ӱгренчеткен студенттерi, МВД-ның паза УФСИН-ның тоғынҷылары паза даа пасхазы.
Чиңiс кӱні алнында репетициялар иртірілер, 5 майда 10.30 часта – ӧӧн репетиция.
Хакасияның iстеніс паза социальнай арачыланыс министрі Татьяна Раменская Илбек Ада чаа ветераннарына хайдағ полызығ пирілерінеңер искірген. Аның чооғынаң, республикада Илбек Ада чааның 30 кинегі паза араласчызы чуртапча, ағаа хоза, Ленинградтағы хурчағда полған 12 кізi, чазы читкелекте фашисттернің концлагерьлерінде тудылған 17 кізі, 353 тыл істенҷiзі, 45 чаа палазы саналча. Прайзын алғыстирға открыткалар, сыйыхтар тимнелче. Iдӧк пір хати пирілчеткен тӧлеглер ызылар: Илбек Ада чааның кинектерiне паза араласчыларына, Ленинградтағы хурчағда полған кізілерге паза чазы читкелекте концлагерьлерде тудылғаннарға – пизер муң салковай; тыл істенҷілеріне паза ӱреен ветераннарның ӧкіс халған ипчілеріне – 1,5 муңар салковай.
Прай пу адалған кізілернің тураларын, квартираларын тыхтирына полызығ полар. Ағаа республика бюджедінең кирек ахча позыдылча. Республикада Илбек Ада чаа ветераннарына квартира пирер теесте пір дее кізі чоғыл, че пірее кӧрілбеен оңдайлар сых парарына федеральнай бюджеттең 4 миллион салковай позыдылған.
Татьяна Раменская паза даа пасха оңдайлығ полызығлар пирілерінеңер чоохтаан.
Республиканың ӱгредіг паза наука министрі орынҷызының тоғызын толдырчатхан Юлия Ворошилова чииттер хайдағ мероприятиелер иртіргеннеңер паза ам даа иртірілер мероприятиелердеңер искірген. Аның чооғынаң, Чиңic волонтёрлары, юнармеецтер ветераннарнаң хада кӧп тоғыс апарчалар. Чииттер аймах чӧрімнер иртірчелер, проекттер чуртасха кирчелер. Iди регионнар аразындағы патриот форумы иртірілген, анда Туваның, Хакасияның, Донбасстың паза Луганск облазының чииттері араласханнар. Аннаңар залда видеофильм кӧзіділген.
Республикаҷа Илбек Чиңicке чарыдылған кибірліг автопробег иртірердеңер искірген ДОСААФ-тың региондағы пӧлиинің кнезі Айдыс Сат. Аның чооғынаң, автопробег пӱӱл 16-ҷы хати иртірілер. Автомобильлер аймахтар кіннерінҷе парарлар. Анда пайрамнығ тоғазығлар, митингтер полар. Чааҷыларның хумартхы тастарынзар веноктар, чахайахтар салылар, спортсменнер микелер кӧзідерлер.
Ағбанның пазы Алексей Лёмин городта иртірiлер мероприятиелердеңер чоохтаан. Хайди ол таныхтаан, олар регионның пӧгіннерінең палғалысчалар. Илбек Ада чааның араласчыларына муниципальнай бюджеттең онар муң салковай, тыл істенҷiлеріне ӱзер муң салковай читірілер. Апрель, майда «Чиңiс ӱчӱн алғыс» акция иртер, футболисттер «Чиңiс кубогы» ӱчӱн марығлазарлар. «Хумартхылас вахтазы» 25-ҷі школада 5 майда 11.30 частаң пасталар. «Ӧлімі чох полкта» пылтыр 15 муң кізі араласхан полза, пӱӱл, чахсы кӱн турза, 20 муң кізі аралазары кӧрілче.
Чыылығда Харатастың паза Ағбан пилтірі аймааның устағҷылары муниципалитеттерінде хайдағ мероприятиелер иртірілердеңер видео пастыра искіргеннер.
Хайди таныхтаан республиканың Ветераннар чӧбінің кнезі Галина Трошкина, ӱлӱкӱнге тимненіс тӱзімніг парча. Амды тилекейде киректер олаңай нимес, аннаңар піс позыбысты чахсы саринаң кӧзідерге кирекпіс. Ветераннар пірігізі министерство-ведомстволарнаң хада-пірге тоғыс апарча. Республиканың Культура туразында чаа тузындағы тахпахтар фестивальын иртірерге тимненчелер. Школаларда ӱгренҷiлер хумартхылас вахтазын апарзыннар. Хумартхылас чолларын позыдарға кирек, аннаң прайзы ла айғаспинча. Ӧсчеткен тӧл пілзін, хайда ниме полғанын, ноға орамалар iди адалчатханын. Экскурсовод аны олғаннарға читірзін.
Россияның арачыланыс министерствозы піске Пирятин дивизиязының ӱс полкының знамяларын пирібіскен, че дивизияның знамязы чох полған. Ам аның сомы хоостыра Москвада знамяны тимнепчелер, ол 48 муң салковайға тур парар. Тимнелген знамяны пістің постпредство, алып, Ағбанзар ызыбызар.
– Чиңic кӱні – прай хазнаның танығлығ ӱлӱкӱні. Піс ӧбекелерібiске аарлас читірчебіс. Ам читіре чох иділбеен нацисттердең тоғыр кӱресчеткен чааҷыларыбысха улуғ аарлас читірерге кирекпіс. Олар пістің амыр, пос чуртазыбыс ӱчӱн турысчалар. Прай министерство-ведомстволар тимненіс мероприятиелерін нандырығлығ толдырыңар. Піс Илбек Чиңicтің 80 чылына амох тимненчебіс, пу теестегі ле чардығы, – теен Валентин Коновалов.
Автор :
Николай СУЛТРЕКОВ
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
