1990 ЧЫЛЛАРНЫҢ ХОРЫЛЫСТАРЫ
31.03.2023
Хабарлар
Презентация. Н.Г.Доможаковтың адынаң национальнай библиотекада хабарҷы паза писатель Юрий Абумовтың «Сломанный нож» наа сыххан книгазынаң таныстырғаннар
Национальнай библиотеканың читiнҷi хадылындағы актовай залға кiзi толдыра чыылыс парған. Хакасиядағы МВД-ның ветераннары кӧп полған. Юрий Абумовтың пу книгазында олардаңар илееде чоох нооза. Сағам олар, тынағда полып, удур-тӧдiр удаа тоғаспинчатханнары кӧрiнче. Суулада изеннезiп, матап хуҷахтасхлап турғаннар. Актовай залның фойезiнде наа сыххан книганы сатханнар. Пiр книга 600 салковайға турчатхан. Аарлығ, ястразы! Че нимее хайхир! Амғы туста книгалар аарлыға садылчалар. Аннаңар даа, арса, книгалар садып, хығырбинчалар.
Чыылығны апарған национальнай библиотеканың пӧлiк устағҷызы Мария Пьянова. Ол хысхаҷахти книганың авторынаңар искiр пирген.
Юрий Абумов – Россияның журналисттер пiрiгiзiнiң, писательлер пiрiгiзiнiң араласчызы, Россияның саблығ журнализi, Хакасия культуразының саблығ тоғынҷызы паза Хакас Республика пазының Николай Доможаковтың адынаң литература сыйииның лауреады.
Ол пастап Асхыстағы «Хакасский труженик» аймах газетазында iстенген, анаң, Ағбан городсар килiп, «Хакасия» газетада амға теере тоғын парча. Сағам газетаның ӧӧн редакторының пастағы орынҷызы полча. Кiзiлер аның тирең пазылған статьяларын хынып хығырчалар. Аның пасханы ниик паза пiлдiстiг хығырылча.
Юрий Абумовтың пу пастағы книгазы нимес. Алында ол очерктер чыындызын сығарған. Анаң хабарҷы дневнигi сериязын тимнебicкен. Андар кiргеннер «Отпилили верблюду горб», «Ведьмина коса» паза «Олени в облаках» книгалар.
Пу наа сыххан «Сломанный нож» iдӧк «Ярость 90-х» серияның пастағы книгазы полча. Iкiнҷi книгазы тимде одыр паза ӱзiнҷiзi пазылча. Юрий Абумов орыс тiлiнең пасча. Аның пу книгазы Москвадағы «Вече» книга издательствозында сых парған. Аннаңар пастағы презентация Москвада ирткен. Книганың тиражы пiр муң на. Амды книга Россияҷа табырах тарапчатхан одыр. Хакасия 1990 чылларда хайди чуртааны хығырығҷыларның хайиин тартча.
Книганы пазарға чӧп пирген паза аны сығарарға полысхан Андрей Тенишев. Ол Хакасияда 1990 чыллардаң 2008 чылға теере прокуратурада тоғынған. Андадағы коррупциядаң харбазып, ол улуғ пастыхтарны даа чалтанмин харибге одыртхан. Андрей Петрович Тенишев Россия президентiнiң РАНХ паза ГС академиязында кафедра устағҷызы, юридическай наукаларның кандидады полча.
Юрий Абумов презентация тузында пу книга хайди пазылғаннаңар искiрген. Ол милиция тоғынҷыларынаң интервьюлар алған, архивтерде хасхланған паза позы киречi полған киректердеңер пасхан. Iди 20 чылҷа тоғынтыр паза ам даа узарат парча. Ол кӧбiзiн Хакасияда алызығлар полған тустаңар кӧзiтче, хаҷан ахча тӧлебеҷеңнер, тонағҷылар паза сайбағҷылар ӱлгӱзер сыынғаннар. Книгада пiр дее сағынып алған ниме чоғыл, прай полған киректердеңер пазылча.
Ол тустағы мафия милиция тоғынҷыларынаң артых ла чуртаан. Кӱcтiг моторлығ джиптер, постарының рациялары, спортсмен «чааҷылары», хайзылары кемнi дее сох салыбызарлар алай ӧдiрiбiзерлер дее.
Анаң пу чыылығда книгада пазылған матырлар, МВД ветераннары, прокуратураның иргi тоғынҷылары Андрей Тенишев, Владимир Рудич, Борис Кичеев, Александр Мосман, Юрий Ултургашев паза даа пасхазы, чоох тудып, Юрий Абумовха аннаң андар тӱзiмнiг тоғынарға алғааннар.
Автор :
Илья ТОПОЕВ
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
