МОСКВАДАҒЫЛАР ХАДА
29.03.2023
Хабарлар
Чыл пазы. Кӧрік айының 26-ҷы кӱнінде 100 азыра чир-суғҷыбыс Москвада, чыылызып, чоныбыстың Чыл пазы ӱлӱкӱнін таныхтаан
Хакасия пазының орынҷызы, Хакасияның Москвадағы тӧреміл кізізі Юлия Исмагилова пістің чир-суғҷыларыбыснаң хада Национальностьтар туразында хакас чонның Чыл пазы ӱлӱкӱнін таныхтаанынаңар искірче. Юлия Вячеславовна Москвада чурттығ хакастарны республика пазының адынаң пу танығлығ ӱлӱкӱннең алғыстаан. Аалҷыларға чон кӧг тиріглері, сувенирлер кӧзідии, чон ойыннары, чалама палғирынҷа кибір паза ыр-сарыннар тимнелген.
– Аарлығ чир-суғҷылар, сірер республикаа чахсы хабасчазар паза аның чуртазына улуғ хозым итчезер. Пістің республикаа ӧңненіс паза чахсы чуртас алғапчам. Киртінчем, хада-пірге піс Хакасияа улуғ туза ағыларбыс. Чыл пазы ӱлӱкӱннең! – алғаан Юлия Исмагилова.
Пу ӱлӱкӱннің араласчызы, Москваның наа чуртағҷызы Алёна Уксекова Чыл пазы хайди ирткеніне прай саринаң чӧпсінгенінең ӱлесче:
– Ӱлӱкӱнні тимнеен кізілер аны пӧзік синде иртірерге кӱстенгені, аалҷыларға истіг поларынаңар сағыссырааны кӧрінген. Чей ісчеткенде, мин хакастарны (Хакасиядаң кӧскен прай чир-уғҷыларыбысты) пір орында чығарының пастағҷызы кем полчатханын сурғам. Прайзы пір ӱннең Харатай Таскараковты адаан, ачых-чарых, чайаачы, хыйға чиит оол. Хакасияа турыстыра оолғына поғдархирға чарир. Паза пір оол – Дмитрий Туниеков. Ол искірігні тарадар ӱчӱн нандырған. Хыстар Наталья Горчичка, Айгуль Асаинова, Айана Чебодаева иирні уғаа иптіг апарғаннар паза чазааннар. Чииттернің ынағ паза кӱстіг ӧме, мыннаң мындар оларға іди ле пірге тудынарға алғапчам, – таныхтаан Алёна Уксекова.
Москвазар наа ла кӧскен кізее анда Хакасияның тӧреміл представительствозы парын пілерге чапсых полған. Чир-суғҷыбыс республиканың тӧреміл кізізі хакасиядағыларны піріктіреріне чахсы хайчатханына ӧрінче.
Хакасияның чайаачы оолғы Харатай Таскараков «Чир-суу» Москвадағы хакастар пірігізінің ӧткін араласчызы полча. Хакас чонның Чыл пазы ӱлӱкӱнінде ідӧк пасха чоннарның чииттері араласханнар. Республикабыстың Москвадағы тӧреміл представительствозы, С.П.Кадышевтiң адынаң чон чайаачызының кіні ӱлӱкӱнні тимнирге полыстырларох. Россияның чоннары культуразының кіні Чыл пазын иртірерге хозым иткен полған на араласчаа алғызын читірче.
Автор :
Тимнеен Наталья БОРГОЯКОВА
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
