ӰЗӰРІГДЕ – ФЕДЕРАЛЬНАЙ ЗАКОН ПРОЕКТТЕРІ
24.03.2023
Хабарлар
Президиумдағылар пу чыылығда федеральнай закон проекттеріне ӱндесчең сурығларны ӱзӱргеннер. Оларның пірсі тамкы, никотинніг ниме-ноо закон хыйыстыра сығарылчатханынаң паза садылчатханынаң тоғыр кӱрезерінең палғалыстығ полған. Россия правительствозы кирген закон проектінҷе, административнай сайбағлардаңар кодекссер алызығлар киріп, ол сферадағы сайбағлар ӱчӱн хатығласты тыыдары кӧрілче.
Хайди чоохталча закон проектінің чарыдығлығ пічиинде, Россияның Сананыс палатазы паалиинаң 2016 – 2021 чылларда тамкы закон хыйыстыра (тамкы акцизі чох) сығарылғаны паза садылғаны сылтаанда федеральнай бюджеттің «чідіріглері» 295 миллиардча салковайға тиңнелген.
– Тамкаа акцизтер мыннаң мындар кӧдірілерінең, ол сферадағы сайбағлар саны улам ӧзер тіп кӧрілче, – таныхтаан Ӧӧркі Чӧптің конституционнай законодательствоҷа, хазна пӱдіриинҷе, законностьча паза правопорядокча комитедiнің кнезі Светлана Могилина.
Тамкының, никотинніг ниме-нооның закон хыйыстыра айланызынаң тоғыр кӱрезеріне административнай хатығластар кирері кӧрілче. Іди тамкыны лицензия чох сығарчатханы алай сатчатханы ӱчӱн должностьтығ кізілерге 150 муң салковайдаң сығара 300 муң салковайға теере административнай штраф салары кӧрілче, юридическай лицоларға – 300 муң салковайдаң сығара 1 миллион салковайға теере.
Ӧӧркі Чӧп президиумы Россия правительствозы кирчеткен алызығларнаң чарасхан, федеральнай закон проектіне хабазарға чарадығ алған.
Паза пір федеральнай закон проекті хазна гражданствозын алар процедураны нииктирдеңер полған. Хакасияның Ӧӧркі Чӧп кнезі Владимир Штыгашев ол закон проектінде иң не пурун наука тоғынҷыларынаңар, ученайлардаңар чоох парча тіп чарытхан. Iди науканаң айғасчатхан паза пістің хазнада чуртап тоғынарға сағынчатхан пасха хан чиріндегілерге Россия гражданствозын алҷаң оңдай нииктелер.
Хайди таныхтаан Владимир Штыгашев, США-да мындағ закон хаҷанох пар, олар ученайларны постарынзар тартып аларына прай оңдайларнаң тузаланчалар. Президиумдағылар пу федеральнай закон проектіне ідӧк хабазарға чарат салғаннар.
Паза пу чыылығда Ӧӧркі Чӧп президиумы Хакасия правительствозы 2022 чылда хайди тоғыныбысханынаңар сан пирісті истер кӱнні турғызарын кӧрібіскен. Президиумдағылар Хакасия пазы Валентин Коноваловтың сан пирізін 26 апрельде, Ӧӧркі Чӧптің 48-ҷі сессиязы иртер кӱнде, истіп аларға чарат салғаннар.
Республика правительствозының тоғыс салтарларынаңар сан пирісті истер сессияа Ӧӧркі Чӧпсер кірбинчеткен партияларның кізілерін хығырарға чарадығ алылған. «Политика партияларынаңар» федеральнай закон хоостыра парламентсер кірбинчеткен партиялар чылда пір хати сессия тоғызында аралазар праволығлар. Пу оңдайнаң законның кирексіністері толдырылча тиирге чарир.
Владимир Штыгашев пістің республикада андағ, Ӧӧркі Чӧпсер кірбинчеткен, 14 партия саналчатханынаңар искірген.
Автор :
Альберт ТОЛМАШОВ
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
