ВЛАДИМИР ШТЫГАШЕВ: «СІРЕРДЕ ХАКАСИЯНЫҢ ТАҢДАҒЫЗЫ»
22.03.2023
Хабарлар
Тоғазығ. Хакасияның Ӧӧркі Чӧп кнезі Владимир Штыгашев Хакас национальнай гимназия-интернатсар ааллап пар килген
Хайди искірче Хакасия Ӧӧркі Чӧбінің хабарлар пӧлии, Ӧӧркі Чӧп кнезі Владимир Штыгашев ирткен неделяда Хакас национальнай гимназия-интернатсар тоғыс чорығынаң чӧрген. Анда ол ӱгретчілернең паза ӱгренҷілернең, тоғазып, чоох алысхан, ідӧк ӱгредіг орыннары паза класстар хайдағ оңдайда полчатханын кӧріп алған.
Н.Ф.Катановтың адынаң Хакас национальнай гимназия-интернат Илбек Ада чаа тоозылғанда тӧстелген. Андар аалларда чуртапчатхан паза пабаларын, туған-чағыннарын чаада чідір салған хакас палаларны ӱгренерге алҷаңнар, ӧӧнінде кӧп палалығ сӧбіредегілерні.
Тоғазығ тузында Хакас национальнай гимназияның директоры Марина Сагатаева аалҷыларға экскурсия иртірген паза гимназияны аймах чылларда тоосхан саблығ ӱгренҷілердеңер кӧзідігнең таныстырған.
Владимир Штыгашев, ӱгренҷілернең чоох алызып, позы ӱгренген тустаңар чоохтап пирген. Ол чаа паза чаа соондағы аар чылларда ӱгренген нооза. Чоохтазығ тузында Ӧӧркі Чӧп кнезі таңдағы специалисттерні постың кічіг чир-суун тастабасха, пос кӱзін Хакасияны тилідеріне саларға хығырған.
– Пӱӱн піске аймах-пасха специалисттер киректелче: имҷілер, ӱгретчілер, инженерлер, технологтар паза пасхазы, – теен Владимир Штыгашев. – Прай тустарда ӧӧн ис-пайыбыс кізілер полғаннар паза полчалар. Сірерде, чиит специалисттерде, Хакасияның таңдағызы. Алҷаастар идерге хорыхпаңар, посты паза пос профессиязын тілеңер, тоғынарға паза кирекке нандырығлығ хайарға ӱгреніңер. Пӱӱн сах мындох пастых полыбызарға сағынчатханнар кӧп, ол орта нимес. Пастап пос тоғызын прай піліп аларға кирек, андада чахсы пастых поларзар.
Чоохтазығ чапсых ирткен. Ӱгренҷілер, аймах-пасха сурығлар пиріп, аалҷыны ӱр позытпааннар. Сурығларның пірсі республика парламентінзер нандырығ оңдайынаң ааллап пар килердеңер полған. Хакасияның Ӧӧркі Чӧбінде андағ практика хаҷанох пар, аннаңар пу нандырығ сурығ пирген ӱгренҷіні чӧпсіндірген.
Тоғазығ гимназияның ӱгредіг ниме-ноозы паза оборудование-техника саринаң хайди тиріндірілгенінең танызарынаң узарадылған. Марина Сагатаева гимназияда «Альтаир-Хакасия» чайаачы палаларнаң тоғынарынҷа кін парынаңар чоохтап пирген. «Ӱгредіг» национальнай проектте араласхан сылтаанда, андар биологияҷа, химияҷа, физикаҷа, информатикаҷа паза пасха даа кӧстеглерҷе наука-істезігліг тоғыстарны иртіреріне киректелчеткен нап-наа оборудование алылған. Хайди чарытхан директор, ол кінде прай Хакасиядаң чайаачы палалар тоғынар оңдайлығлар – чоннар аразындағы, тиксі Россиядағы, регионнар аразындағы паза республика марығларының, олимпиадаларының чиңісчілері, сыйыхтығ орыннарға турысханнар.
Владимир Штыгашев гимназияның ӧмезіне піди чылығ удурлааннары ӱчӱн алғызын читірген паза мыннаң мындархы чидіглер алғаан.
Автор :
Тимнеен Альберт ТОЛМАШОВ
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
