Хакас чонның нымахтарынаң Москвада танысханнар
21.03.2023
Хабарлар
Россияның пасха хазналар киректерінҷе министерствоның Москвадағы чоннар аразындағы хайызығлар хазна институдында "Хакасияның нымахтары" чыындызының презентациязы ирткен.
МГИМО хазнабыстың иң улуғ вузтарыбыстың пірсі полча. Мында Хакасиядаң килген ӱс ӱгренҷіні чеестееннер. Олар "Россия паза тилекей чоннарының нымахтары олғаннар кöрізінең" чиит хоосчыларның чоннар аразындағы марығның чиңісчілері санына кіргеннер. Есения Ондрак, Елизавета Суркова паза Тадина Иптышева "Хакасияның нымахтары" книгаа хоостар тимнееннер. Пайрамнығ иирде тоғыстары ӱчӱн олар пöзік сыйыхтарнаң таныхтатханнар - "Чиит хоосчы-дипломат" медальнаң.
Жюри Хакасиядаң пасха тöрт марығ араласчызының тоғыстарын пöзік паалаан. Іди лауреаттар санына кіргеннер: Кира Кыржинакова, Анастасия Чичинина, Анита Тохтобина паза Анастасия Чербакова.
"Хакасияның нымахтары" 2022 чылда хакас паза орыс тіллерінең чарыхха сығарылған. Тиксі андар хайхастығ, чурт оңдайларынаңар паза аң-хустардаңар 11 нымах кирілген. Чыындыны сығарарына ахча республика бюджедінең позыдылған. Тиражы 2 муң экземпляр.
Хакасия пазы, Москвазар чорығы тузында, ідöк чиит хоосчыларны сыйыхтирында араласхан. Ол "Хакасияның нымахтары" улуғ чайаачы öме тоғызының салтары тіп таныхтаан. Книганың тöстегҷізі Евгения Тороковадаң пасти, ол архивтердең хакас чонының иң саблығ нымахтарын таллаан, хоосчы хызыҷахтарның тоғызынаң тоозып.
- Хоостарың сылтаанда, пу книга пос оңдайлығ, уғаа чапсых паза хынығ пол парған. Хакасия правительствозының, позымның паза республика чуртағҷыларының адынаң сірерні паалап полбас тоғызыңар ӱчӱн алғыстапчам. Наа чайаачы чидіглер алғапчам! - чоохтанған Валентин Коновалов.
Аның таниинаң, Хакасияның культура-тархын пайын хайраллиры - республика правительствозының тоғызының ööн кöстеенің пірсі. Öсчеткен тöлні тöреен тілін паза культуразын хайраллирға ӱгредеріне полған на кізі хозым ит полар оңдайлығ.
Хакасия пазы ідöк марығ тöстегҷілеріне алғызын читірген. Улуғ паза кирек тоғыстарыңа чон чахсы ӱндессін тіп таныхтаан ол.
Ідöк марығ араласчыларынзар МГИМО-ның чииттер политиказынҷа проректоры Станислав Суровцев паза марығ тöстегҷізі, Чрезвычайнай паза Полномочнай Посол, Россия дипломаттары ассоциациязының кнес орынӌызы, "Полар тустың дипломаттары" олған халых пірігізінің президенті Валерий Егошкин айланғаннар.
Хакасияның нымахтары чыындызының тöстегҷізі, филология наукаларының кандидады, Хакасияның тархын, литература, тіл наука-істезігліг институдының улуғ наука тоғынҷызы Евгеня Торокова ідöк пайрамда араласхан.
Паза книга презентациязына "Кӱн чахайағы" чон ансамбльы öнетін кил парған, чыылысхан чонны чайаачызынаң öріндірген.
Таныхтирға кирек, "Хакасияның нымахтары" "Россия паза тилекей чоннарының нымахтары олғаннар кöрізінең" чоннар аразындағы марығлар салтарынҷа сығарылған пайрамнығ книгазы полча. Ол - онынҷы сығарылған чыынды.
Тиксі МГИМО-зар хазнабыстың 20 регионынаң олғаннар килгеннер. Оларның санында - 40 чиңісчі паза 15 лауреат.
Автор :
Тимнеен Татьяна Кыштымова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
