Улуғ марығлар иртірерге тимделер
17.02.2023
Хабарлар
Спорт пӱдіріглері. Пу неделяда аймах редакцияларның хабарҷыларына ниик атлетика манежінҷе экскурсия иртіргеннер
ӱӱл Ағбандағы ниик атлетикаҷа олимп резерві cпорт школазының (СШОР) танығлығ чылы. Учреждение тӧстелгеннең 80 чылын таныхтир. Итсе, 1943 чылда ол олған-чииттер спорт школазы чіли азылған. Анда ниик атлетика, футбол, баскетбол паза волейбол секциялары тоғынғаннар. 2005 чылдаң спортшкола Ағбанның учреждениезіне саналча. СШОР-ның чидіглері илееде. Кӧзідімге, 2004 чылда аның ӱгренҷізі Дмитрий Бурмакин Олимп ойыннарында араласхан. Пасхазы даа аймах марығларда позын турыстыра кӧзітче. Пӱӱнгі кӱнде школада 550 спортсмен саналча. Алты кізі Россияның піріктірілген командазынзар кірче. ӧмедегілер пайрамны ноябрьда иртірерге пӧгінчелер. Че улуғ сыйых оларға иділ парған тиирге чарир. Улуғ, чарых, нап-наа ниик атлетика манежі тимге сых парды. ӱлгӱдегілер спорт объектін мартта пайрамни азарлар. Аның соонда тоғыс толдыра кӱзінең парар.
Хабарҷыларға экскурсия 15 февральда ирткен. Чыылған чонға манежті Ағбанның пазы Алексей Лёмин паза СШОР-ның устағҷызы Андрей Ромащенко кӧзіткеннер. Объект ікі чардыхтаң пӱттір. Пастағызынзар кип-азах алыстырҷаң 19 пӧлік, имнег кабинеді, хазых пиктеҷең кін кірчелер. ідӧк мында администрацияа, тренерлерге, чарғыҷыларға кӧрілген пӧліктер пар. Тренажер залы хайхатхан. 30 спорт тириин США-даң ағылғаннар. Оларны хатығластар кирер алнында чахып саларға маңнантырлар. Тренажерларның кӧбізі – кӱс хосчаң тиріглер. Алексей Лёминнің чооғынаң, манежтегі осхас тренажерларны Ағбанда паза таппассың.
Манеж – спорт объектінің ікінҷі чардығы. Анда читі спорт секторы орныхча. Иң пурун чӱгӱрҷең чоллар кізі хайиин тартчалар. Ортызындағы сигіс чолның узуны 60 метр полтыр. Хайди таныхтаан Андрей Ромащенко, хысхызын спринтёрлар 60 метрге ле марығласчалар. Пу чоллардаң тоғыра стенеде стоп-маттар хызылых. Спортсменнер, табырах чӱгӱрчетселер, пас меетте тузында тохтирға маңнанминчаттырлар. Стоп-маттар оларға кинеп парбасха полысчалар. Ибіре хоза чоллар салылғаннар. Хурчағның узуны – 200 метр. Сизінгенде, устағҷыларның ӧӧн поғдархазы полға тӧзелген чабығ полча. Ол нымзах, аның амортизациязы чахсы. Чабығның пӧзік синін Ниик атлетикаҷа чоннар аразындағы федерацияның сертификады киречілепче.
Узунға сегірҷең пӧлік хабарҷыларның кӧңніне тың кірген. Анда кварцтығ хум ур салғаннар нооза. Ол кізінің иді-сӧӧгіне чапсынминча. Хумны холда тударға истіг, аны Новосибирсктең ағылғаннар. Пу секторда узунға ла нимес, ідӧк ӱс хадыллығ сегірісче тренировкалар паза марығлар иртірерге чарир. ідӧк манежте пӧзікке паза шесттіг пӧзікке сегірҷең пӧліктер пар.
Хронометражты алынҷа таныхтирға кирек. Пӱӱнгі кӱнде ол чох марығлар иртір полбассың. Андар ӧнетін камералар, табло, ноутбуктар кірчелер. Пас меетте турчатхан камера пір cекундаа ікі муң кадр итчеттір. Хронометражты садызарына 6,5 миллион салковай парыбысхан. Скалодром – манежтің халғанҷы секторы. Хайаҷа сығарында марығлар ӱс кӧрімніг полчалар. Пастағы кӧрімде кем трассаны прайзынаң табырах иртібізер, ол чиңіс тутча. ікінҷі кӧрімде спортсменнер сидік маршруттарға cығып марығласчалар. ӱзінҷізі боулдеринг адалча. Боулдерингте марығласчатхан улус пӧзік нимес хайаларға пағлар чох азахтар-холлар полызиинаң на сыхча. Ағбандағы скалодромда прай марығлар иртірерге чарир. Ол ікі объекттең пӱткен. Боулдерингнең айғасчаң скалодром улуғ нимес, алтында ӧнетін маттар тӧзел парғаннар. ікінҷі объекттің пӧзии – 13 метр. Аның пір cари табырах сығарға кӧрілген. Сидік маршруттар иртчең стене чалбах, мында зацептер кӧп. Зацеп – ӧнетін спорт тирии, аны ідӧк арған тас адапчалар. Оларға тудынып алай турып, спортсмен скалодромҷа cыхча. Зацептернің тиксі саны 900-ке читчеттір.
Хайди таныхтаан Алексей Лёмин, ниик атлетика манежін 2012 чылда ноябрьда пӱдірерге пастааннар. Спорт объектi 413 миллион артиинаң салковайға тур парған. Олардаң 352,3 миллион cалковай – муниципалитеттің хорадығлары. 60,8 миллион салковай федеральнай бюджеттең позыдылған. Ахча «Спорт – чуртас сині» федеральнай программа хоостыра кірген. Республика бюджедінең 614,7 муң салковай пирілген. Манежті пӱӱл пӱдірерге пастаан ползалар, ол пір миллиард артиинаң салковайға тур парарҷых. Он чыл аразына паалар іди ӧс парғаннар.
Наа спорт пӱдіриинде ниик атлетикаҷа паза туризмҷе школалар тоғынарлар. Чахсы оңдайлар тӧстелгенде, спортсменнер чиңістер тударлар паза рекордтар турғызарлар тіп ікінҷілес чоғыл. Устағҷылар манежте Россия чемпионаттары иртірілеріне ізенчелер. Оларның таниинаң, тиксі хазнада 3-4 мындағ манеж. Сибирьдеңер чоохтаза, чахсы объект Иркутскта пар, аннаңар прай марығлар анда иртчеңнер.
Чоохтирға кирек, хазии уйан улустаңар ундубааннар. Оларға кип-азах алыстырҷаң ікі пӧлік тимнел парған. Ағаа хоза, коляскалығ кинектерге кізіні кӧдірчеткен тирігні турғыс салғаннар. Ниик атлетиканаң пос кӧңнінең айғазарға сағынчатханнарға абонемент садызып аларға чарир. Оларны манежсер 18.00 час соонаң кир турарлар. Кізілернің ідӧк cкалодромнаң, тренажер залынаң, хазых пиктеҷең кіннең тузаланар оңдай полар. Спорт школаларының ӱгренҷілерінеңер чоохтаза, олар секцияларға тикке чӧрчелер.
Ниик атлетика манежінде пастағы марығлар 17-18 февральда иртерлер. Арға-мӧрій сыныхтағ оңдайнаң иртче. Анда 357 чиит спортсмен аралазар. Олар марыға Хызылчардаң, Железногорсктаң, Ачинсктең, Лесосибирсктең, Минсуғдаң килерлер. Хакасия ӱчӱн прай город-аймахтарның спортсменнері турызарлар.
Автор :
Майя Кильчичакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
