ЯРЫГИН ТУРНИРІ – КӰСТІГЛЕР МАРИИ
10.02.2023
Хабарлар
Наталья МАЛЫШЕВА (сол саринаң ӱзінҷізі)
Олаңай кӱрес. Чоннар аразындағы класстығ спорт узы Наталья Малышева Ярыгин турнирінде хола медаль утып алған
НАТАЛЬЯНЫҢ ЧИДИИ
Амғы туста Ярыгин турнирі олаңай кӱресче иң танығлығ марығлар санына кірче. Ол Хакасияда 1990 чылда тӧстелген. Турнирнің пастағҷызы – CCCР-ның cаблығ тренері Владимир Чарков. Владимир Ильичтің холында ікі хати олимп чемпионы Иван Ярыгин харбазарға пастаан. Итсе, Ағбанда марығ пір ле хати ирттір. 1991 чылда аны Хызылчарзар кӧзіргеннер. Специалисттер Ярыгин турнирін Тбилисидегі марыға тӧӧйлепчелер. Совет тузында пу турнирде чиңіс тутханы улуғ чидіге саналған. Ол чоннар аразындағы синде иртірілҷең. Аны «тилекейнің кічіг чемпионады» адаҷаңнар. Ярыгин турнирінде ідӧк аймах хазналарның спортсменнері устарын кӧзітчелер. Пастағы чылларда Хызылчардағы марығда иреннер ле кӱстерін сынаҷаңнар, 2002 чылда оларға абахайлар хозылғаннар. Кибір хоостыра турнир чыл сай январьда иртче.
Пістің республикада тӧстелген марығда Хакасияның спортсменнері тӧреміл араласчалар. Пӱӱл анда Наталья Малышева, Наталья Пудова, Дарья Токоякова, Валерия Мистрикова, Ольга Абрамова, Алина Сагалакова харбасханнар. Иреннердең Хакасия ӱчӱн Артур Чебодаев турысхан.
Чир-суғҷыларыбыстаң Малышеваа ла оң полды. Ол хола медальны холға кирген. Марығ тузында Наталья Юрьевна пис хати кибіске сыххан. Пастағы ікі «ыырҷыны» ол 10:0 саннаң чиңіп алған. Ӱзінҷі хабысты Милана Дадашеваа 2:2 саннаң утыр салтыр. Чарғыҷылар таниинаң, Милананың сӱмелері пӧзік синде иділгеннер. Ідӧк Наташа хырғыс паза моол спортсменнерінең тоғасхан. Пастағызын 10:0 саннаң утып алған. Азах мееттеңер чоохтаза, ол оой ла иртпеендір. Наташа, 0:2 саннаң утырчадып, тоғазығны 4:2 саннаң тоос салған. Чиңіс піcти. Чир-суғҷыбыс чоохтаан:
– Ярыгин турнирінде тӧртінҷі хати араластым. Ол тӧреміл пӧзік синде иртче. Пастағызын анда кӱзімні сынаанда, пастағыох хабыста утыр cалғам. 2018 чылда ӱзінҷі орынға сыххам. Пір чыл пазынаң кӱмӱс медальны холға киргем. Алында хырығ озариндағы кӱресчілер Хызылчарзар марыға хынып килҷеңнер. Кӧзідімге, 2019 чылда турнирде Хыдаттың, США-ның, Японияның спортсменнері устарын кӧзіткеннер. Андада азах меетте Сара Хильдебрандтха чиңдір салғам. Ол США-даң, 2021 чылда Токиода хола призер полыбысхан. Япон паза хыдат хыстары – кӱстіг кӱресчілер. Олардаң кӧп нимее ӱгреніп аларға чарир. Пӱӱл он хазнаның спортсменнері араластырлар, ол санда Белоруссияның, Киргизияның, Монголияның, Грецияның.
Чоохтирға кирек, Малышеванаң Пудова 53 кг кӧдірімде харбасчалар. Кибісте оларға тоғазарға киліспеен. Наталья Пудоваа ӱзінҷі орынға сығарға пір хаалағ читпеен тиирге чарир. Чир-суғҷыбыс, хола медаль ӱчӱн харбазып, Мария Преволакиге утыр салған. Анзы пӧзік устығ спортсмен. 2016 чылда ол Малышеваны «хыйыхтап салтыр». Моол чирінде ирткен турнирде хыстар Олимп ойыннарында аралазар ӱчӱн харбасханнар. Пістің Наташа утчатхан, че 10 секунда халғанда, Преволаки, сӱме идіп, чиңісті кӱснең алып алған. Утырыс Малышеваның кӧңнін матап тӱзіртір.
Наташа Пудованы махтирға кирек. Хакас хыс 2002 чылдаң, ол Ярыгин турнирінде ікінҷізін араласты. Пылтыр кӱзін сынаан, пӱӱл медаль ӱчӱн харбасхан. Тӧӧ чирінең сыххан спортсменнің узы ӧсче. Наташа пісті хайди даа наа чидіглерінең ӧріндірер. Малышеваның чооғынаң, абахайлар Ярыгин турниріне улуғ таллағ иртпинчелер. Пістің хазнада кӱресчі хыстарның саны кӧп нимес нооза. Иреннерге хатығ чухча. Артур Чебодаев оларның аразында хомай нимес кӧрінген. Марығның 1/4 чардығында ол Начын Монгушты силібіcкенде, «ағырчатхан» улустың ӧрінізі пу чир полбаан. Тува чонның оолғы пылтыр Россия чемпионадында кӱмӱс призер полыбысхан. Чебодаев ӱзінҷі орын ӱчӱн осетин Азамат Тускаевнең харбасхан. Европа чемпионына удурлазарға Артурның кӱзі читпиндір.
Ярыгин турнирі киречілеен: Россияда прайзынаң артых кавказтағылар харбасчалар. Олар сала ла прай медальларны чыып парыбыспааннар. 70 кг кӧдірімде ле пӱрӱт чонның оолғы Евгений Жербаев чиңіс тутхан. Тиктең нимес аны матырны чіли удурлааннар. Ідӧк пу кӧдірімде саха Константин Капрыновха оң полған. Ол хола медаль утхан. Хайди таныхтаан Наталья Малышева, мында таңнаҷаң ниме чоғыл. Кавказта кӱреснең хара кічігдең айғазарға пастапчалар. Залларда чон ӱзілбинче. 2019 чылда Наталья Юрьевнаа Алтынзархы Осетиязар сборларға чӧрерге килістiр. Олғаннар аразында тренировкалар хайди иртчеткенін пос хараанаң кӧртiр. Хыдатта паза Японияда паба-іҷелер хызыҷахтарны ідӧк 6-7 частаң секцияа пазындыр салчалар. Салтарында, тилекей марығларында олар пірдеезіне маң пирбинчелер.
МАРИЯ ТЮМЕРЕКОВА
Пӱӱлгі Ярыгин турнирі Хакасияа ідӧк Мария Тюмерекованың чиңізінең танығлығ. Ол 50 кг кӧдірімде алтын медальны холға кирген. Маша 2021 чылдаң Кемеров облазының алнын алча. Че піс аның ӱчӱн ӧрінчебіс, чидіглеріне поғдархапчабыс. Сыйыхтас соонда ол WRЕSTRҒS.RҒ сайттың хабарҷызы Асия Алимоваа улуғ нимес интервью пиртiр. Чир-суғҷыбыстың чооғынаң, Ярыгин турнирінде ол ікінҷізін араласты. Прай тоғазығлар аар ирткеннер. Пылтыр Мария ікінҷі орыннаң пӧзік кӧдіріл полбиндыр, аннаңар алтын медаль ағаа уғаа аарлығ. Ол 2023 чылда наа чиңістер тударына ізенче. Хакас хысха улуғ марығлар читпинчеттір.
Наталья Малышева ідӧк хатығластар хоостыра сағыстарынаң ӱлескен:
– Ачырғас пар, че мағаа ол-пу сағыстарға пастырарға маң чоғыл. Оолғыма ікі час, іҷее палазы хаҷан даа пастағы орында полар. Мағаа 29 час, оларның чарымызын спортха пир салғам. Тренерлерім чи нинҷе кӱс салғаннар. Владимир Гаврилович Чучунов мағаа ікінҷі паба полча. Піс спортнаң чуртапчабыс. Миннең хада Ярыгин турниріне чииттер чӧргеннер. Оларның аразында ізестіг кӱресчілер пар. Хыстарға устарын таптирға кирек, че оңдай пирілбинче. Пӱӱл чоннар аразындағы марығларда аралазарына ізенчебіс.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
