НАА ЧАПСЫХ ОЙЫН ТИМНЕЛЧЕ
Артур Марлужоков «Алтын Чӱстің» ӧӧн матырын ойнапча
Культура. В.Г.Чаптыковтың адынаң Хакас филармониязы «Алтын Чӱс» операның чабых кӧзiдиин иртiрген. Пiр чардыхтығ ойын президенттiң грантына турғызылған
Алтын Чӱс алып, чир ӱстӱнҷе чӧрiп, Алып Ханның сӧбiрезi пырозы чох ӧдiрт салғанынаңар пiлiп алча. Ол мындағ чабалны иткен Хара Ханны, Хуу Хатты чох идерге сағыныбысча. Алтын Чӱске Алып Ханның кiчiг палазын тiрiлдiрiп алар оңдай парын чоохтап пирчелер. Паланы тірілдіріп алар ӱчӱн, алыпха алтын пӱрлiг хазыңны таап аларға кирек. Аймах сидiксiнiстернi тобырып, Алтын Чӱс Алып Мӧкенi, Алып Ханның оолғын, пу чирге айландырча. Пiди тилiп пастапча ойынның полтазы. Кӧрiгҷiлер ойында алыптарның кӱрезиин, хара сағыстығ матырларның кӧйтігін, аймах хайхастарны кӧрерлер.
«Алтын Чӱс» алыптығ нымах хоостыра пазылған ойын турғызарында Хакас филармониязының симфоническай оркестрi (аннаң устапча Хакасия искусствозының саблығ деятельі, Хакасияның чон артизi Вячеслав Инкижеков), «Кӱн сузы» теелбек ӧмезi, «Каданс» хоры араласханнар.
ӧӧн матырларны Хакасияның чон артисттерi Артур Марлужоков, Мария Янгулова, республиканың саблығ артисттерi Ольга Васильева, Наталья Фоменко, Радж Мандаржап, Молат Ах хасха ойнапчалар.
Таныхтирға кирек, операда ойналчатхан кӧглер Семён Прокопьевич Кадышевтiң «Алтын Чӱс» алыптығ нымахты толдырчатханынаң пазылған. Мында чон кӧӧн классическай музыкаа килiстiре пазарында улуғ тоғыс иртiрiлген. Кӧглернi симфоническай оркестрнiң кӧгҷiлерi Ольга Кох паза Ирина Жихарева пасханнар.
Кӧрiгҷiлер пу операны 2023 чылның апрель айында кӧрерлер.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |