ХАКАСИЯ ПАЗЫНЫҢ ІЗИИ АЗЫХ
Хакасиядаң мобилизацияа тартылғаннарның ипчілері
ағырсымнығ сурығларын республика пазы Валентин Коноваловха читірчелер
Тоғазығ. Пу істеніc неделязын Хакасия пазы Валентин Коновалов республикадаң чардыхти мобилизацияа тартылғаннарның ипчілерінең паза іҷелерінең тоғазығдаң пастады
Хакасия пазы Валентин Коновалов мобилизацияа тартылғаннарның ипчілерінең паза іҷелерінең ікінҷі тоғазиин иртірген. Сурығларның ӧӧн чардығы тӧлеглерге паза хабазығларға теелген. Кӧзідімге, Саяногорсктаң килген ипчі городтаң чардыхти мобилизацияа тартылғаннарның сӧбірелерінің адынаң сурығлар пирген: 100 муң салковай пір хати кӧрілген хабазығны ам даа прайзы алғалах; кемге паза хайди тӧлелче 195 муң салковай (федеральнай тӧлег) паза чааҷының номерінҷе пірге кіндегі пос кабинедінзер кір полбинчатса, ниме идерге? Пу паза пасха даа сығысчатхан сурығларға республика пазы позы, іcтеніс паза социальнай арачыланыс министрінің тоғызын толдырчатхан Андрей Петров нандырғаннар, чааҷының тӧлеглеріне, аны мобилизациядаң айландырарына теелчеткен сурығларға – Хакасияның чаа комиссарының тоғызын толдырчатхан Николай Видяйкин.
Андрей Петровтың таниинаң, кічіг хырлас айының 21-ҷі кӱніне республикадаң чардыхти мобилизацияа тартылған 1391 иреннің сӧбірезіне 100 муң салковай пір хати тӧлелчеткен ахчаның халған чардығы ызыл парған, 67 кізінің сӧбірезіне ызылбаан, олар Россияның пасха регионнарында чуртапчалар алай мобилизацияа тартылғанын киречілебееннер. Пу регион синінде алылған хабазығ, аннаңар республика ӱлгӱлері аны алынҷа хайығда тут полчалар. Че аның федеральнай синде Россия президенті Владимир Путин чаратхан 195 муң салковайның тӧлелчеткенін хайығда тутчаң оңдайы чоғыл. Пу тӧлегҷе сығысчатхан сурығларны пӧгерінде Хакасия правительствозы арачыланыс министерствозына хайығ киректелчеткеннеңер чӧптер ле пир полча. Паза ол сурығларны чааҷаа пӧгерге искіріг хабазиинаң полысчалар: кемзер айланарға, айланысты хайди орта пазарға паза пасхазы.
– Чааҷылар хайдағ даа сурығҷа иң пурун санға алылған взводтың, ротаның командирінзер айланарға киректер: тӧлеглер, хазии паза даа пасха сурығларҷа, – хайығ айландырған республика пазы. – Андар айланған соонаң сурығ пӧгілбинчетсе, піс аны айныдарға полысчабыс. Ол пӧгіннең Хакасиядаң чардыхти мобилизацияа тартылғаннар ӱгредіге ызылған орында, Омск городта, республика правительствозының кізілері тӧреміл тоғынған, амды анда правительство аппарадының устағҷы орынҷызы Игорь Ефремов.
Тоғазыға килген ипчілер аразында азах аар ипчі полған. Cӧбіре алынҷа турада чуртапчатханнаңар, кӱннің сай пес одынарға киліcче, че ағаа аар ниме хабарға чарабас. Хости полысчаң туған-чағыннары чоғыл. Ипчі нииктенгенҷе хада хонғанын позыдар оңдай чоғыл ба тіп сурған. Валентин Олеговичтiң таниинаң, кізіні чардыхти мобилизацияа тартылар тусты законда кӧрiлген соона салдырҷаң сылтағлар чох ибзер позытпастар. Аннаңар муниципальнай пӱдістің устағ-пастаана, Ағбан городха, паза орындағы чонға социальнай хабазығ службазының специалисттеріне пу сӧбірее полысчаң оңдай табарға чахаан. Андағ оңдайларның пірсі – волонтерлар полызии.
Чурт-коммунальнай полызығларны аларына сурыныс пічиин алынҷа пазарға киректелче, че иреннің чардыхти мобилизацияа тартылғаннаңар пічікті хати чығарға киректелбинче. Ағаа хоза, хазна хабазии чардыхти мобилизацияа тартылған кізінің санға алылған адрезінҷе читірілче: кӧзідімге, ирен сӧбірезінең хада арендаа суурылған квартирада чуртаан, че паспортта аның чурт орны іҷе-пабазының ибінде кӧзіділген. Кӧрілген хазна хабазии іҷе-пабазына читірілер.
Пір ипчі чӱрексееніне харах частарын тут полбаан. Ипчі кічіг палаларынаң ибде одырча. Аның хада хонғаны чааҷының «чал ахчазын» асхынах алтыр. Мыннаң мындар хайдағ ахчаа чуртирын пілбинче. Пірдең андағ чиит сӧбірелер кӧп: кем пос чуртында нимес чуртапча паза кічіг палалығ ибде одырча. Пу киректерні истіп, Валентин Коновалов сӧбірелернің сурығларын пӧгерге полызарға чахаан, ол санда тӧлеглерҷе.
– Мин килчеткен понедельникте, кічіг хырлас айының 28-ҷі кӱнінде, мобилизацияа тартылғаннарның сӧбiрелерiнең тоғазығ иртірербін, ағаа республика правительствозының порталында (www.r-19.rғ) алай пу телефоннарҷа азынада пазын саларға чарир: 8 (3902) 299-168, 299-189. Аннаң пасха, город-аймахтар пастарына ідӧк тоғазығлар иртірерге чахыпчам. ӧӧн сидіксініcтер чуртағҷыларға искіріг чидіспинчеткенінең палғалыстығ, – теен Валентин Олегович.
Чир-суубысты арачылирға хығыртылған иреннернің ипчілерін паза пір сурығ cағыссыратча: оларны политика «ойыннарына» кире тартарға кӱстенчеткеннері. Халых пірігістері, регион ӱлгӱлерінің тоғызына чӧпсінмин, тӧреміл суум-саам кӧдірерге кӱстенчелер, ол санда пу оой нимес тусты тобырчатхан сӧбірелер полызиинаң. Пу танығ хоостыра Валентин Коновалов теен:
– Ӧӧні – ӱрӱкпеске, андада ла хазна паза армия кӱстіг полар. Регион устағ-пастаа нинҷе пар кӱзінең полызығ читірерге кӱстенче.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |