НАА КОМИТЕТ ТӦCТЕЛЕРГЕ АЙАБАС
Ӧӧркі Чӧп. Хакасияның ӧӧркі Чӧп президиумы теестегі чыылиин иртірген. Президиум чыылии Владимир Штыгашевтің устаанынаң ирткен
Чыылығның пастағы сурығлары санында мобилизацияҷа хығыртылған паза Россияның Тирігліг кӱстерінде служба иртчеткеннерге хоза хабазығ пирҷең оңдайлардаңар законзар алызығлар кирчеткен закон проекті полған. Закон проектінең Хакасияның істеніс паза социальнай арачыланыс министрінің тоғызын толдырчатхан Андрей Петров таныстырған.
Аның искіриинең, кирілчеткен алызығлар социальнай хабазығ алҷаңнарның санын алғыдар. Чоох парча Хакасияда чуртаан паза мыннаң сығара мобилизацияа хығыртылған, че пічік хоостыра пасха регионда чуртапчатхан чіли санға алылған чааҷылардаңар. Андағларның саны ас полбиндыр – 60-ҷа кізі.
– Ол кізілер пістің республикадаң хабазығ алып аларлар, анаң – пічікке кирілген субъекттең. Андағ ниме пол парбас? – сурығ пирген ӧӧркі Чӧп кнезінің пастағы орынҷызы Юрий Шпигальских.
Андрей Петров андағ ниме полбас тіп ізендірген, ол кирек хатығ сыныхтағда тудылча осхас.
ӧӧркі Чӧп кнезі Владимир Штыгашев республиканың ахчалығ хабазии мобилизациядағыларның хайдағ туған-чағыннарына пирілерін тӱптестір саларға чӧпнең сыххан. Аның чооғынаң, пу сурығҷа аймах-пасха хырыс-табыстар сығысча. Піреезiнің ууҷазы алай чаҷазы ол ахчаны піске ноға пирбинчезер тіп хысча осхас. Аннаңар пу сурығны орталадып, прай чарыт саларға кирек тіп пӧгін турғысхан Владимир Штыгашев.
Теестегі сурығ орындағы пос устаныс органнарына ӧкіс палаларға социальнай хабазығ пирҷең сурығларны толдырарынҷа хазна полномочиелерін пирердеңер республика законынзар алызығлар кирердеңер закон проекті полған. Закон проектін Шира аймааның депутаттар чӧбі кирген, таныстырған – Шира аймаа пазы Андрей Диринг.
Хысхаҷахти чарытса, закон проектінде пазох ла ӧкістерге чурт пӱдірерінҷе полномочиелерні республикаа айландырардаңар чоох парча. Чоохтирға кирек, муниципальнай пӱдістернің пу пастағы кӱстенізі нимес, ӧӧркі Чӧпсер мындағ кӧстегліг закон проекті кирілген полған.
Владимир Штыгашевтің кӧрізінең, муниципальнай пӱдістернің холында полномочиелер ідӧк тее кӧп халбаан.
– Хазых хайраллиры республика холында, ӱгредіг – ідӧк, – таныхтаан ол. – Ам ӧкіс палаларға чурт пӱдірерінҷе полномочиелердең тоғырланчазар. Сірер чи нименең айғазарзар?
Чыылығда закон проекті чахсы тимнелбеені таныхталған. Кӧзідімге, аның чарыдығлығ пічиинде нимедеңер закон проекті, хайдағ аның кӧстее пазылбиндыр. Аннаңар ӧӧркі Чӧп президиумы закон проектін чаратпаан, читіре тоғынарға ызыбысхан.
Пу чыылығның паза пір хайығлығ сурии «Хакас Республиканың ӧӧркі Чӧп комитеттерінеңер (комиссияларынаңар)» республика законынзар алызығлар кирчеткен закон проекті полған. Хайди чарытхан конституционнай законодательствоҷа, хазна пӱдіриинҷе, законностьча паза правопорядокча комитет кнезі Светлана Могилина, алызығлар пістің законны федеральнайға килістіре тӱптестірер кӧстегнең кирілчелер.
Алызығларның пірсі, тізең, ӧӧркі Чӧптің пӱдізін алыстырарынаң палғалыстығ. Чоох парча мандат комиссиязын паза регламентче комиссияны пірге піріктірердеңер, ол «регламентче, мандат сурығларынҷа паза депутат этиказынҷа комитет» тіп адалар. Олох туста закон проектінҷе ӧӧркі Чӧпте наа комитет тӧстирі кӧрілче – чииттер политиказынҷа, туризмҷе, физкультураҷа паза спортча комитет.
Наа комитет тӧстирі хазна амғы туста кӧзіділген сурығларға улуғ хайығ салчатханынаң палғалыстығ. Комитет тӧстеені Хазна Думазынаң, пасха регионнардағы закон сығарҷаң органнарынаң пу сурығларҷа пірге тоғынарын тӱзімніг идер тіп таныхтаан Светлана Могилина.
Владимир Штыгашев комитет-комиссиялар саны олох халарын паза закон проекті наа ӧӧркі Чӧптің пӱдізіне теелерін таныхтаан. ӧӧркі Чӧпсер табығлар пазағы чылда иртер нооза. Президиум закон проектін пазағы чылның январьында иртер сессияның ӱзӱриине сығарарға чарат салған.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |