ХАКАСИЯА ТУЗАЛЫҒ ІКІ ЧӦПТЕЗІГ
Тоғыс чорығы. Хакасия пазы Валентин Коновалов кічіг хырлас айының 10-11-ҷі кӱннерінде Москвада тоғынды
Транспорт инфраструктуразын тилідерге хабазығ полар
Москвада Хакасия пазы Валентин Коновалов Федеральнай чол агентствозының устағҷызы Роман Новиковнаң тоғазығда Ағбан – Бийск транспорт чолына, тірӧс сетьтерін паза Ағбан агломерациязын тилідеріне, Ағбан – Ах тобырах чолның паза аның тахталарының синіне паза пасха даа орыннарға теелчеткен сурығларны ӱзӱрген. Росавтодор Хакасияа пу кӧстегҷе хабазарын узарадар.
Хакасия пазы Валентин Коноваловтың таниинаң, Хакасия правительствозы чолларны тилідерінҷе паза транспорт инфраструктуразын иптирінҷе тоғыстарны ӧткін толдырча.
– Пістің республика – чахсы чолларҷа Сибирьде 3-ҷізі паза Россияда 19-ҷызы. Халғанҷы 3,5 чылға пістің региондағы чолларны тиксі тыхтирына паза пӱдіреріне хорадығлар пис хати ӧс парғаннар, – теен Валентин Олегович.
Тоғазығ салтары – Росавтодорның паза Хакасия правительствозының аразында республиканың транспорт инфраструктуразын тилідердеңер меморандумда хол салылғаны. Анда 2023 – 2027 чылларда хада-пірге тоғынар ӧӧн кӧстеглер таныхтал парған.
«Газпром нефть» предприятиелерге полызар
Кічіг хырлас айының 11-ҷі кӱнінде Валентин Коновалов «Газпром нефть» устаа кнезі Александр Дюковнаң тоғасхан. Олар Хакасия правительствозы паза «Газпром нефть» тиксі сурығларҷа хада-пірге тоғынардағар чӧптезігде хол салыбысханнар.
Компания Омск паза Москва областьтарындағы заводтарында техникаа сығарылчатхан хайахтарны республиказар кӧні читір турар.
– Хакасияның «Газпром нефтьнең» тоғынғаны регионның илееде предприятиезіне паза пірігізіне техникаа импорт сӱрткі ниме-ноозын паза хайахтарын алыстырарынҷа сурығны пӧгерге, промышленностьтың, энергетика, транспорт паза ЖКХ комплекстерінің тоғызын иптирге полызар, – таныхтаан Валентин Олегович.
Iдӧк «Газпром нефть» пістің предприятиелерге G-Laі сервиснең тузаланар ондай пирер. Компанияның санның платформазы арған интеллект полызиинаң хайахтарны істес полча паза техниканы иптіг тудынарынҷа чӧптер пирче.
– «Газпром нефть», Россияның сӱрткі-хайах сығарчатхан иң килкім компанияларының пірсі, региондағы предприятиелерге тимде ниме-нооны читіргенінең пасха, ідӧк аймах техникаа киректелчеткен хайахтарны алынҷа рецептураларҷа тимнеп полар. Ағаа хоза, Хакасияның предприятиелері тиріглерні сыныхтирынҷа эксперт чарадиинаң тузалан полар, ол Россияның кӧбізі регионнарында илееде промышленность предприятиезінде позының пӧзік тузазын кӧзіт пирген, – таныхтаан Александр Дюков.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |