ЧИР-СУҒҶЫЛАРЫБЫС ТИКТЕҢ ХАТЫҒЛАТХАННАР
Пӱӱл Асхыстағы мемориал комплексінде репрессияа хаптырылғаннарға чарыдылған хумартхы таста хоза плита азылған, анда 11 кізінің ады пазыл парған. Хумартхылас мероприятиезiнде сӧс пирілген Асхыс аймаа пазы Абрек Челтыгмашевке.
– Репрессиялар – хазнабыстың ӱлгӱлерінің иң улуғ алҷаазы. Андада чоныбыстың иң хыйғалары, илбек сағыстығ кізілерi, тайма хоптарҷа пыролатыртып, ызыға ыстырғаннар. Кӧп кізі атырт салған. Совет Союзының тирігліг кӱстерін не санға алза, Константин Рокоссовский осхас маршаллар тайма хоптарҷа хатығлатханнар. Ол туста хазнабыс миллионнар кізіні чідір салған. Ол сылтағнаң СССР тилізінде пасха хазналардаң халчатхан, – таныхтаан Абрек Васильевич. – Асхыс аймаанда 2017 чылда репрессияа хаптырылғаннарға чарыдылған хумартхы тас азылған. Анда 804 кізінің ады пазыл парған. Репрессияларда Хакасияның иң хыйға оолларының чуртазы ӱзілген. Пістің нациябыс улуғ нимес. Чоныбысха iдӧк Илбек Ада чаа улуғ ӱрег ағылған. Аның алнында хакастарның саны туваларнинаң ікі хати кӧп полған. Че 1941 чылда кічіг хырлас айында хакастарны, мобилизацияа тартып, Москва ӱчӱн чаалазыға тастабысханнар. Ол туста чоныбыс пірее 50 процентін чідір салған. Совет чонының репрессиялар тузындағы киректер Россияда паза хаҷан даа полбазын.
Асхыс аймаандағы ветераннар чӧбінің кнезі Алевтина Тохтобинаның чооғынаң, хазнабыста репрессиялар 1937-1938 чылларда пасталған тіп таныхталча. Че Хакасияда ол киректер аның алнындох ирткеннер. Коллективизация тузында кресеннерні пірігістерзер кир сыхханнар. Кізілер, тізең, тоғыр полғаннар. Андада пай кресеннернің ӱлӱзі 50 %-ке читкен. Олар хоныхтарын орта апарғаннар, че кӧбізі ызыға ыстырған. Аның ӱчӱн чаа алнындох сидік чуртас полған, чаа соонаң чон хониин кӧдіреріне кӧп кӱс салылған. Ол туста ӱлгӱдегілер нация политиказын чарлабысханнар. Ол сылтағнаң чоныбыстың хыйға кізілері хатығлатханнар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |