КНЕСКЕ ВЛАДИМИР СОЛОВЬЕВ ХАТИ ТАБЫЛҒАН
Хакасия делегациязы Владимир Cоловьёвнаң хада
Съезд. Хакасия делегациязы Россияның журналисттер пірігізінің Хііі съездінде араласхан
Россияның журналисттер пірігізінің ХIII съезді 29 октябрьда Москвада ирткен. Хакасиядаң андар пис кізі чӧрген: «Россияның журналисттер пірігізінің» Хакасиядағы пӧлии кнезі Ольга Ширковец, «Россияның журналисттер пірігізінің» Хакасиядағы пӧлиинің устағ-пастаа кізізі Светлана Герасименко, «Земля Таштыпская» газетаның ӧӧн редакторы Виктор Пермяков, СТЭМИ Саянскай техникумның пресс-кіні устағҷызы Евгений Твардовский паза «Хакас чирі» газетаның ӧӧн редактор орынҷызы Альберт Толмашов. Съездтің тоғызында Россияның прай регионнарынаң килген 320 артиинаң делегат араласхан.
Танығлығ киректернің пірсі – хазнаның тӧрт наа регионында, ДНР паза ЛНР республикаларда, Херсон паза Запорожье областьтарында, Россияның журналисттер пірігізінің пӧліктері азылғаны. Съездте пастап ол наа пӧліктернің устағҷыларына чоох пирілген.
ДНР-ның журналисттер пірігізінің кнезі Виктор Петренко республикада хабарҷылар тың чидіспинчеткенінеңер искірген. Ол Россияның пасха регионнарындағы журналисттерні ДНР-зар командировкаа кил турарға хығырған.
Запорожье облазының журналисттер пірігізінің кнезі Вадим Кучер орындағы хабарҷыларға хайдағ сидік оңдайларда тоғынарға килісчеткенінеңер чоохтап пирген. ӱр ниместе «За Медиа» медиахолдинг офизінде чара чачырас полтыр.
– Піcтің редакцияның кӧзенектері хыринда автомобильні, артыс салып, чара чачырадыбысханнар, – искірген ол. – Бизнес-кіннің ікі хадылында, хайда піс орныхчабыс, тимір ізіктер картоннаң иділген не чіли сығара учуғыбысханнар. Чара чачырасха 12 кізі палығлат салған. Харын прайзы изен-хазых халған.
Россияның журналисттер пірігізінің кнезі Владимир Соловьёв, ирткен 5 чыл аразына ниме иділгенінеңер сан пиріснең чоох тудып, пірігіс хабарҷыларны піріктірер паза арачылир пӧгінін узаратчатханын таныхтаан. 2018 чылдаң сығара «Россияның саблығ журнализі», «Россияның саблығ палғалыс паза искіріг тоғынҷызы» аарластығ аттар пиріл сыххан. Журналисттерге хабасчаң чыындылар тӧстелген, профессия ветераннарына полызығ пирілче.
Пірігіс «Инфорумнар» иртір сыххан, анда хазнаның ӧӧн СМИ редакторлары, саблығ журналисттері, чӧптерінең ӱлезіп, мастер-класстар иртірчелер. Хабарҷыларға аймах-пасха гранттар пирілче. Амғы туста чааҷы репортерларын тимниріне хайығ салыл сыххан.
Владимир Соловьев амғы ӧнетін чаа операциязы тузында журналисттернің тоғызы улам хорғыстығ пол парғанын таныхтаан. Пу чылда ла 55 хабарҷы, тоғызын толдырчадып, чуртазын чідірген. Аннаңар Россияның журналисттер пірігізі чаалазығ орыннарында тоғынған хабарҷыларны чаалазығ араласчыларына тиңнир чӧпнең сыххан. Делегаттар ол чӧпті законнаң тыыт саларынаң чарасханнар.
Съездтің ӧӧн сурығларының пірсі чағынғы 5 чылға Россияның журналисттер пірігізінің кнезін табары полған. Пірігістің устағҷызына Владимир Соловьёв (пір ӱннең) хати табыл парған.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |