ОЛ – МИНІҢ ӰЛӰЗІМ ПАЗА ЧУРТАЗЫМ
30 октябрьда – Автомобиль паза городтағы пассажир транспорты тоғынҷызының кӱнi. Пу ӱлӱкӱн пiстiң хазнада 46-ҷы хати таныхталар. Пӱӱнгi матырыбыс троллейбус водительi Григорий Топаков полча. Ол тоғызынаңар паза ноға троллейбус водительлерi аразында кӧбiзi ипчiлер тоғынчатханнаңар чоохтап пирген
Григорий Топаков 2008 чылдаң сығара «Троллейбус управлениезi» муниципальнай унитарнай предприятиеде (МУП-та) тоғынча. Ол Ағбан пилтiрi аймааның Томыҷахтар аалында тӧреен-ӧскен. 11 класс тоозыбысхандох, «Троллейбус управлениезi» МУП водительлерге тикке ӱгретче тiп пiлiп алған. Чарым чылҷа ӱгренiп алғанда, тоғысха кiрiбiскен. Тоғысха кiрер алнында сыныхтағ ирткен. Амғы туста троллейбус водительлерi чыл сай сыныхтағ иртчелер.
Амды Григорий Топаков 1 класстың троллейбус водительi полча паза троллейбустың прай маршруттарынҷа чӧрче.
– Пiстiң тоғыс кӱнi ирте пасталча. Пӱӱн 1№ маршрутха 6.41 часта сыххам. Аннаңар 5.00 частох турарға кирек. Ағбан городтың тастында алай хости аалларда чуртапчатханнар уламох ирте турчалар. Тоғынҷыларны тоғыстағы автобус тарт чӧрче. Ағыл килче паза апар салча. Кӱннiң cай смена алнында имнег сыныхтаан иртчебiс.
Троллейбуста наа ла тоғынып пастаанымда, ирте турарға аар полҷаң. 14 чыл тоғын салып, ӱгрен парғам. Пу тоғыс кӧңнiме кiрче. Тиктең нимес троллейбус водительi полып iстенчем тiп сағынчам. Пасха даа транспортта водитель поларҷыхпын, че мин троллейбуста тоғынарын таллап алғам. Ол минiң ӱлӱзiм паза чуртазым полча тiп санапчам, – сағыстарынаң ӱлесче Григорий Топаков.
Троллейбус водительлерiнiң ӧӧн сидiксiнiзi – ол чол хыринда турғыс салған машиналар харығ полчатханы, чолда автомобильлер саны ӧсчеткенi. Григорий Топаковтың таниинаң, машиналар саны табырах ӧсче. Наа ла тоғынып пастаанда, олар хай-хай асхынах полғаннар. Амды кiзiлер, 18 час толдырзох, водитель правазын алып, пос машиназынаң чӧрерге сағынчалар. Водитель правазын наа ла алып алған, чол чӧрiзiне кӧнiккелек кiзiлер илееде.
Полған на сменада водительлернiң маршруттары алысча. Иң сидiк маршрут – Мир орамазынзар тахтаҷа парчатхан чол. Хысхыда ол чолда айғы полча, аннаңар троллейбус чахсы чӧр полбинча.
Григорий Топаков, «Троллейбус управлениезiнде» водитель полып, ӧӧнiнде ипчiлер тоғынчатханынаңар чоохтап пирген:
– Троллейбус оодыл парза, аны тыхтабинчабыс, тегiлектер суурбинчабыс. Пу тоғыснаң слесарьлар айғасчалар. Пiс линиядағы улуғ нимес сайбағларны тӱзетчебiс. Аннаңар даа троллейбус водительлерiнiң чарымызынаң даа кӧп ипчiлер тоғынча полар. Автобус водительлерi, тізең, автобусты постары тыхтапчалар, анда ипчiлер пiр дее тоғынминча.
Троллейбус водительiне кондукторға полызарға киректелче. Троллейбуснаң ӧӧнiнде улуғ частығлар чӧрчелер. Оларға троллейбуссар кiрерге кондуктор хабасча, че кинек кiзее уламох аар, аннаңар водитель полысчаттыр.
Григорий Топаков троллейбуснаң даа, электробуснаң даа чӧрче. Хайзынаң чӧрерi пасхазы чоғыл тiпче ирен.
Профессия ӱлӱкӱнi чағдапчатханда, Григорий Топаков хада тоғынчатханнарны алғыстабысхан:
– Хакасияның паза Россияның прай водительлерiн ӱлӱкӱннең алғыстапчам!
Чолҷа ситкiп чӧрiңер паза чол правилоларына тудыныңар. Прайзына часка паза пик хазых алғапчам!
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |