Танығлығ кӱн. Чол хонии тоғынҷылары кӱнiне удур Хакасияа уғаа танығлығ кирек полған – «Енисей» Р-257 хазна чолының 389 км – 397 км кизегi тиксi тыхтағ соонаң пайрамни азылған

 «Енисей» Р-257 Хызылчар – Ағбан – Хызыл чолның 9,3 километр кизегi тиксi алыстырыл парған. Iкi полосалығ чӧрiстiң орнына тӧрт полоса тӧзелген. Амды чол чӧрiзi iкi хати алғыдылған, пiр сутка аразына мында 20 муң азыра  машина ирт полар. Чол хастада чарытхыны ӱзӱрлеҷең фонарьлар, сиден паза сууластаң арачылапчатхан узуны 4 километр экраннар турғызылғаннар.  

Чолны тыхтирына 2 миллиард салковай хорадылған. Аны «ПК ДСУ» ООО паза «Энергопроектсервис» ООО подряд организациялары пӱдіргеннер. 

Чолның пайрамни азылғаны «Чол-2022» чоннар аразындағы кӧзiдiг-форум иртчеткен туста ирткен. Телемост оңдайынаң палғалызып, ӱс регионда чоллар пайрамни азылғаннар: Хакас Республикада, Пермь крайында паза Свердловск облазында.

Федеральнай чол агентствозының пастығы Роман Новиков видеоселектор палғалыс пастыра ӱс регионны наа чоллар азылчатханынаң паза чолҷыларны ӱлӱкӱннең алғыстаан: 

– Чол хонии тоғынҷылары ӱлӱкӱнiне удур наа объекттернi азары паза тузаланысха кирерi кибiрге кiр парған. Пӱӱн «Чол-2022» кӧзiдiг хоостыра форумның прай араласчыларынаң хада пiс Хакасияда Р-257 чолның тоғыс километр чардығын азыбызарға тимдебiс. Тыхтағ соонаң ол пастағы техническай категориялығ, тӧрт чӧрiстiг чол пол парған. Мындағ чахсы тоғыс паза салтарлар ӱчӱн тыхтағда араласхан чолҷыларға, проектировщиктерге, проекттернi хайығда тутхан кiзiлерге алғызым читiрчем.

Хакасия адынаң республика пазы Валентин Коновалов чоох тутхан. Аның таниинаң, «Енисей» чол Хакасияны хонҷых регионнарнаң, Тува Республиканаң паза Хызылчар крайынаң, палғалыстырча.

– Улуғ алғыс Россия президентiне, хайзы федеральнай программаларның паза национальнай проекттернiң тӧстегҷiзi полча, Федеральнай чол агентствозына паза пу проекттi чуртасха кирерiнде араласхан прай специалисттерге. Ол Хакасияа уғаа кирек, регионның экономика паза садығ тилiзiне теелер нооза. Пiстiң алныбыста улуғ пӧгiннер, хайзыларын пiс хада толдырарбыс, – таныхтаан Хакасия пазы Валентин Коновалов.

Чол пайрамни азыл парған соонда регион пазы чолда тыхтағ тоғыстарын апарған кiзiлерге «Федеральнай чол агентствозының «Енисей» автомобиль чолларының устанызы» учреждение пӧлиинiң директоры Никита Бекетовха паза «ПК ДСУ» ООО-ның чол-транспорт машиналарының машинизi Игорь Балашха  Хакасия Правительствозының сыйыхтарын читiрген. «ПК ДСУ» ООО-ның чол-транспорт машиналарының машинизi Владимир Гордиенкаа, чол тоғынҷызы Владимир Бутенкаа, таарлағ автомобильнiң водительi Иван Левадинге, механик Николай Арнеге, «Энергопроектсервис» ООО-ның электротехническай лабораториязының пастығы Сергей Анищенкаа «Енисей» автомобиль чолларының федеральнай агентствозының алғыстас пiчiктерi читiрiлгеннер.

Хакасияның транспорт паза чол хонии министрi Дмитрий Василиади «Энергопроектсервис» ООО-ның директор орынҷызы Владимир Каратаевке, ӧӧн инженер Владимир Ощепковха, водитель Алексей Ковенковха регионның транспорт паза чол хонии министерствозының алғыстазын пирген.

«Федеральнай чол агентствозының «Енисей» автомобиль чолларының устанызы» учреждениенiң пастых орынҷызы Игорь Анциферов прайзын мындағ танығлығ кӱннең алғыстаан:

– Пiс «Хорғыс чох чахсы чоллар» нацпроекттiң «Хазна магистраль чолларының тилiзi» хазна проектiн тузында паза чахсы толдырыбысхабыс. Ол прай сыныхтағларны иртiбiскен. Хайди таныхтаан регион пазы, пӱӱн чол чӧрiзi iкi хати ӧс парар. Анзы саайлар санын хызырыбызар. Амды Хакасияда пу иң чахсы чол. Чолларны тиксi паалаза, республиканың чоллары хомай нимес. Прай чолҷыларны ӱлӱкӱннең алғыстапчам, сӧбiрелерiңе пик хазых паза часка алғапчам!

– Пу чол Хакасияа ла нимес, Хызылчар крайының ӱстӱнзархы аймахтарына паза Туваға уғаа кирек. Саайлар полбас ӱчӱн, чол хастада чарытхы тартылған. Чол алғыдылған сылтаанда, уламох кӧп таарлағ тартарына оңдай пар. Анзы садығны тилiдерге полызар. Чол хастада сууластаң арачылапчатхан экраннар полызиинаң чол хыринда чуртапчатхан чонға суулас истiлбес, – сағызынаң ӱлескен Валентин Коновалов.