«Хазых хайраллиры» нацпроект. Республиканың онкология диспансерiнiң радиология корпузы азылған. Анда ракнаң ағырчатхан чуртағҷылар уғаа кирек имнег полызиин ал поларлар

РАДИОЛОГИЯ КОРПУЗЫ 2019 ЧЫЛДА ПӰДIРIЛIП ПАСТААН. АНЫ РЕСПУБЛИКАДА ПӰДIРЕР ӰЧӰН, ХАКАСИЯ ПАЗЫ ВАЛЕНТИН КОНОВАЛОВ ФЕДЕРАЛЬНАЙ КIНДЕ АНЫҢ КИРЕКСIНIЗIНЕҢЕР ИСКIРЕРГЕ КИРЕК ПОЛҒАН. РОССИЯНЫҢ УСТАҒ-ПАСТАА, РЕСПУБЛИКА ӰЛГӰЗIНЕҢ ЧАРАЗЫП, ХАКАСИЯДА РАДИОЛОГИЯ КОРПУЗЫН ПӰДIРЕРГЕ ЧАРАДЫҒ АЛЫП, АНЫ «ХАЗЫХ ХАЙРАЛЛИРЫ» НАЦПРОЕКТКЕ КИРГЕН.

Аның пӱдiриине паза андар амғы тусха килiстiре оборудование аларына 1 миллиард 600 миллион салковай артиинаң хорадылған! Пӱдiрiг тоғыстары парчатхан туста федеральнай кiн республиканы сыбыра хайығда тутхан. Хакасия ӱлгӱзi, тiзең, социальнай объект ӱчӱн улуғ нандырығда полған, хорадығлары даа килкiм.

ЧЕ АМДЫ РАДИОЛОГИЯ КОРПУЗЫ ПӰДIРIЛ ПАРДЫ, ЛИЦЕНЗИЯ ХОЛДА ПАЗА ОЛ ПАСТАҒЫ ПАЦИЕНТТЕРНI ИМНИРГЕ ТИМДЕ.

Амды чуртағҷыларның постарында рак парына чiгленiс полза, оларға наа учреждениеде толдыразынаң сыныхтаныбызарға чарир. Диагностикадаң пасти лучевой терапияа теере. Таныхтирға кирек, амға теере кӧп кiзi пу ағырығ позында парын пiлiнмин халча, ол, тiзең, прай ит-ханҷа тарап парыбысча. Имненерге удаа орай пол парча...

Радиология корпузы пациенттернiң ағыриин иртеезiн iлезiне сығарарға паза табырах имненiп пастирға оңдай пирче. Имнег полызиин тузында алза, тiзең, хазыхтанып аларға чарир. Радиология корпузы азылғаны республика чуртағҷыларына уғаа танығлығ кирек. Аның пайрамни азылғанында Хакасия пазы Валентин Коновалов араласхан.

– Пу пӱдiрiгнi прай республика хайығда тутхан, неке. Лицензия аларын ӱр сахтаабыс. Амды ол Хакасия чуртағҷыларына имнег полызиин толдыразынаң пирер. Пiстiң iзiктерiбiс прайзына азых. Ол санда Тува паза Хызылчар крайының чуртағҷыларына. Мындағ оборудование Россияның ӧӧн онкология имнег тураларында даа чоғыл тиирге чарир, – таныхтаан чооғында Валентин Олегович.

Анда ӱгредiг-методика кiнi, радиотерапия, топометрия пӧлiктерi паза пасха даа имнег кабинеттерi кӧп. Хайди чоохтапча онкология диспансерiнiң ӧӧн имҷiзi Олег Борисов, анда артыхтаң артых аарлығ оборудование турғызылған – ол диагностика аппараттары, компьютер томографы, маммограф, линейнай ускоритель паза даа пасхазы.

Радиология корпузының кiнi алай ба чӱрее тиирге чарир – ол «Электроинфинити» линейнай ускоритель. Ол, пациенттiң пасха органнарына теңмин, сіске кӧнi теепче. Ол имҷектегi, ЖКТ-дағы, миистегi, ӧкпедегi паза даа пасха органнардағы рак. Имнег учреждениезінде мындағ iкi оборудование турча, полғанының на позының кӱзi. Iкiнҷiзi тирең орныхчатхан сісті имнепче. Наа оборудованиеде терапияны даа иртерге табырах – 5 минутаа теере.

Мындағ нап-наа оборудованиелернең тоғынарға, пациенттернi имнирге 35 имҷi, аймах-пасха профильлiг специалисттер паза ортын имнег персоналы тимнелген. Хайди чоохтапча Хакасияның хазых хайраллаҷаң министрi Олег Ананьевский, радиология корпузы пӱдiрiл сыххандох, министерство кадрлар суриин пӧгiп пастаан. Имҷiлернi паза специалисттернi Хакасияда ла нимес, пасха даа регионнарда тiлирге, республиказар тартарға килiскен.

– Онкология диспансерiне кирек специалисттернi табарға, оларны тимнеп аларға сидiк полған. Пу кӧстегҷе кӧп cтудент ӱгренминче. Пiссер Томсктаң имҷiлер килерге кирек полғаннар, че сӧбiреде алызығлар пол парғанда, олар кил полбааннар. Анаң Якутиядаң имнег физиктернi тартып алғабыс. Таныхтирға кирек, имнег физик специалисттер пiстiң регионда хаҷан даа полбааннар. Аннаңар пiс оларны уғаа аарлапчабыс. Iдӧк радиотерапевттi, рентгенологты, узиологты радиология корпузынзар тоғынарға тартып алғабыс. Мыннаң мындар пiс имнег учреждениезінзер имҷiлернi тимнирiн узарадарбыс паза квалификацияларын кӧдiрербiс. Таныхтирға кирек, полған на оборудованиенең iкi специалист теестезiп iкi сменанаң тоғынар, – искiрген Олег Ананьевский.

Наа имнег учреждениезінзер Якутиядаң iкi имнег физик килген. Ол Ая Габышева паза Яна Кардашевская. Чиит специалисттер лучевой терапияның планын тимнирлер, компьютер томографиязында разметка идерлер. Тоғыс уғаа нандырығлығ. Пациент лучевой терапияны хайди иртiп алары оларнаң палғалыстығ. Мында полған на миллиметрнi хайығда тударға кирек паза даа пасхазы.

Чиит имҷiлер М.К.Аммосовтың адынаң Алтынзархы-iскеркi федеральнай университеттi пӱӱл тоосханнар. Саха (Якутия) Республикада онкология диспансерi парох, че анда пос тоғыс орны чох полған.

– Пiстi Хакасиязар хығырғаннарында, сах андох килерге ынабысхабыс. Мында пiстi наа оборудованиенең тоғынарға ӱгреткеннер, пiлiзiбiстi сыбыра кӧдiрчебiс. Анзы пiске пациенттернi табырах имнирге полызар. Онкология ағыриинда ӧӧнi – аны ирте iлезiне сығарары паза орта имнирi. Терапия ағаа улғаадарға пирбинче паза онкология клеткаларын чох итче, – чоохтапча чиит физик Яна Кардашевская.

Радиология корпузы пайрамни азылғанында Хакасия пазы Валентин Коновалов республиказар тоғынарға килген Ая Габышеваа паза Яна Кардашевскаяа квартира клӱстерiн читiрген. Амды чиит физиктернiң пiр пӧлiктiг квартиралары пар. Оларға чурт суриинаңар сағыссырирға кирек чоғыл.

Онкология диспансерiнiң радиология корпузы тоғынып пастаанда, ракнаң ағырчатхан пациенттерге имнег полызии прай мында пирiл турар. Амға теере хирургия, иммунотерапия полызиин иртiп, олар лучевой терапияа пасха регионнарзар пар турҷаңнар, ӧӧнiнде Хызылчарзар. Тус чiдiргенi, тiзең, пу пациенттерге уғаа аарлығ.

Хайди искiрген диспансернiң ӧӧн имҷiзi Олег Борисов, амды Хакасияда 12 муң азыра кiзi анда санда турча! Ол уғаа кӧп. Пу сан сыбыра ӧсче.

Радиология корпузының имҷiлерi паза специалисттерi пiлiстерiн сыбыра тилiт турарлар. Анзына учреждениеде прай ниме тимнелген. Наа корпуста ӱгредiг класстары пар, хайда студенттер дее, имҷiлер дее ӱгредiг алай практика ирт турарлар. Iдӧк конференция залы кӧрiл парған. Анда Хакасияның имҷiлерiне Н.Н.Блохинаның адынаң онкологияҷа ӧӧн iстезiгліг кiннiң имҷiлерiнең, республика имҷiлерiнең палғалызарға, чӧптезерге, семинарлар, видеоконференциялар, видеолекциялар иртiрерге оңдай пар.

Социальнай объект азылар алнында Хакасияның чон артизi Людмила Арыштаева, чыылған чонны ирбен отнаң ибiрiп, имнег туразының тоғынҷыларына тӱзiмнiг iстенерге паза пациенттерге чабал ағырығдаң имненіп аларға алғаан. Анзы ӧӧнi полбас па? Хоза чоохтирға сағынчам, пу имнег учреждениезінде пациенттер кӧп полбазын, че айланарға килiс парза, олар пӧзiк имнег полызиин алзыннар...