ӦРТТЕРДЕҢ ТОҒЫР – НАА ТЕХНИКА
Нацпроект. Россияның «Экология» нацпроектiнiң «Арығларны хайраллиры» федеральнай программазы хоостыра Хакасияның лесничестволарына наа техника пирiлче
Хакасияның арығларын хайраллапчатхан учреждениелерiнзер теестегi наа техника килдi. Ағбанда «Инженернай арачыланыс» управлениенiң базазында наа техниканы изере турғыс салғаннар. Прай 17 техника саналған: арығларда ӧрттернi ӱзiрҷең бульдозер оборудованиелiг паза салдалығ гусеницалығ, 3 трактор, харлығ паза састығ чирлерҷе чӧрҷең 3 вездеход, таарлағ тартчаң 2 cамосвал паза пассажирлер, таарлағ апарҷаң 9 УАЗ автомобиль (чонда оларны «Буханка» адапчалар).
Пу техниканы ағас хонии учреждениелерiне пирерiнде араласханнар Хакасия пазы Валентин Коновалов, орынҷызы Юрий Курлаев паза республиканың чир-чайаан ис-пайы паза экология министрi Владимир Лебедев. Полған на техника алнында аны аларға тимненчеткен учреждениенiң устағҷызы паза водитель турғаннар.
Оларның алнында Валентин Коновалов, улуғ нимес чоох тудып, наа техника килгенiнең алғыстаан:
– Хакасияның арығларын хайраллапчатхан автоном учреждениелерiнiң автопаркын пiс сыбыра нааҷылапчабыс. «Экология» национальнай проект хоостыра республиканың учреждениелерiне 130 техника пирiлген, ағаа 86,6 миллион салковай хорадылған. Ӧрттердең тоғыр кӱресчең техника автоном учреждениелерiнiң кирексiнiстерi хоостыра паза оларнаң хайдағ орыннарда тузаланарын санға алып алылча. Пӱӱл республикада, пу тоғысты улам тӱзiмнiг апарар пӧгiннең, алынҷа ағас хонии комитедi тӧстелген. Iзенербiс, ам тоғыс улам чахсы апарылар. Піс прай саринаң хабазарбыс. Пiлдiстiг, ағас хониин тилiдерiне хоза ахча киректелче, аннаң даа полызарбыс. Сiрернi техника нааҷылалчатханынаң алғыстапчам, ол ӧрттердең тоғыр кӱрезерге хабазарына, ағас отрасльын мыннаң мындар тилiдерiне iзенчебic.
Чооғын тоозып, Хакасия пазы автоном учреждениелерiнiң устағҷыларына полған на техниканың клӱзiн паза пiчиин пайрамни читiрген. Iди наа техника клӱcтерiн алғаннар Ағбан пилтiрi, Асхыс паза Таштып аймахтарындағы автоном учреждениелерi, iдӧк «Беялессервис», «Ширалессервис», «Копьеволессервис» паза «Горячегорсклессервис» автоном учреждениелерi.
Арығларны ӧрттердең арачылир ӧнетiн техника паза оборудование «Арығларны хайраллиры» федеральнай программа хоостыра арығ-тайғаларда сыхчатхан ӧрттернi табырах ӱзiрер паза оларны таратпас пӧгiннең алылча. Мындағ ӧнетiн техника иртерге сидiк орыннарда даа тоғын полча, ӧрттернi иртiрбес тудығлар, полосалар тартарға, ағастар аразында чоллар даа саларға хабасча.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |