Имҷілерні хумартхылап. Хакасия пазы Валентин Коновалов Харатаста пол килген. Анда городтағы аймахтар аразындағы имнег туразының хыринда коронавирус чуғынҷах ағырығнаң харбазып ӱреен имҷiлернiң хумартхызына чарыдылған аллеяда танығлығ мемориал турғызылған

Мемориал пайрамни азыларында iдӧк Хакасияның хазых хайраллаҷаң министрi Олег Ананьевский, респубиканың Ӧӧркi Чӧбiнiң хазых хайраллирынҷа паза социальнай политикаҷа комитедiнiң устағҷызы Евгений Молостов, Харатас город администрациязының кiзiлерi паза имнег тоғынҷылары араласханнар.

Олаңай ла нимес Харатастағы аймахтар аразындағы имнег туразының хыринда ковидтең ӱреен имҷiлерге хумартхылас аллеязы тӧстелген паза хумартхы тас турғызылған. Имнег туразының хирургия пӧлиинде 2020 чылда ковидтең имнепчеткен пастағы пӧлiк азылған. Анда тиксi республикадаң коронавируснаң аар ағырчатхан пациенттернi чатырғаннар. Пандемия тузында, постарының тоғыcтарын толдырып, ах чарыхтаң 15 имнег тоғынҷызы парыбысхан: сигiс имҷi, iкi фельдшер, ӱс медсестра, пiр лаборант паза водитель. Оларны хумартхылап, пӱӱл майда имнег туразының алнындағы ачыхта 15 харағай хорбызы одыртылған.

– COVID-19 Хакасияның хазых хайраллаҷаң системазына аар чобағ полған. 2020 чылда чуғынҷах ағырығ тараан туста чуртағҷыларның хазиин паза чуртазын ал халар ӱчӱн, ӧӧн пӧгiннерні толдырарына прай имнег киреенің кӱзi коронавирустаң озып аларына парған. Имҷiлер хараа-кӱнӧрте полған на пациенттің чуртазын ал халар ӱчӱн харбасханнар. Пiлдiзi чох салтарларға ағылчатхан ағырығдаң имнеп, постарының чуртазына паза хазиина хорғыс полған. Хомзынысха, оларның прайзы ла ағырығдаң арачылан полбаан. Прай имнег тоғынҷыларына оой нимес тоғыс толдырчатханнары ӱчӱн улуғ алғызым читiрчем, хада тоғынған арғыстарың сағызыбыста хаҷанға даа халарлар, – теен Валентин Коновалов.

Хумартхы тасты тӧстирiнде Хакасияның хазых хайраллаҷаң министерствозы, «СаянКамень» тастаң ниме-ноо сығарчатхан завод паза Харатас город администрациязының кiзiлерi ӧткiн араласханнар. Хумартхы тас пӧзiк тағлардағы граниттең тимнелген, аның кӧдiрiмi – iкi тонна артиинаң. Анда «Пасхазына чарып, позым кӧй парғам» пазылых паза чӱрек тутчатхан имҷiнiң холы хоостал парған.

– Республикада ковиднең ағырчатханнарға пастағы госпиталь Харатастағы аймахтар аразындағы имнег туразында азылған. Iдӧк таныхтирға кирек, имнег учреждениелерiнiң аразында ол прайзынаң ӱр андағ оңдайнаң тоғынған. Ағаа хоза ол профильлiг нимес, аны килiстiре алыстырғаннар. Республикадағы иң аар ағырчатханнарны имнирге пеер ағылҷаңнар, аннаңар имҷiлерге хумартхылас аллеязын мында тӧстирге чарадығ алылған.

Аннаң пасха, Ағбан пилтiрi аймаандағы имнег туразына коронавирус чуғынҷах ағырығнаң ағырчатхан пациенттернi имнеп ӱреен имҷi-психиатр Николай Иванович Солошенконың ады пирiлче. Харатастағы онкологияҷа имнег полызиин пирҷең амбулаторнай кiн, тізең, хирургия пӧлиинің устағҷызы полған Виктор Иванович Купернiң адын ал чӧрер. Ағбандағы аймахтар аразындағы имнег туразының поликлиниказының пизiнҷi терапия пӧлиине имҷi-терапевт Галина Дмитриевна Пашкевичтiң ады пирiлче. Андағ оңдайнаң, тоғыста коронавирус чуғынҷах ағырығны чухтырып, ах чарыхтаң парыбысхан имҷiлернi хумартхылирдаңар чарадығ алылған, – чоохтаан Олег Ананьевский.

Хазнада коронавирус чуғынҷах ағырығнаң ағырчатханнарның саны син парған полза даа, Хакасияның хазых хайраллаҷаң министерствозы чуртағҷыларға, пос салынмин, санитар-эпидемиология оңдайларына тудынарға чахыпча. Имнег тураларында маска кис чӧрерге, хол удаа чуурға паза COVID-19-таң тоғыр вакцинация паза ревакцинация иртерге. Хайди таныхтаан Олег Ананьевский, республикада вакцина читкiҷе.

Хумартхы тас пайрамни азылған соонаң Валентин Коновалов, Харатастағы имнег туразы тоғынҷыларынаң тоғазып, оларның ағырсымнығ сурығларына нандырған.