ПРАЙ ТОҒЫСТАР ТУЗЫНДА ТОЛДЫРЫЛЧА
05.08.2022
Хабарлар
Нацпроектче. Хакасия пазы Валентин Коновалов пу неделяда республиканың олған имнег туразында пӱкӱлее нааҷылас пӱдiрiг тоғыстары хайди апарылчатханын сыныхтаан
Республиканың олған имнег туразы «Хазых хайраллиры» нацпроектче алғым нааҷылалча. Ол пӱдiрiг тоғыстары ӱс чардыхча апарылча. Хайди кӧрiлген, пастағы чардығында – имнег туразының ӧӧн поликлиниказын пӱкӱлее нааҷылиры, iкiнҷi чардығында – консультация-диагностика пӧлии туразын тиксi тыхтиры. Пу корпустар Ағбанда пiр адресче орныхчалар: Чертыгашевтiң орамазы, 59. Ӱзiнҷi чардығында Чертыгашевтiң орамазы, 63 адресче орныхчатхан стационар туразынаң хости наа пӱдiрiг тимге сығар саларға пӧгiнгеннер. Ол наа пӱдiрiгде компьютер томогравы турғызылар.
Поликлиника пӧлиинде алғым нааҷылас тоғыстарын пӱӱл февральда пастааннар. Пӱдiрiгнең «СЗ АСК – Водрем» ООО подряд организациязы айғасча. Пу тура пӱӱл iстi-тастынаң пӱкӱлее нааҷылал парар. Пӱдiрiгҷiлер, демонтаж идiп, стенелернiң чағылғанын, иргi кӧзенектернең паза хырынаң ала тооза ходырыбысханнарында, поликлиника ээн тура ла чiли тур халған. Пӱӱн анда, наа кӧзенектер турғызып, тура хырын, стропилалар хатап салып, нааҷылапчалар паза пасха даа ниме-ноо тыхтап маң чохтанчалар. Пӱдiрiгҷiлернiң чооғынаң, августта тура хыры парчан чабыл парар. Амғы тустағы сейсмология кирексiнiстерi хоостыра, поликлиниканың полған на хадылындағы ӧӧн стенелерi, плита-чабығлары прай тыыдылча. Iдӧк пу тураның тастында сол саринда лифт шахтазы пӱдiрiлче.
Пу кӱннерде республика пазы Валентин Коновалов, алғым нааҷылас пӱдiрiг тоғыстары хайди апарылчатханын сыныхтап, андар ӧнетiн чӧр килген. Ол, поликлиниканың ӱзiнҷi хадылынзар сығып, тураның тыхталчатханын пос хараанаң кӧрiп алған. Чоохтирға кирек, ӱзiнҷi хадылында пӱдiрiгҷiлер стенелернi чағып пастабысханнар. Валентин Коноваловха апарылчатхан ол-пу тоғыстардаңар чарыда чоохтаан республиканың пӱдiрiг паза чурт-коммунальнай хоных министрi Валерий Келин.
Iдӧк нааҷылас тоғыстарының iкiнҷi чардығы апарылча. Компьютер томогравын тоғындырарына алынҷа тура пӱдiр сыхханнар. Ол ікі хадыллығ полар. Пу кӱнге анда, котлован хазылып, фундамент тимнел тее парды. Хайди чоохтааннар пастыхтар, пӱдiрiге чир наа ла хазылчатханда, пурунғы сӧӧктер табылған. Анаң, ол сӧӧктер тооза хазылғанҷа, подрядчик анда тоғысты 1,5 айҷа пастап полбаан. Ағаа стационар корпузында идiлчеткен тоғыстарны пу чылда тоос саларға кирек.
Пӱӱн пӱдірігде 41 тоғысчы істенчеттір, ағаа хоза – пис нандырығлығ инженер. Олар ікі сменанаң тоғынчалар. Полған на смена – 12-ер час.
Валентин Коновалов пӱдiрiгҷiлернiң тоғызын кӧрiп алған соонаң таныхтаан, пӱкӱлее нааҷылалчатхан олған имнег туразы республика правительствозының алынҷа хайиинда тудылча. Пiс хазых хайраллирының тилiзiне улуғ хайығ салчабыс, анзы чоныбыстың чуртазы паза хазии полча нооза. Пӱӱн нааҷылалчатхан корпус харах кӧзiне алызып одырча. Ол амғы тустағы прай кирексiнiстерге нандырар, ол санда iдӧк томографха кӧрiлчеткен пӱдiрiг. Прай пу тоғыстар палаларға имнег полызиинаң тузаланарға оой полар ӱчӱн идiлче.
Хайди искiрген Хакасияның пӱдiрiг паза ЖКХ министрi, республиканың олған имнег туразын тиксi нааҷылирына 699 млн салковай позыдылған. Пӱӱл тоғыстар 171 млн салковайға толдырыл парарға кирек. Пастағы чардығындағы пӧгiннернi чардыхти толдыр салғаннар. Че, хаҷан аны толдырып пастабысханнарында, пӱдiрiг проектiнiң читпес сари сығысхан, ол сурығ соонаң пӧгiлген. Ам подряд организациязына тоғысчылар санын хозарға чӧп пирiлген теен министр. 2023 чылда ӱзiнҷi чардығынҷа консультация-диагностика пӧлии туразы тиксi тыхталар. Пӱдiрiг материалларынаң, тiзең, сидiксiнiс чоғыл.
Автор :
Инора БОРГОЯКОВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
