ХОНЫХТАР ТИЛІЗІНЕ
08.07.2022
Хабарлар
Сертификаттар алған идінҷектер, фермерлер Валентин КОНОВАЛОВНАҢ,
Ирина ВОЙНОВАНАҢ, Сергей ТРУФАНОВНАҢ
Аал хонии. Хакасия правительствозында «Агростартап» гранттар марииның чиңісчілеріне хазна хабазиин аларына сертификаттар читірілгеннер
Пӱӱл гранттар мариинда 12 хоных чиңісчі полыбысхан, оларның санында пір кооператив, тӧрт сӧбіре фермазы паза читі идінҷек. Оларға тиксі 112 миллион салковай пирілген. Гранттар алғаннар 27 кізіні тоғысха алып аларға киректер. 7 идінҷекке 27 миллион салковайға сертификаттар пирілген.
Пис хоных грант ахчазын мал садызарына хорадар, ікі хоных - хойларға. Хазна хабазиина тиксі 134 мал, 705 пас хой паза аал хонии техниказы, оборудование алылар.
Сӧбіре фермаларына тиксі 78 миллион салковайға сертификаттар читірілген. Оларның ікізі иттіг маллар ӧскірерін тилідерге пӧгінче. Пір хоных сӱттіг інектер тутча паза пір хоных аймах ӧзімнер ӧскірерінең айғасча. Ахчалығ хабазығ маллар, аал хонии техниказы, оборудование аларына паза ӱртӱн, мал сохчаң модульлығ цех пӱдіриине хорадылар.
«Иртен» аал хонии кооперативі грант ахчазына рефрижератор паза сӱт таарлаҷаң машина садызып алар.
Хакасия пазы Валентин Коновалов, чиңісчілерге ахчалығ сертификаттар читіріп, оларны чиңіснең алғыстаан:
- Марығ пастағызын на иртірілбинче. Экономика тилізінде аал хонии ӧӧн кӧстег полча. Аннаңар чылдаң чылға ағаа ахча кӧптең кӧп позытчабыс. Санкциялар кирілген туста аал хонии кирек отрасль полча. Хазна позын азырирға сыданарға кирек. Тоғызыңар ӱчӱн алғыс. Хоныхтарың тилізін!
Хакасия пазының орынҷызы Ирина Войнова аал хониинаң айғасчатханнарға тоңастығлар, ӧзімнер чахсы сыхсын, маллар, хойлар тутчатхан хоныхтарға мал азиин чахсы пилетеп алзыннар тіп алғаан. Паза ол Алтай аймаандағы «Иртен» кооператив олох аймахтың Хойбалдағы ортымах школазына полыс пиргеннеңер искірген. Кооператив школаа чиис тимнеҷең плита ал пирген.
- Хакасияның аал хонии паза ас-тамах министерствозы адынаң сірерні пу танығлығ кӱннең алғыстапчам. Кресен-фермер хоныхтарының саны ӧсче. Че, ачырғасха, хай пірее хоныхтар, хазна хабазиин алып, пис чыл пазынаң чабыл парчалар. Полғанына ла чииттернең тоғынарға кирек. Чиит улус аалларда халар паза тоғынар ӱчӱн хазна программалары тоғынча. Ол санда «Аалларның тиксі тилізі». Россия Федерациязында ол программаҷа Хакасия пастағы пис регион санына кірче. Аймахтарның кӧбізінде чиит специалисттерге чурт пӱдірілген. Сірерге дее пу программада аралазарға чарир. Аны хоостыра школалар, олған садтарын пӱдірчебіс, автомобильлер алчабыс. Хоныхтарыңда маллар, хойлар саны ӧссін. Анзына пістің прай оңдайлар пар, - теен республиканың аал хонии паза ас-тамах министрі Сергей Труфанов.
Таштып аймаандағы фермер Марина Амзаракова грант алғаннарның санында. Ол хазна хабазиина трактор паза герефорд тӧлліг маллар садызарға пӧгінче. Марығда сӧбіре фермазы чіли араласхан.
- 2013 чылдаң сығара фермер полчам. Пастап наа ла тоғынып пастапчатхан фермер чіли грант алғам. Хада хонғаным Андрей Васильевичнең хада хониибысты апарчабыс. Аның харындас-пиҷелері піске чахсы полысчалар. Олар чох аар поларҷых. Ікі пала ӧскірчебіс. Олар ам даа школада ӱгренчелер. Маллар ӧскірерге чахсы полысчалар, - теен Марина Амзаракова.
Орджоникидзе аймаандағы Кӧкінек аалның фермері Наталья Филиппова грант ахчазына ікі комбайн паза ікі трактор садызып алар. Хоныхта тоңастығлар ӧскірчелер паза сӱттіг маллар тутчалар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде